សុខភាព - អប់រំ សុខភាព

21/08/2025 - 08:12

ជំរុញការបង្ការ ទប់ស្កាត់ជំងឺគ្រុនឈាម

ចាប់ពីដើមឆ្នាំ២០២៥មកដល់ពេលនេះ ជំងឺគ្រុនឈាមបានកើតឡើងនៅតាមភូមិភាគជាច្រើនក្នុងទូទាំងប្រទេស។ នៅថ្ងៃទី២០ ខែកក្កដា ឆ្នាំ២០២៥ នាយករដ្ឋមន្ត្រីនៃរដ្ឋាភិបាល មានសារទូរលេខ ១១៦/CĐ-TTg ស្ដីពីបង្កើនការបង្ការ ទប់ស្កាត់ជំងឺគ្រុនឈាម។ ដើម្បីគ្រប់គ្រងជំងឺគ្រុនឈាម ដំណាក់សុខាភិបាលឃុំឡុងហ៊ីប ខេត្តវិញឡុង បានសហការជាមួយផ្នែកឯកទេស រដ្ឋអំណាចភូមិភាគ ជំរុញការបង្ការ ទប់ស្កាត់ជំងឺគ្រុនឈាម។

វេជ្ជបណ្ឌិតដំណាក់សុខាភិបាលឃុំឡុងហ៊ីប ពិនិត្យនិងព្យាបាលជំងឺជូនប្រជាជន។

វេជ្ជបណ្ឌិត ហ្វិញថាញតឹម ប្រធានដំណាក់សុខាភិបាលឃុំឡុងហ៊ីប ឱ្យដឹង៖ “ដំណាក់សុខាភិបាលឃុំបានធ្វើសេនាធិការជូនគណៈកម្មាធិការប្រជាជនឃុំ រៀបចំគណៈចង្អុលការបង្ការ ទប់ស្កាត់ជំងឺគ្រុនឈាមនៅលើភូមិសាស្រ្ត បន្ទាប់ពីរួមបញ្ចូលឃុំ។ កសាងផែនការឃោសនាផ្សព្វផ្សាយបង្ការ ទប់ស្កាត់ជំងឺគ្រុនឈាមនៅលើភូមិសាស្រ្តឃុំ; ទទួលនិងចែកចាយឯកសារផ្សព្វផ្សាយជូនសហការីសុខាភិបាលនៅតាមភូមិធ្វើការផ្សព្វផ្សាយ; រៀបចំត្រួតពិនិត្យ សន្ទស្សន៍ BI (សន្ទស្សន៍ពិនិត្យអង្កេតចំនួនឧបករណ៍តម្កល់ទឹកដែលមានដង្កូវទឹក មូសខ្លា) រៀងរាល់សប្តាហ៍នៅតាមភូមិនានាលើភូមិសាស្រ្តឃុំបាន ៨៤ លើក ដោយមានចំនួន ៦៨០ គ្រួសារ។ ដំណាក់សុខាភិបាល បានចែកខិត្តប័ណ្ណផ្សព្វផ្សាយបង្ការទប់ស្កាត់ជំងឺគ្រុនឈាមជាង ៥០០ សន្លឹក។ ការងារបង្ការ ទប់ស្កាត់រោគឆ្លងនៅលើភូមិសាស្រ្តឃុំក្នុងប៉ុន្មានខែដើមឆ្នាំ ២០២៥ ជាសារវន្តបានលំនឹង។ ពិសេសគឺជំងឺគ្រុនឈាម បានគ្រប់គ្រងល្អ ចាប់តាំងពីដើមឆ្នាំមក នៅលើភូមិសាស្រ្តឃុំ កើតជំងឺគ្រុនឈាមតែ ១ ករណីប៉ុណ្ណោះ ថយចុះ ៧ ករណីបើប្រៀបនឹងរយៈពេលដូចគ្នាកាលពីឆ្នាំ ២០២៤”។

អ្នកមីងគឹមធីក្វាង នៅភូមិផ្សារ ឃុំឡុងហ៊ីប ឱ្យដឹង៖ “មូសកើតច្រើននៅរដូវភ្លៀង នេះក៏ជាឱកាសកើតជំងឺគ្រុនឈាម។ គ្រួសារខ្ញុំមានកូនតូច ៣ នាក់ ម្ល៉ោះហើយខ្ញុំតែងសម្អាតស្មៅព្រៅជុំវិញផ្ទះ ពិនិត្យនិងកម្ចាត់ដង្កូវទឹក និងលាងសម្អាតឧបករណ៍តម្កល់ទឹកប្រើប្រាស់ជាប្រចាំ បិទគម្របពាងនិងអនុវត្តល្អនូវការបង្ការ ទប់ស្កាត់ជំងឺគ្រុនឈាម ដែលផ្នែកឯកទេសនិងរដ្ឋអំណាចភូមិភាគបានបំផុសចលនា”។

ដើម្បីលើកកម្ពស់ការយល់ដឹងរបស់ប្រជាជន អំពីការបង្ការ ទប់ស្កាត់ជំងឺគ្រុនឈាម ដំណាក់សុខាភិបាលឃុំឡុងហ៊ីប បានសកម្មផ្សព្វផ្សាយ ដូចជា៖ ផ្គួបបញ្ចូលផ្សព្វផ្សាយក្នុងពេលចាក់វ៉ាក់សាំងជាប្រចាំនៅដំណាក់សុខាភិបាលបង្ហាញពីរបបអាហារបំប៉នសម្រាប់កុមារ ពេលបើកយុទ្ធនាការផ្តល់ Vitamin ក៏ដូចជាដំណើរការពិនិត្យព្យាបាលជំងឺប្រចាំថ្ងៃ។ ទន្ទឹមនឹងនោះ ដំណាក់សុខាភិបាលនៅទាំងផ្សព្វផ្សាយតាមប្រព័ន្ធផ្សព្វផ្សាយរបស់ដំណាក់ ប្រព័ន្ធផ្សព្វផ្សាយរបស់ឃុំ និងផ្សព្វផ្សាយតាមកម្មវិធី Zalo និង Facebook ជាដើម។ រៀងរាល់សប្តាហ៍ ដំណាក់សុខាភិបាល ចាត់កម្មាភិបាលជំនាញ សហការជាមួយនឹងសហការីសុខាភិបាលនៅតាមភូមិនានា ដើម្បីត្រួតពិនិត្យសន្ទស្សន៍ BI និងចែកចាយខិត្តប័ណ្ណ ណែនាំប្រជាជនពីរបៀបបង្ការទប់ស្កាត់ជំងឺគ្រុនឈាម។ ហេតុនោះ ទន្ទឹមនឹងការខិតខំរបស់ផ្នែកសុខាភិបាល ប្រជាជនម្នាក់ៗក៏គប្បីលើកកម្ពស់ការយល់ដឹង អនុវត្តល្អនូវវិធានការបង្ការជំងឺគ្រុនឈាម ដើម្បីធានាសុខភាពរបស់ខ្លួន គ្រួសារនិងសហគមន៍៕

សើុងម៉ាល័យ-ប្រែសម្រួល៖ វិមាន

ចែករំលែកអត្ថបទ

ពាក្យគន្លឹះ