មហាសាមគ្គីជនជាតិ គំរូក្នុងសហគមន៍

09/09/2025 - 08:58

ទឹកចិត្តរបស់ប្រធានគណៈកម្មការវត្តទំនប់

ជាមួយតួនាទីជាប្រធានគណៈកម្មការវត្តទំនប់ ឃុំអាងនិញ ទីក្រុងកឹងធើ លោកពូឡឹមបឹន បានរួមជាមួយនឹងគណៈកម្មការវត្ត យកចិត្តទុកដាក់ដល់ការបួសរៀនរបស់ព្រះសង្ឃ ក៏ដូចជាការកសាង ជួសជុលវត្តអារាមឱ្យមានភាពសមរម្យនិងចលនាមាមីងពុទ្ធបរិស័ទរស់នៅសាមគ្គី ខិតខំអភិវឌ្ឍសេដ្ឋកិច្ចគ្រួសារ។

លោកពូឡឹមបឹន (ទី២រាប់ពីឆ្វេង) ទទួលគណៈប្រតិភូដែលអញ្ជើញមកសួរសុខទុក្ខ
និងប្រគេនអំណោយនៅវត្តទំនប់ ។

ទោះជាមានអាយុ ៧១ ឆ្នាំហើយក៏ដោយ ប៉ុន្តែលោកពូឡឹមបឹន នៅតែប្ដេជ្ញាចិត្តនិងខិតខំប្រឹងប្រែងដោយឥតឈប់ឈរ។ លោកពូតែងចលនាមាមីងពុទ្ធបរិស័ទរស់នៅសាមគ្គី ស្រុះស្រួលគ្នាកសាងភូមិស្រុកនិងវត្តអារាមកាន់តែមានភាពសមរម្យ។ លោកពូឡឹមបឹន មានប្រសាសន៍៖ “ជាប្រធានគណៈកម្មការវត្ត ខ្ញុំជាមួយនឹងសមាជិកគណៈកម្មការវត្ត តែងយកចិត្តទុកដាក់ដល់ការរៀនសូត្ររបស់ព្រះសង្ឃក្នុងវត្ត។ ពេលឃើញសំណង់ក្នុងវត្តមានការទ្រុឌទ្រោម យើងខ្ញុំតែងប្រជុំគណៈកម្មការវត្តនិងព្រះសង្ឃ ដើម្បីឯកភាពនិងមានគម្រោងសាងសង់ឬជួសជុលឡើងវិញ តួយ៉ាងដូចព្រះវិហារទើបសង់ថ្មី កសាងអស់ថវិកាជាង៣,៤ពាន់លានដុង; ព្រមទាំងសំណង់ដែលសាងសង់ថ្មីៗ មានដូច៖ សាលាទាន សមណកុដិ រោងចង្ហាន់ និងរបងវត្តជាដើម សរុបថវិកាជាង១២ពាន់លានដុង។ ក្រៅពីនោះ ព្រះចៅអធិការនិងគណៈកម្មការវត្តកំពុងបវារណាពុទ្ធបរិស័ទ កសាងសាលាពុទ្ធិកបឋមសិក្សាមួយខ្នង ជាមួយនឹងថវិកាជាង១ពាន់លានដុង ដើម្បីបង្កលក្ខណៈសម្រាប់ព្រះសង្ឃបន្តការសិក្សាក្នុងវត្ត” ។

ជាមួយនឹងកិត្យានុភាពរបស់ខ្លួន លោកពូឡឹមបឹន រួមជាមួយនឹងគណៈកម្មការវត្តបានចលនាមាមីងរួមវិភាគទានទឹកប្រាក់និងថ្ងៃពលកម្ម កសាងផ្លូវជនបទបានប្រវែង៥០០ម៉ែត្រ រួមទាំងស្ពានតភ្ជាប់ភូមិចូវថាញ់និងភូមិសាឡាង គិតជាទឹកប្រាក់រាប់រយលានដុង ជួយឱ្យមាមីងពុទ្ធបរិស័ទទៅវត្តមានភាពងាយស្រួល រួមចំណែកជាមួយរដ្ឋអំណាចភូមិភាគក្នុងការកសាងជនបទថ្មី។

ព្រះតេជគុណឡឹមហ៊ីប ព្រះចៅអធិការវត្តទំនប់ មានថេរដីកា៖ “ទិដ្ឋភាពក្នុងវត្តមានភាពសមរម្យដូចសព្វថ្ងៃ គឺអាស្រ័យស្មារតីសាមគ្គីរវាងព្រះសង្ឃ គណៈកម្មការវត្តនិងពុទ្ធបរិស័ទក្នុងចំណុះវត្តផងដែរ ក្នុងនោះ មានលោកឡឹមបឹន ជាប្រធានគណៈកម្មការវត្តដែលខ្នះខ្នែងជួយគិតគូរការងារ។ មិនត្រឹមតែគិតគូរការងារអភិវឌ្ឍសេដ្ឋកិច្ចគ្រួសារឱ្យមានស្ថិរភាពប៉ុណ្ណោះទេ លោកពូនៅទាំងរួមជាមួយសមាជិកគណៈកម្មការវត្ត និងព្រះសង្ឃខ្នះខ្នែងកសាងវត្តអារាមឱ្យមានភាពរីកចម្រើន។ ទន្ទឹមនឹងនោះ គាត់នៅទាំងសហការជាមួយសមាជិក គណៈកម្មការវត្ត ធ្វើការជួសជុល និងលាបពណ៌ទូក-ង ដើម្បីចូលរួមក្នុងពិធីបុណ្យអកអំបុក - ប្រណាំងទូក-ង រៀងរាល់ឆ្នាំទៀតផង”។

អាចនិយាយបានថា ជាមួយនឹងការប្ដេជ្ញាចិត្តនិងស្មារតីទទួលខុសត្រូវ ពូឡឹមបឹន បានក្លាយជាទីបង្អែកគួរឱ្យទុកចិត្តរបស់វត្តទំនប់និងមាមីងក្នុងភូមិស្រុក។ ការងារជាក់ស្តែងរបស់គាត់មិនត្រឹមតែរួមចំណែកធ្វើឱ្យវត្តកាន់តែមានភាពសមរម្យប៉ុណ្ណោះទេ ថែមទាំងពូនជ្រុំនូវសាមគ្គីភាពក្នុងសហគមន៍ ថែរក្សាលក្ខណៈប្រពៃណីវប្បធម៌និងជំនឿរបស់ជនជាតិខ្មែរក្នុងចំណុះជើងវត្តទៀតផង៕

ដាលីន - ថាច់ធី

ចែករំលែកអត្ថបទ

ពាក្យគន្លឹះ