មហាសាមគ្គីជនជាតិ គំរូក្នុងសហគមន៍

09/03/2020 - 16:07

ជម្នះការលំបាកឈានឡើងធ្វើមាន

ដោយការខ្នះខ្នែងពលកម្ម ទើបប្តីប្រពន្ធបងស្រីស៊ើងធីសាផា នៅភូមិចុងព្រែក ឃុំវៀងអាង ស្រុកត្រឹងដេ ខេត្តសុកត្រាំង មានការឈានឡើងក្នុងជីវភាព។ ឥឡូវគ្រួសារបងស្រី បានក្លាយជាគ្រួសារធូរធាររបស់ភូមិភាគ។

ប្តីបងស្រីស៊ើងធីសាផា ច្របាច់ទឹកដោះគោដោយម៉ាស៊ីន។

ពេលនិយាយពីការរកស៊ីរបស់បងស្រីសាផា មាមីងនៅភូមិចុងព្រែក អ្នកណាក៏ស្ងើចសរសើរពីស្មារតីជម្នះការលំបាកឈានឡើងធ្វើមានដែរ។ បងស្រីដាវធីហុងញ៉ុង រស់នៅភូមិចុងព្រែក ឱ្យដឹង៖ "តាំងពីដើមមក ប្តីប្រពន្ធបងស្រីផា តែងខិតខំធ្វើការរកស៊ីដោយឥតឈប់ឈរ អស់ពីធ្វើស្រែដល់ដាំដំណាំរួមផ្សំ ចិញ្ចឹមជ្រូកគួបផ្សំនឹងបិតស្រា ចំណែកឥឡូវចិញ្ចឹមគោ។ មួយថ្ងៃៗដល់ពេលព្រលប់ទើបឃើញប្តីប្រពន្ធគាត់នៅផ្ទះ។ ការងារស្រែចម្ការ និងចិញ្ចឹមសត្វគឺប្តីប្រពន្ធគាត់ធ្វើដោយផ្ទាល់ ម្ល៉ោះហើយទើបធ្វើមានយ៉ាងឆាប់រហ័ស"។

ក្រោយពីរៀបការរួច បានម្តាយឪពុកឱ្យស្រែ៤កុង ប្តីប្រពន្ធបងខិតខំធ្វើស្រែ។ ពេលលក់ស្រូវបានប្រាក់ បងស្រីទិញជ្រូកចិញ្ចឹម គួបផ្សំជាមួយនឹងបិតស្រាលក់។ ជាមួយនឹងទិសស្លោក "យកកម្លាំងធ្វើដើមទុន" គាត់ចិញ្ចឹមជ្រូកមេ លុះពេលជ្រូកមេកើតកូនក៏យកកូនលក់។ កូនជ្រូកមានតម្លៃពី១ដល់១,២លានដុងក្នុងមួយក្បាល។ តាមសម្ដីបងស្រីផា រយៈពេល១៤ឆ្នាំប្តីប្រពន្ធគាត់តែងស្រុះចិត្តស្រុះគំនិតគ្នាដើម្បីអភិវឌ្ឍសេដ្ឋកិច្ចគ្រួសារ។ ក្រៅពីនោះ ប្តីប្រពន្ធគាត់នៅទាំងដាំដំណាំរួមផ្សំ៤កុងទៀត ម្ល៉ោះហើយមានប្រាក់ចំណូលជាប្រចាំ។ ប្រាក់ចំណូលពីការធ្វើស្រែ ដាំដំណាំរួមផ្សំ ចិញ្ចឹមជ្រូក និងលក់ស្រា បងស្រីសន្សំទិញដីស្រែ។ បងស្រីផា ឱ្យដឹង៖ "យើងក្រ ហើយរស់នៅតំបន់ជនបទ ម្ល៉ោះហើយប្រភពចំណូលសំខាន់ពីការដាំដុះ និងចិញ្ចឹមសត្វ ហេតុនោះខ្ញុំគិតថា បើចង់ធ្វើមានគឺយើងត្រូវមានដីស្រែច្រើន។ ព្រោះហេតុនោះ ប្តីប្រពន្ធខ្ញុំបានផ្តុំកម្លាំងទៅលើការដាំដំណាំរួមផ្សំ ធ្វើស្រែ និងចិញ្ចឹមសត្វ។ អាស្រ័យជម្នះការលំបាក និងទេវតាអាណិតស្រឡាញ់ ហេតុនោះការធ្វើស្រែ ដាំដំណាំរួមផ្សំ និងចិញ្ចឹមសត្វចេះតែអំណោយផល ទើបមានប្រាក់ទិញដីស្រែ"។ ព្រមជាមួយនឹងការរស់នៅចេះប្រិតសំចៃ និងចេះគិតគូរក្នុងការផលិត ម្ល៉ោះហើយគ្រាន់តែជាង១០ឆ្នាំ គ្រួសារគាត់មានដីស្រែ៣០កុង និងដីដាំដំណាំរួមផ្សំ៤កុង។ ឆ្នាំ២០១២ ពេលចិញ្ចឹមជ្រូកមិនចំណេញទៀត បងស្រីក៏បង្វែរមកចិញ្ចឹមគោទឹកដោះវិញ។ ដើម្បីមិនឱ្យខាតពេល បងស្រីបានវិនិយោគទិញម៉ាស៊ីនកាត់ស្មៅ ម៉ាស៊ីនច្របាច់ទឹកដោះគោ។

បច្ចុប្បន្ន គ្រួសារបងស្រីមានគោ១២ក្បាល ក្នុងនោះ៦ក្បាលកំពុងផ្តល់ទឹកដោះ។ គោមួយក្បាលផ្តល់ទឹកដោះជាមធ្យមប្រមាណពី១៣ដល់១៥គីឡូក្រាមក្នុងមួយថ្ងៃ ហើយក្នុងមួយគីឡូក្រាមមានតម្លៃ១១.៥០០ដុង ក្រោយពីទូទាត់រួចស្រេចនៅចំណេញបានប្រមាណ៤លានដុង/ក្បាល/ខែ។ រកបានប្រាក់ចំណូលលំនឹង ជីវភាពបានលើកកម្ពស់ជាសន្សឹមៗ ម្ល៉ោះហើយ បងស្រីសង់បានផ្ទះមួយខ្នងតម្លៃប្រមាណ៥០០លានដុង៕

យ្វីអាញ់-វិមាន

ចែករំលែកអត្ថបទ

ពាក្យគន្លឹះ