សុខភាព - អប់រំ សុខភាព

01/08/2026 - 20:41

យុវជនសង្កាត់វិញចូវព្រួតដៃថែទាំសុខភាពសហគមន៍

នាព្រឹកថ្ងៃទី ០១ ខែសីហា ឆ្នាំ ២០២៦ សម្ព័ន្ធយុវជនសង្កាត់វិញចូវ បានសកម្មចូលរួមកម្មវិធីពិនិត្យ ពិគ្រោះសុខភាព និងផ្តល់ថ្នាំដោយឥតគិតថ្លៃ ដែលរៀបចំឡើងដោយគណៈកម្មាធិការរណសិរ្សមាតុភូមិវៀតណាមសង្កាត់វិញចូវ និងគណៈកម្មាធិការប្រជាជនសង្កាត់វិញចូវ សហការជាមួយសមាគមគាំពារអ្នកជំងឺក្រីក្រក្រុងកឹងធើ ចាត់តាំងឡើងសម្រាប់គ្រួសារក្រីក្រ គ្រួសារក្បែរក្រ គ្រួសារគោលនយោបាយ អ្នកវ័យចាស់ អ្នកពិការនិងមុខសញ្ញាដែលមានស្ថានភាពលំបាកនៅលើភូមិឋាន។

រូបភាពសម្ព័ន្ធយុវជន ចូលរួមជួយប្រជាជនពិនិត្យនិងព្យាបាលជម្ងឺ។

ចាប់តាំងពីព្រឹកព្រលឹម បរិយាកាសនៅមណ្ឌលពិនិត្យជំងឺនៃសង្កាត់វិញចូវ មានសភាពយ៉ាងកុះករ។ ប្រជាជនរាប់រយនាក់ ដែលភាគច្រើនជាអ្នកវ័យចាស់ អ្នកដែលមានស្ថានភាពលំបាក និងជនជាតិភាគតិចនៅលើភូមិឋាន បានមានវត្តមានដើម្បីរង់ចាំដល់វេនពិនិត្យជំងឺ។ រួមជាមួយក្រុមគ្រូពេទ្យដែលកំពុងរវល់ជាមួយឧបករណ៍វេជ្ជសាស្ត្រ រូបភាពដែលលេចធ្លោ និងនាំមកនូវអារម្មណ៍កក់ក្តៅបំផុតនោះគឺ ពណ៌អាវខៀវរបស់កងកម្លាំងសម្ព័ន្ធយុវជន សង្កាត់វិញចូវ។ ពួកគេបានពង្រឹងនូវស្មារតីស្ម័គ្រចិត្ត និងការទទួលខុសត្រូវចំពោះសហគមន៍ ឆ្លងតាមរយៈសកម្មភាពគាំទ្រជាក់ស្តែងជាច្រើន។ ចាប់តាំងពីការណែនាំប្រជាជនធ្វើនីតិវិធីចុះឈ្មោះ បំពេញព័ត៌មានផ្ទាល់ខ្លួន រហូតដល់ការរៀបចំរង់ចាំពិនិត្យ ទាំងអស់គឺបានយុវជនអនុវត្តយ៉ាងរលូន។ ជាពិសេស ចំពោះលោកយាយលោកតាដែលពិបាកធ្វើដំណើរអ្នកពិការ ឬអ្នកទន់ខ្សោយ សមាជិកសម្ព័ន្ធយុវជនមិនអល់អែកក្នុងការជួយគ្រា រុញរទេះរុញ និងជំនួយផ្លាស់ទីដោយអស់ពីចិត្តទៅតាមតុពិនិត្យឯកទេសនីមួយៗ។ ភាពសកម្មរហ័សរហួននេះ បានរួមចំណែកយ៉ាងធំជួយឱ្យកម្មវិធីប្រព្រឹត្តទៅដោយរៀបរយ សុវត្ថិភាព និងលើកកម្ពស់ប្រសិទ្ធភាពពិនិត្យ និងព្យាបាលជំងឺ។

និយាយអំពីស្មារតីអស់ពីចិត្តរបស់យុវជននៅភូមិភាគ សមមិត្ត ឡឹម ធីង៉ុកហឹង – លេខាសម្ព័ន្ធយុវជនសង្កាត់វិញចូវ បានឱ្យដឹង៖ “ថ្ងៃនេះ សហការជាមួយក្រុមគ្រូពេទ្យ សម្ព័ន្ធយុវជនសង្កាត់វិញចូវបានចេញយុទ្ធនាការជំនួយកងកម្លាំងចូលរួមណែនាំប្រជាជនចុះឈ្មោះពិនិត្យ រៀបចំជួរ ជំនួយអ្នកជំងឺ អ្នកវ័យចាស់ ទៅកាន់កន្លែងពិនិត្យជំងឺ និងទទួលថ្នាំដោយឥតគិតថ្លៃ”។

សង្កាត់វិញចូវ គឺជាភូមិភាគមួយដែលមានជនរួមជាតិខ្មែររស់នៅកុះករ ម៉្លោះហើយការពន្យល់ និងបកប្រែក្នុងដំណើរការពិនិត្យជំងឺ ក៏ជួបការលំបាកច្រើនដែរ ដោយសារអ៊ំំពូមីងអាយុច្រើនមិនសូវយល់ភាសាវៀតណាម។ ដោយក្តាប់បាននូវ “ចំណុចរាំងស្ទះ” នេះ សមាជិកសម្ព័ន្ធយុវជនដែលជាជនជាតិខ្មែរនៅក្នុងភូមិភាគ បានពង្រីកគុណសម្បត្តិរបស់ខ្លួន ក្លាយជាអ្នកបកប្រែដោយចៃដន្យ ប៉ុន្តែបានក្លាយជាដៃស្តាំក្នុងការជំនួយបកប្រែភាសាវៀត – ខ្មែរ។ ពួកគាត់បានអត់ធ្មត់ឈរនៅជិតតុពិនិត្យ ស្តាប់យ៉ាងយកចិត្តទុកដាក់នូវសំណួរជំនាញពីគ្រូពេទ្យ រួចប្រើប្រាស់ភាសាកំណើតយ៉ាងសាមញ្ញ ជិតស្និទ្ធ ដើម្បីពន្យល់បន្តជូនមាមីង។ ផ្ទុយទៅវិញ ការឈឺចាប់ និងរោគសញ្ញាទាំងឡាយដែលអ្នកវ័យចាស់ពិពណ៌នាជាភាសាខ្មែរ ក៏បានយុវជនបកប្រែត្រឡប់ទៅវិញយ៉ាងរលូន និងច្បាស់លាស់ ជួយឱ្យគ្រូពេទ្យងាយស្រួលក្តាប់បានព័ត៌មាន។ ចែករំលែកអំពីការងារដែលមានន័យនេះ សមមិត្ត យឿង កែវយ៉ា – លេខាសាខាសម្ព័ន្ធយុវជនមណ្ឌលដាយបាយ សង្កាត់វិញចូវ បានឱ្យដឹងដោយរីករាយ៖ “បានចូលរួមជួយប្រជាជន ខ្ញុំមានអារម្មណ៍សប្បាយរីករាយ និងមានកិត្តិយសណាស់ដែលបានជួយមាមីងបកប្រែភាសាខ្មែរជាមួយក្រុមគ្រូពេទ្យដែលចូលរួមពិនិត្យជំងឺ”។

វត្តមាននិងជំនួយទាន់ពេលវេលានៃកងកម្លាំងសម្ព័ន្ធយុវជន មិនត្រឹមតែជួយក្រុមគ្រូពេទ្យពន្លឿនល្បឿនការងារប៉ុណ្ណោះទេ ប៉ុន្តែអ្វីដែលសំខាន់ជាងនេះទៅទៀតនោះ គឺបាននាំមកនូវអារម្មណ៍កក់ក្តៅ និងទំនុកចិត្តដាច់ខាតសម្រាប់ប្រជាជនដែលមកពិនិត្យជំងឺ។ អ្នកមីង ថាច់ ធីចន្ថា នៅសង្កាត់វិញចូវ បានឱ្យដឹង៖ “ខ្ញុំមិនសូវស្ទាត់ភាសាវៀតណាមទេ ពេលគ្រូពេទ្យនិយាយ ខ្ញុំយល់មិនអស់ឡើយ ប៉ុន្តែនៅពេលបានក្មួយៗសមាជិកយុវជនជួយបកប្រែជាភាសាខ្មែរ ខ្ញុំសប្បាយចិត្តណាស់ ព្រោះបានយល់ច្បាស់ពីស្ថានភាពសុខភាពរបស់ខ្លួន”។

តាមរយៈសកម្មភាពដ៏មានអត្ថន័យនេះ យុវជនសង្កាត់វិញចូវ បន្តអះអាងពីតួនាទីស្នូល ស្ម័គ្រចិត្ត តែងតែឈានមុខ និងរួមដំណើរជាមួយរដ្ឋអំណាចភូមិភាគក្នុងសកម្មភាពដើម្បីជីវភាពសហគមន៍។ ការចូលរួមយ៉ាងសកម្មរបស់សម្ព័ន្ធយុវជន មិនត្រឹមតែរួមចំណែកផ្ទាល់ដល់ភាពជោគជ័យនៃព្រឹត្តិការណ៍សុខាភិបាលប៉ុណ្ណោះទេ ប៉ុន្តែថែមទាំងផ្សព្វផ្សាយសារយ៉ាងខ្លាំងក្លាអំពីស្មារតីសាមគ្គីជនជាតិ អំពីមនោសញ្ចេតនាស្រឡាញ់មនុស្សជាតិ និងការទទួលខុសត្រូវរបស់យុវជនក្នុងយុគសម័យថ្មី៕

ថាញ់ហុង - វ៉ាន់តឹន

ចែករំលែកអត្ថបទ

ពាក្យគន្លឹះ