មហាសាមគ្គីជនជាតិ ភូមិស្រុកផ្លាស់ថ្មី

10/02/2025 - 15:27

អនុវត្តវិទ្យាសាស្ត្របច្ចេកទេសជឿនលឿនក្នុងការដាំផ្កាស្បៃរឿង

បងស្រីគឹមធីឡឹន នៅភូមិដៃទែន ឃុំលៀងហ្វា A ស្រុកចូវថាញ់ ខេត្តត្រាវិញ រកបានប្រាក់ចំណូលលំនឹង អាស្រ័យអនុវត្តវិទ្យាសាស្ត្របច្ចេកទេសទៅក្នុងទម្រង់ជំនាញដាំផ្កាស្បៃរឿង។

បងស្រីគឹមធីឡឹន កំពុងថែទាំផ្កាស្បៃរឿងផ្គត់ផ្គង់ទីផ្សារបុណ្យចូលឆ្នាំថ្មីវៀតណាមកន្លងហើយ។

បងស្រីឡឹន ឱ្យដឹងៈ “ជាមួយផ្ទៃដីប្រហែលមួយកុង ដែលឪពុកម្ដាយចែកឱ្យ នៅពេលចេញរស់នៅដោយឡែក គ្រួសារខ្ញុំអនុវត្តទម្រង់ជំនាញដាំផ្កាស្បៃរឿងសម្រាប់ផ្គត់ផ្គង់ទីផ្សារ ព្រោះថា ទម្រង់នេះមិនចាំបាច់មានផ្ទៃដីធំ ប្រើប្រាស់ដើមទុនតិច សមស្របនឹងលក្ខណៈគ្រួសារ។ ទើបដាំដំបូងក៏ជួបលំបាកដែរ ពីព្រោះយើងមិនទាន់ក្ដាប់បានបច្ចេកទេសក្នុងការដាំលើកដំបូង ខ្ញុំដាំប្រមាណ ៣.០០០ ដើម ចំណេញបានតែ ៥ លានដុង។ អាស្រ័យបានរដ្ឋអំណាចមូលដ្ឋាន ដឹកនាំចូលរួមវគ្គសិក្សាពីបច្ចេកទេសដាំផ្កាលម្អដែលផ្នែកជំនាញរៀបចំឡើង ទើបខ្ញុំក្ដាប់បានបច្ចេកទេសថែទាំ ការដាំសម្រេចបានប្រសិទ្ធភាព។ ខ្ញុំដាំផ្កាស្បៃរឿងប្រមាណ ៣.០០០ ដើមក្នុងមួយលើក រយៈពេលដាំ២ខែកន្លះ ដូច្នេះក្នុងមួយឆ្នាំខ្ញុំដាំបាន៤លើក ក្រោយពីផាត់ទាត់រួចចំណេញជិត៤០លានដុង។ ក្រៅពីដាំផ្កា គ្រួសារខ្ញុំនៅចិញ្ចឹមគោនិងឆ្លៀតពេលទៅស៊ីឈ្នួលបន្ថែម ដូច្នេះ រៀងរាល់ឆ្នាំគ្រួសារអាចរកបានប្រាក់ចំណូលជាង១០០ លានដុង ពេលឃើញជីវភាពគ្រួសារបានលំនឹង ខ្ញុំត្រេកអរណាស់” ។

បងស្រីឡឹន ឱ្យដឹងបន្ថែម៖ “ផ្កាស្បៃរឿង ជាប្រភេទផ្កាដែលពេញនិយមសម្រាប់ធ្វើជាគ្រឿងសក្ការបូជា និងដាក់តាំងលម្អក្នុងពិធីបុណ្យទានផ្សេងៗ ហេតុនេះ ការជ្រើសរើសពេលវេលាដាំឱ្យសមស្របគឺសំខាន់ខ្លាំងណាស់ ដើម្បីកំណត់បានតម្លៃលក់។ ក្រៅពីនោះ បច្ចេកទេសដាំក៏សំខាន់ណាស់ដែរ ព្រោះថា ដើមផ្កាស្បៃរឿងសមស្របជាមួយដីរសោះ ម៉ដ្ឋ រំដោះទឹកបានល្អ គ្មានមេរោគជាដើម។ អាចច្របល់លាយជាមួយនឹងដីលាមកក្របីគោ ជក់ដូងជាដើម ស្រោចទឹករក្សាសំណើមរៀងរាល់ថ្ងៃដើម្បីផ្កាលូតលាស់ល្អ ប្រើប្រាស់ជីអាសូត ផូស្វ័រ ប៉ូតាស្យូមឱ្យល្មាក់ល្មម តាមការណែនាំរបស់ផ្នែកជំនាញ”។

អ្នកស្រី ត្រាងធីហ្វិញភឿង ប្រធានគណៈកម្មាធិការប្រជាជនឃុំលៀងហ្វា A ឱ្យដឹង៖ “បងស្រីឡឹន គឺជាបុគ្គលគំរូមួយរូបនៅមូលដ្ឋាន បងស្រី ស៊ូទ្រាំការលំបាក ខិតខំឈានឡើងក្នុងជីវភាព ជាគ្រួសារទីទ័លក្រ ប៉ុន្តែដោយការខិតខំប្រឹងប្រែងឈានឡើង ពង្រីកសេដ្ឋកិច្ចប្រកបដោយប្រសិទ្ធភាព។ ទោះបីគ្រួសារមានដីបង្កបង្កើនផលតិចតូច ប៉ុន្តែប្រើប្រាស់អស់ពីលទ្ធភាពដោយអនុវត្តទម្រង់ដាំផ្កាស្បៃរឿងសម្រេចបានប្រសិទ្ធភាពសេដ្ឋកិច្ច។ នេះគឺជាគំរូដ៏ល្អមួយដែលឃុំជំរុញលើកទឹកចិត្តពង្រីកទម្រង់នេះ”៕

សើុងម៉ាល័យ - ពេជ្រសឿន

ចែករំលែកអត្ថបទ

ពាក្យគន្លឹះ