ព្រឹត្តិការណ៍ - នយោបាយ ព្រឹត្តិការណ៍

29/08/2026 - 15:59

ត្រួតពិនិត្យកម្មវិធីបើកមហាសន្និបាតកីឡាអប់រំកាយទីក្រុងកឹងធើលើកទី X

(អ.ឡ) ពិធីត្រួតពិនិត្យបានអនុវត្តយ៉ាងពេញលេញនូវខ្លឹមសារទាំងអស់នៃកម្មវិធីជាផ្លូវការ ចាប់ពីផ្នែកសម្តែងសិល្បៈបើកឆាក ក្បួនដង្ហែបង្ហាញកងកម្លាំង ពិធីដង្ហែនិងអុជចន្លុះកីឡា រហូតដល់ពិធីបើកឆាកនិងកម្មវិធីសិល្បៈក្រោមប្រធានបទ “កឹងធើឈានឡើងកម្រិតថ្មី”។

កាលពីយប់ថ្ងៃទី២៨ ខែសីហា នៅកីឡាដ្ឋានកឹងធើ គណៈចាត់តាំងបានដំណើរការត្រួតពិនិត្យទូទៅពិធីបើកមហាសន្និបាតកីឡាអប់រំកាយទីក្រុងកឹងធើលើកទីX ឆ្នាំ២០២៦ ផ្សារភ្ជាប់នឹងកម្មវិធីសិល្បៈអបអរសាទរអនុស្សាវរីយ៍៨១ឆ្នាំ បដិវត្តន៍ខែសីហាទទួលបានជោគជ័យនិងទិវាបុណ្យជាតិ ២កញ្ញា។

ឈុតសម្តែងសិល្បៈបើកឆាកកម្មវិធី។

បើកឆាកកម្មវិធីគឺផ្នែកសិល្បៈ“មាតុភូមិយើងទង់បក់រវិច”សម្តែងបង្ហាញឡើងវិញនូវបរិយាកាសដ៏អង់អាចក្លាហាននៃសរទៈរដូវប្រវតិ្តសាស្ត្រ ឆ្នាំ១៩៤៥ រំលឹកឡើងព្រឹត្តិការសំខាន់ៗនៃបដិវត្តន៍ខែសីហាបានជោគជ័យនិងការបង្កើតប្រទេសវៀតណាមសាធារណរដ្ឋប្រជាធិបតេយ្យ។

បណ្តាឈុតសម្តែងបាឌិញថ្ងៃក្តៅ មាតុភូមិយើងទង់បក់រវច បានរៀបចំដំឡើងដោយមានការចូលរួមពីកងកម្លាំងអ្នកចម្រៀង នាដករ នាដកា កុមារនិងនិស្សិត បង្កបរិយាកាសដ៏ឱឡារិក អង់អាចក្លាហានអបអរសាទរអនុស្សាវរីយ៍ទិវាបុណ្យជាតិ ២កញ្ញា។

ក្បួនដង្ហែទង់ជាតិមកកាន់វេទិកា។

ក្បួនដង្ហែទង់កីឡា។

ក្បួនដង្ហែគ្រែស្នែងឆាយាលក្ខណ៍លោកប្រធានហូជីមិញ។

ក្បួនដង្ហែផែនទង់ក្រហម។

ខ្លឹមសារមួយក្នុងចំណោមខ្លឹមសារសំខាន់ៗនៃពិធីត្រួតពិនិត្យគឺជាផ្នែកក្បួនដង្ហែរបស់ក្រុមប្រតិភូកីឡាដែលអញ្ជើញចូលរួមមហាសន្និបាតកីឡា។ បណ្តាក្រុមប្រតិភូតំណាងឱ្យកងកម្លាំងនគរបាលទីក្រុង គណៈបញ្ជាការយោធាទីក្រុង ផ្នែកអប់រំនិងបណ្តុះបណ្តាល ព្រមទាំងបណ្តុំអង្គភាពឃុំ សង្កាត់បានដង្ហែក្បួនឆ្លងកាត់វេទិកាជាបន្តបន្ទាប់។ផ្នែកក្បួនដង្ហែក៏មានផែនទង់ជាតិ ផែនទង់កីឡា ផែនគ្រែស្នែងឆាយាលក្ខណ៍លោកប្រធានហូជីមិញ ផែនទង់ក្រហមនិងក្រុមប្រតិភូអាជ្ញាកណ្តាល។

ក្រុមក្បួនដង្ហែនៃនគរបាលទីក្រុង។

ក្រុមក្បួនដង្ហែនៃគណៈបញ្ជាការយោធាទីក្រុង។

ពិធីដង្ហែនិងអុជ“គុបភ្លើងពិសិដ្ឋឈានឡើងកម្រិតថ្មី”ក៏បានត្រួតពិនិត្យ។ យោងតាមសេណារីយូ គុបចន្លុះបានទទួលពីមណ្ឌលបូជនីយដ្ឋានក្សត្រហ៊ុងទីក្រុងកឹងធើ ដង្ហែឆ្លងកាត់ទីតាំងប្រកបដោយអត្ថន័យប្រវតិ្តសាស្ត្រមុនពេលត្រឡប់មកកីឡាដ្ឋានកឹងធើ ដើម្បីអនុវត្តពិធីអុជចន្លុះ បើកឆាកទិវាប្រកួតកីឡាដ៏ធំរបស់ទីក្រុង។

កីឡាករ កីឡាការិនីឆ្នើម ទទួលគុបចន្លុះដង្ហែមកកាន់វេទិកា។

បន្ទាប់ពីពិធីបើក កម្មវិធីសិល្បៈ“កឹងធើឈានឡើងកម្រិតថ្មី” បានបន្តជាមួយឈុតសម្តែងសិល្បៈច្រៀងរាំបង្ហាញពីស្មារតីកីឡា កម្លាំងយុវវ័យ ក្តីទំនុកចិត្តនិងបំណងប្រាថ្នាអភិវឌ្ឍរបស់ទីក្រុង។

កម្មវិធីសិល្បៈក៏មានការចូលរួមពីអ្នកចម្រៀងល្បីៗជាច្រើនដែលបានទស្សនិកជនស្រឡាញ់ចូលចិត្ត ដូចជា៖ Isaac វ៉ហាត្រឹម ង្វៀងវ៉ូវ ថាញង៉ុក រួមជាមួយអ្នកចម្រៀងមិញសាង ដាមធូធ្វីនិងrapperមិញហី។ សិល្បកររួមជាមួយអ្នកសម្តែងរាប់រយនាក់ និស្សិត កុមារនិងកងកម្លាំងសម្តែងនាំមកនូវឈុតសម្តែងយ៉ាងពុះពោរ ពោរពេញដោយចំណាប់អារម្មណ៍ បង្ហាញពីស្មារតីស្នេហាមាតុភូមិ ប្រទេសជាតិ ស្មារតីកីឡានិងបំណងប្រាថ្នាឈានឡើងរបស់ទីក្រុងកឹងធើ។

ឈុតសម្តែងមួយដ៏ពុះពោរពីថាមពលរបស់ទីក្រុងនៅក្បែរទន្លេហូវយ៉ាង។

ឈុតសម្តែងសិល្បៈបញ្ចប់កម្មវិធី។

តាមរយៈពិធីត្រួតពិនិត្យទូទៅ បណ្តាកងកម្លាំងបន្តពិនិត្យឡើងវិញនូវកងជួរ ទីតាំងសម្តែង រយៈពេលនៃខ្លឹមសារនីមួយៗ កិច្ចសហការរវាងផ្នែកនីមួយៗ ដើម្បីធ្វើឱ្យសុក្រឹតនៅវគ្គចុងក្រោយ ធានាពិធីបើកមហាសន្និបាតកីឡាអប់រំកាយទីក្រុងកឹងធើ លើកទីX ឆ្នាំ២០២៦ ប្រព្រឹត្តទៅយ៉ាងឱឡារិក សុវត្ថិភាពនិងបន្សល់នូវចំណាប់អារម្មណ៍។

ពិធីបើកឆាកប្រព្រឹត្តទៅជាផ្លូវការ នៅវេលាម៉ោង២០ ថ្ងៃទី២៩ ខែសីហា នៅកីឡាដ្ឋានកឹងធើ ផ្សាយផ្ទាល់លើប៉ុស្តិ៍កាសែតនិងវិទ្យុ ទូរទស្សន៍កឹងធើ៕

ង៉ុកមិញ-មុនី

ចែករំលែកអត្ថបទ

ពាក្យគន្លឹះ