មហាសាមគ្គីជនជាតិ ភូមិស្រុកផ្លាស់ថ្មី

01/10/2025 - 08:30

កសិករចាកផុតពីភាពក្រីក្រដោយសារទម្រង់ចិញ្ចឹមអន្ទង់មិនប្រើភក់

ប៉ុន្មានឆ្នាំមកនេះ នៅឃុំវិញហាយ ក្រុងកឹងធើ ទម្រង់ចិញ្ចឹមអន្ទង់ មិនប្រើភក់ក្នុងអាងស៊ីម៉ងត៍កំពុងក្លាយជាទិសដៅថ្មី នាំមកនូវប្រសិទ្ធភាពសេដ្ឋកិច្ចខ្ពស់ ជួយគ្រួសារកសិករជាច្រើនឈានឡើងចាកផុតពីភាពក្រីក្រ លំនឹងជីវភាព។

ទម្រង់ចិញ្ចឹមកន្ធាយរបស់បងថាច់ផាលិញ។

ជាមួយនឹងឆន្ទៈឈានឡើងចាកផុតពីភាពក្រីក្រ និងធ្វើមាននៅលើដីកំណើត ឆ្នាំ ២០២១ បន្ទាប់ពីត្រឡប់មកពីខេត្តប៊ិញយឿង បងថាច់ផាលិញ នៅភូមិវិញថាញ់B ឃុំវិញហាយ ទីក្រុងកឹងធើ ចាប់ផ្តើមស្រាវជ្រាវ ស្វែងយល់លើបណ្តាញ និងទៅទស្សនាទម្រង់ចិញ្ចឹមអន្ទង់នៅបាកលីវ។ ផ្តើមពីនោះ គាត់មានគំនិតចិញ្ចឹមអន្ទង់ មិនប្រើភក់ក្នុងអាងស៊ីម៉ងត៍ និងប្រើប្រាស់ប្រព័ន្ធបូមទឹកស្វ័យប្រវត្តិ។ ដំបូងឡើយ គាត់ធ្វើតែ៦អាង ហើយអាងនីមួយៗមានផ្ទៃដីពី៦-១០ម៉ែត្រការ៉េ ប៉ុន្តែដោយសារខ្វះបទពិសោធន៍ ទើបឆ្នាំដំបូងប្រសិទ្ធភាពមិនខ្ពស់។ ដកបទពិសោធន៍ពីការចិញ្ចឹមលើកមុន ឆ្នាំក្រោយៗទម្រង់ចិញ្ចឹមអន្ទង់របស់បង នាំមកប្រសិទ្ធភាពជាក់ស្តែង។ ផ្តើមពី៦អាងដំបូង ឥឡូវគាត់បានពង្រីកបន្ថែម៦អាងទៀត ដោយមានអន្ទង់ប្រមាណ៥.០០០ក្បាលក្នុងមួយអាង។

តាមប្រសាសន៍បងថាច់ផាលិញ អន្ទង់ជាប្រភេទសត្វស្បែករអិល ងាយរលាត់ស្បែក ហេតុនោះ ពេលចិញ្ចឹមក្នុងអាងស៊ីម៉ងត៍ត្រូវធានាផ្ទៃខាងក្នុងអាងរលីងរលោងជានិច្ច។ លើសពីនេះ អន្ទង់មានលក្ខណៈចូលចិត្តលាក់ខ្លួន រស់ត្រសុល ដូច្នេះគាត់ជ្រើសទីជម្រកដោយសំណាញ់ទន់។ ជាមួយនឹងទម្រង់ចិញ្ចឹមនេះ អន្ទង់កើនទម្ងន់រហ័ស ហើយងាយសង្កេតដំណើរធំធាត់របស់វាទៀតផង។ បងលិញ ឱ្យដឹង៖ “ចិញ្ចឹមអន្ទង់មិនប្រើភក់ក្នុងអាងស៊ីម៉ងត៍មានគុណសម្បត្តិងាយគ្រប់គ្រងប្រភពទឹក បន្ថយជំងឺតម្កាត់ បន្ថយអត្រាខូចខាតនិងគ្រប់គ្រងបានល្អតាំងពីគុណភាពកូនពូជនិងចំណី។ អ្នកចិញ្ចឹមគ្រាន់តែវិនិយោគអាងស៊ីម៉ងត៍ជាមួយនឹងផ្ទៃដីសមស្រប មានប្រភពទឹកស្អាត និងគោរពតាមបច្ចេកទេសត្រឹមត្រូវ នោះអន្ទង់ឆាប់ធំ ផ្តល់ទិន្នផលនិងប្រាក់ចំណេញខ្ពស់”។

ទម្រង់ចិញ្ចឹមអន្ទង់របស់បងថាច់ផាលិញ។ រូបថត៖ ហុងទើ

បច្ចុប្បន្ន បងលិញចិញ្ចឹម ១២ អាងសរុបចំនួន ៦០.០០០ក្បាល។ ប្រាំមួយអាងមុនចិញ្ចឹមបាន៦ខែហើយ ប្រមាណ៥ខែទៀតអាចលក់ចេញក្នុងឱកាសបុណ្យចូលឆ្នាំវៀតណាមដែលជាដំណាក់កាលលក់បានតម្លៃខ្ពស់។ រដូវកន្លងហើយ គាត់ចិញ្ចឹម ២៧.០០០ ក្បាល ប្រមូលផលបានជិត៤តោន តម្លៃលក់ពី៨៥.០០០ - ១១០.០០០ដុង ក្នុងមួយគីឡូក្រាមទៅតាមទំហំអន្ទង់។ ក្រោយពីទូទាត់រួចស្រេចនៅចំណេញបានជាង១០០លានដុង។ អាស្រ័យហេតុនោះ ប្រាក់ចំណូលរបស់គ្រួសារកាន់តែលំនឹង សង់បានផ្ទះសមរម្យ គិតគូរឱ្យកូនរៀនសូត្របានត្រឹមត្រូវ និងបានចាកផុតពីភាពក្រីក្រដោយចីរភាព។

ក្រៅពីចិញ្ចឹមអន្ទង់ គាត់នៅទាំងពង្រីកបន្ថែមទម្រង់ចិញ្ចឹមកន្ធាយក្នុងអាងស៊ីម៉ងត៍ទៀតផង។ នេះជាប្រភេទជលផលមានតម្លៃសេដ្ឋកិច្ចខ្ពស់ ហើយងាយថែទាំផង តម្លៃចុះឡើងក្នុងរង្វង់ពី៣០០.០០០- ៤០០.០០០ ដុងក្នុងមួយគីឡូក្រាម។ កន្ធាយមួយក្បាលៗអាចមានទម្ងន់ពី៥ - ៦គីឡូក្រាម សន្យានឹងនាំមកនូវប្រភពចំណូលលំនឹងជូនគ្រួសារ។

លោកង៉ោមិញតឹម ប្រធានគណៈកម្មាធិការប្រជាជនឃុំវិញហាយ ឱ្យដឹង៖ “ទម្រង់ចិញ្ចឹមអន្ទង់ មិនប្រើភក់ក្នុងអាងស៊ីម៉ងត៍កំពុងនាំមកនូវប្រសិទ្ធភាពជាក់ស្តែងជូនប្រជាជន។ រដ្ឋអំណាចឃុំតែងយកចិត្តទុកដាក់ឧបត្ថម្ភមាមីងអំពីដើមទុន បច្ចេកទេស និងចងសម្ព័ន្ធលក់ផលិតផល។ ជោគជ័យរបស់គ្រួសារបងថាច់ផាលិញ ជាភ័ស្តុតាងបង្ហាញពីស្មារតីហ៊ានគិត ហ៊ានធ្វើរបស់កសិករ ទន្ទឹមនឹងនោះ រួមចំណែកអនុវត្តទិសដៅបន្ថយភាពក្រីក្រ លើកកម្ពស់ជីវភាពប្រជាជន”៕

ហុងទើ-វិមាន

ចែករំលែកអត្ថបទ

ពាក្យគន្លឹះ