សុខភាព - អប់រំ អប់រំ

20/10/2015 - 15:14

សមណសិស្សរៀនពូកែ

សមណសិស្សយ័ញតុង សាលាមធ្យមសិក្សាបំពេញវិជ្ជាបាលីណាមបូ ទើបតែបានទទួលប័ណ្ណសរសើររបស់គណៈកម្មាធិការប្រជាជន ខេត្តសុកត្រាំង សម្រេចកិត្តិនាមជាសិស្សពូកែទូទាំងប្លុកក្នុង៣ឆ្នាំបន្តបន្ទាប់។

សមណសិស្សយ័ញតុង (ខាងឈ្វេងដៃ) ទទួលប័ណ្ណសរ សើររបស់គណៈកម្មាធិការប្រជាជនខេត្តសុកត្រាំង។

កាន់ប័ណ្ណសរសើរក្នុងព្រះហស្ថសមណសិស្សយ័ញតុង ពិតឲ្យដឹង" រង្វាន់នេះជាកម្លាំងស្មារតីនឹងមានអត្ថន័យដ៏សំខាន់ ដើម្បីជួយឲ្យអាត្មាភាពមានជំហានរឹងមាំជាងទៀតដើម្បីចូលរៀនមហាវិទ្យាល័យ"។ ក្នុងការប្រឡងកម្រិតមធ្យមសិក្សាចំណេះទូទៅថ្នាក់ជាតិ ឆ្នាំ២០១៥ សមណសិស្សយ័ញតុង សម្រេចបាន២២.៥ពិន្ទុនិងជាប់មហាវិទ្យាល័យ ផ្នែកគ្រប់គ្រងពាណិជ្ជកម្មនៃសកលវិទ្យាល័យហិរញ្ញវត្ថុ-ក្រុងហូជីមិញ។ អាយុ១៥ឆ្នាំ (២០០៧) យ័ញតុងបានចូលបួសនៅវត្តកោះធំ ឃុំនិញថាញ់ឡើយ ស្រុកហុងយ៉ឹង ខេត្តបាកលីវ។ បួសបានមួយវស្សា សមណសិស្សយ័ញតុង បានដឹងដំណឹងថាសាលាមធ្យមសិក្សាបំពេញវិជ្ជាបាលីណាមបូជម្រើសសិស្ស ជាមួយនឹងលក្ខណៈត្រូវចប់កម្រិតថ្នាក់បាលីរង ហេតុដូច្នោះ សមណសិស្សយ័ញតុង បានខិតខំប្រឹងប្រែងសិក្សាធម៌ អាថ៌ វិន័យ បាលី ខ្មែរ។ ក្រោយពីរៀនបញ្ចប់ថ្នាក់បាលីរង សមណសិស្សយ័ញតុង បានជម្រើសចូលរៀនសាលាមធ្យមសិក្សាបំពេញវិជ្ជាបាលីណាមបូ ក្នុងរយៈកាលរៀនមធ្យមសិក្សាមូលដ្ឋាន ព្រះអង្គតែងសម្រេចកិត្តិនាមជាសមណសិស្សពូកែរបស់សាលាជានិច្ច។ សមណសិស្សយ័ញតុង ពិតឲ្យដឹង៖ "រៀននៅសាលានេះ អាត្មាភាពតែងបានទទួលរបបគោលនយោបាយរបស់រដ្ឋមានដូច៖ មិនចាំបាច់បង់ថ្លៃសាលា១០០% បានជំនួយប្រាក់សៀវភៅប៊ិក សៀវភៅពុម្ព ហើយបើសិនរៀនពូកែនឹងបានទទួលអាហារូបករណ៍ ព្រមទាំងបានរៀបចំទីស្នាក់អាស្រ័យសម្រាប់គង់នៅ និងផ្គត់ផ្គង់ចង្ហាន់ទៀតផង។ល។ ចំណែករៀន ពេលយប់ដោយអង្គឯងគឺមានលោកគ្រូ អ្នកគ្រូណែនាំ ប្រសិនបើមានចំណុចណាមិនយល់អាត្មាភាពសួរភ្លាម"។

តាំងពីកុមារភាពយ័ញតុង មានបំណងចង់រៀនមហាវិទ្យាល័យហើយ ប៉ុន្តែដោយជីវភាពគ្រួសារជួបការលំបាក ម៉្លោះហើយរៀនបានត្រឹមថ្នាក់ទី៦ក៏ឈប់ពាក់កណ្តាលការ ហេតុនោះ នៅពេលបានចូលរៀនសាលាដែលមានលក្ខណសម្បត្តិរៀនសូត្រត្រឹមត្រូវ សមណសិស្សយ័ញតុង ក៏ខិតខំព្យាយាមរៀនឲ្យបានពូកែ ដើម្បីសម្រេចបំណងរបស់ព្រះអង្គ។ " ជាច្រើនឆ្នាំរៀននៅសាលា ក្រៅពីការខិតខំប្រឹងប្រែងទទួលយកចំណេះដឹងក្នុងសាលា អាត្មាភាពនៅទាំងស្វែងរកសៀវភៅសិក្សាដើម្បីធ្វើលំហាត់ និងស្វែងរកអត្ថបទតែងសេចក្តីល្អៗសម្រាប់អានបន្ថែម។ ជាពិសេស អាត្មាតែងឧស្សាហ៍ចូលប្រព័ន្ធអ៊ិនធើណែត ដើម្បីស្វែងរកវិធីសាស្រ្តពន្យល់មេរៀនល្អៗ ហើយតែងបានលោកគ្រូ អ្នកគ្រូដែលមានបទពិសោធន៍ពន្យល់មេរៀនឲ្យតម្លៃខ្ពស់។ ចំណែកពេលរៀនដោយអង្គឯង គឺបានបង្កើតជាក្រុមដើម្បីរួមគ្នារកវិធីសាស្រ្តល្អៗ សម្រាប់ពន្យល់មេរៀន ប្រសិនបើមេរៀនណាមិនយល់ ពឹងលោកគ្រូ អ្នកគ្រូ ពន្យល់បន្ថែម" សមណសិស្សយ័ញតុង បានចែករំលែកររៀបរៀនដូច្នោះ។ អាស្រ័យហេតុនោះ ពិន្ទុមធ្យមភាគរបស់សមណសិស្សយ័ញតុង តែងសម្រេចពី៨,៥ឡើងទៅជានិច្ច។

តាមប្រសាសន៍លោកលីថាញ់ហឹង នាយកសាលាមធ្យមសិក្សាបំពេញវិជ្ជាបាលីណាមបូ សាលាតែងអនុវត្តបានត្រឹមត្រូវនូវគោលនយោបាយ ប្រគេនដល់សមណសិស្សគ្រប់អង្គតាមសេចក្តីកំណត់របស់រដ្ឋ ដើម្បីបង្កលក្ខណសម្បត្តិល្អបំផុតសម្រាប់សមណសិស្សរៀនសូត្រ។ ចំពោះលទ្ធផលនៃការរៀនសូត្ររបស់សមណសិស្សយ័ញតុង គឺជាគំរូល្អសម្រាប់សមណសិស្សទាំងឡាយរបស់សាលារៀនសូត្រតាម៕

លីធាន -សុផល

ចែករំលែកអត្ថបទ

ពាក្យគន្លឹះ