គោលនយោបាយ -ការរស់នៅ គោលនយោបាយ

20/05/2024 - 15:30

តំបន់ជនជាតិនៅកាម៉ាវ មានភាពផ្លាស់ថ្មីអាស្រ័យគោលនយោបាយ

រយៈពេលកន្លង អាស្រ័យអនុវត្តល្អនូវគោលនយោបាយរបស់រដ្ឋសម្រាប់តំបន់ជនរួមជាតិភាគតិច បានធ្វើឱ្យមុខមាត់ជនបទនិងជីវភាពសម្ភារៈ ស្មារតីរបស់ជនរួមជាតិខ្មែរលើភូមិសាស្ត្រស្រុកត្រឹងវ៉ាន់ថើយ ត្រូវបានកែលម្អដោយឥតឈប់ឈរ។

ផ្តើមពីទម្រង់ផលិតពិពិធកម្មពូជដំណាំ សត្វចិញ្ចឹមគួបផ្សំ ជារៀងរាល់ឆ្នាំ ក្រោយពីទូទាត់រួច គ្រួសារលោកហ្វិញម៉ាក នៅចំណេញបានជាង១០០លានដុង។

ទូទាំងស្រុកត្រឹងវ៉ាន់ថើយ មានជនរួមជាតិខ្មែររស់នៅប្រមាណជាង២.១៩០គ្រួសារ ប្រមូលផ្តុំច្រើនបំផុតនៅឃុំចំនួន៣ គឺឃុំខាញ់ហឹង ខាញ់ប៊ិញតីនិងត្រឹងហ៊ើយ។ ក្នុងនោះ ខាញ់ហឹង គឺជាឃុំដែលមានជនរួមជាតិខ្មែររស់នៅច្រើនបំផុត ដោយមានប្រជាជន៤១៦គ្រួសារ ស្រូបអត្រា៩,៣៧%នៃចំនួនប្រជាជនទូទាំងឃុំ។ ប៉ុន្មានឆ្នាំកន្លង អាស្រ័យបានរដ្ឋអំណាចគ្រប់លំដាប់ថ្នាក់យកចិត្តទុកដាក់វិនិយោគកសាងសំណង់ស្ពាន ផ្លូវជនបទ បណ្តាញអគ្គិសនី ទឹកស្អាត សាលារៀន ដំណាក់សុខាភិបាល បង្រៀនរបរបណ្តុះបណ្តាលវិជ្ជាជីវៈ ឧបត្ថម្ភសាងសង់ផ្ទះ ដើមទុនផលិតកម្ម បង្កើតរបររកស៊ីចិញ្ចឹមជីវិត ទើបជីវភាពមាមីងជនរួមជាតិខ្មែរលើភូមិសាស្ត្រស្រុកភាគច្រើនមានការរីកចម្រើន។

 ផ្លូវបេតុងស្រឡះស្រឡំនៅភូមិកិញដឹងB ឃុំខាញ់ហឹង។

គ្រួសារលោកហ្វិញឡុក ជាជនជាតិខ្មែរនៅភូមិកិញដឹង B ឃុំខាញ់ហឹង មានសមាជិក៤នាក់ ពីមុនគ្រួសារគាត់ឋិតក្នុងក្របខ័ណ្ឌគ្រួសារក្រីក្រ។ ប្តីប្រពន្ធគាត់ខិតខំពលកម្ម ប៉ុន្តែដោយសារខ្វះដើមទុន មានដីបង្កបង្កើនផលតិចតួច ម៉្លោះហើយជីវភាពជួបការលំបាកច្រើន។ បន្ទាប់ពីបានការិយាល័យទំនាក់ទំនងនៃធនាគារគោលនយោបាយសង្គមស្រុកឱ្យបុលទុន៥០លានដុង ប្តីប្រពន្ធគាត់វិនិយោគលើការកែប្រែដីចម្ការដើម្បីដាំដំណាំសម្រាប់លក់។ ពេលទំនេរ គាត់ឆ្លៀតទៅស៊ីឈ្នួលដើម្បីរកប្រាក់ចំណូលបន្ថែម។ ហេតុនេះ ជីវភាពគ្រួសារគាត់មានភាពល្អប្រសើរឡើងជាសន្សឹមៗ។ ប្តីប្រពន្ធគាត់ សាងសង់បានផ្ទះឥដ្ឋសមរម្យ គិតជាទឹកប្រាក់ជាង២០០លានដុង ព្រមទាំងមានឱកាសគិតគូរឱ្យកូន២នាក់រៀនសូត្របានត្រឹមត្រូវ ផ្តើមពីនោះ គ្រួសារគាត់បានចាកផុតពីភាពក្រីក្រ កាលពីខែតុលា ឆ្នាំ២០២២។

ផ្តើមពីគោលនយោបាយអាទិភាព ឧបត្ថម្ភនិងលើកទឹកចិត្តអភិវឌ្ឍសេដ្ឋកិច្ច មានគ្រួសារជនរួមជាតិខ្មែរជាច្រើនបានឈានឡើងចាកផុតពីភាពក្រីក្រ។ ជាក់ស្តែងដូចជាគ្រួសារលោកហ្វិញម៉ាក អាយុ៦៦ឆ្នាំ នៅភូមិកិញដឹង B ឃុំខាញ់ហឹង។ បន្ទាប់ពីបានរដ្ឋអំណាចភូមិភាគបង្កលក្ខណៈឱ្យទៅទស្សនាសិក្សាបទពិសោធន៍ទម្រង់ផលិតកម្មរួច គាត់មិនអល់អែកក្នុងការវិនិយោគទុនលើកចម្ការ៥កុង អនុវត្តទម្រង់ពិពិធកម្មពូជដំណាំ សត្វចិញ្ចឹមគួបផ្សំ។ ដីមាត់អណ្តូងគាត់ដាំដើមឈើហូបផ្លែគ្រប់ប្រភេទ ដូច៖ ទៀប ខ្នុរ ដាំឆ្លាស់ពោតបារាំង ត្រសក់ស្រូវ នៅក្នុងអណ្តូង គាត់ចិញ្ចឹមត្រីគ្រប់ប្រភេទ។ ម្យ៉ាងទៀត គាត់ថែមទាំងចិញ្ចឹមជ្រូក មាន់ ទា ដើម្បីយកខ្លីចិញ្ចឹមវែង។ ក្រៅពីនោះ គាត់ធ្វើស្រែបាន២រដូវក្នុងមួយឆ្នាំ លើផ្ទៃដីជាង ២,៥ ហិកតា។ ផ្តើមពីទម្រង់ពិពិធកម្មពូជដំណាំ និងសត្វចិញ្ចឹមគួបផ្សំនេះ ជារៀងរាល់ឆ្នាំ ក្រោយពីទូទាត់ គ្រួសារគាត់នៅចំណេញបានជាង ១០០ លានដុង។ លោកហ្វិញម៉ាក បានយល់ឃើញ៖ “អនុវត្តកម្មវិធីទិសដៅជាតិអំពីការកសាងជនបទថ្មី មាមីងកាន់តែមានស្មារតីក្នុងការរក្សាសន្តិសុខសណ្តាប់ធ្នាប់ អនាម័យបរិស្ថាន បៃ តង-ជ្រះ-ស្អាត ការងាររកស៊ីក៏បានរីកចម្រើនជាងឆ្នាំមុនៗ។ សម្រេចបានលទ្ធផលទាំងនេះ ក៏ដោយសារគោលនយោបាយរបស់បក្ស រដ្ឋ បានជួយឧបត្ថម្ភដល់ជនរួមជាតិ ពិសេសគឺខាងដីធារផ្ទះ លំនៅឋាន ដើមទុន ពូជ បច្ចេកទេសផលិត ដូច្នេះ មាមីងជនរួមជាតិខ្មែរកាន់តែមានជីវភាពធូរធារពីមួយថ្ងៃទៅមួយថ្ងៃ”៕

យោង៖កាសែតកាម៉ាវ- បកប្រែ៖ មុនី

ចែករំលែកអត្ថបទ

ពាក្យគន្លឹះ