ព្រឹត្តិការណ៍ - នយោបាយ ព្រឹត្តិការណ៍

18/05/2026 - 10:21

នារីកឹងធើធ្វើតាមបណ្តាំរបស់អ៊ំ

ដើម្បីអបអរសាទរខួបអនុស្សាវរីយ៍លើកទី ១៣៦ឆ្នាំ ទិវាបុណ្យខួបកំណើតលោកប្រធានហូជីមិញ (ថ្ងៃទី១៩ ខែឧសភា) សមាគមសហព័ន្ធនារីគ្រប់លំដាប់ថ្នាក់នៅទីក្រុងកឹងធើ បាននិងកំពុងធ្វើឱ្យជាក់ស្តែងនូវការរៀនសូត្រ និងធ្វើតាមគំរូរបស់អ៊ំ តាមរយៈសកម្មភាពជាក់ស្តែងនានាក្នុងជីវភាពប្រចាំថ្ងៃ។ តាមរយៈបណ្តាទម្រង់ និងការងារដ៏មានអត្ថន័យ សតិអារម្មណ៍ សីលធម៌ និងឥរិយាបថរបស់អ៊ំកាន់តែជិតដិត និងបង្កការរីកសាយភាយយ៉ាងខ្លាំងក្លាក្នុងសហគមន៍ និងក្នុងចំណោមសមាជិកានារី។

តំណាងសមាគមសហព័ន្ធនារីឃុំវីថាញ១ រួមជាមួយសប្បុរសជន ឧបត្ថម្ភថវិកា ១០ លានដុង ជូនគ្រួសារបងស្រី ង្វៀងធីគីមស្វៀង (ទី២ ពីស្តាំ)។

សមាគមសហព័ន្ធនារីឃុំកើ-ដ បានបង្ហាញទម្រង់ "ចង្រ្កានបាយមេត្តាធម៌" នៅមន្ទីរពេទ្យយោធានិងប្រជាជន ដោយមាន ១០ ក្រុមដាំស្លផ្លាស់វេនគ្នា។ ជារៀងរាល់ថ្ងៃ ចង្រ្កានបាយនេះបម្រើអាហារពី ១៥០ ដល់ ២០០ ចំណែកដោយឥតគិតថ្លៃ។ ក្នុងនោះ ពេលព្រឹកមានចែកបបរ ពេលថ្ងៃត្រង់មានចែកបាយជូនដល់អ្នកជំងឺ និងប្រជាជនដែលមានជីវភាពលំបាក។ លោកស្រី លីធីញាញ់ ប្រធានសមាគមសហព័ន្ធនារីឃុំកើ-ដ បានឱ្យដឹង៖ "ទម្រង់នេះមានអត្ថន័យជាក់ស្តែងណាស់។ យើងខ្ញុំរៀនសូត្រតាមគំរូរបស់អ៊ំ ថែទាំនិងគិតគូរដល់ជីវភាពរស់នៅរបស់ប្រជាជនដោយប្រការដ៏សាមញ្ញ និងជិតដិតបំផុត"។

នៅឃុំវិញវៀង សមាគមសហព័ន្ធនារីឃុំ បានសហការជាមួយមណ្ឌលសុខាភិបាលឃុំ បានបង្ហាញទម្រង់ "ចលនាគូប្តីប្រពន្ធសម្រាលកូនឱ្យបានគ្រប់ ២ នាក់ មុនអាយុ ៣០ ឆ្នាំ"។ អនុវត្តទម្រង់នេះ កម្មាភិបាលទាំងឡាយបានជម្រុញការផ្សព្វផ្សាយអំពីសុខភាពបន្តពូជ បំណិនធ្វើជាមាតាបិតា អប់រំមុនអាពាហ៍ពិពាហ៍ បង្ការនិងទប់ស្កាត់អំពើហិង្សាក្នុងគ្រួសារ និងអំពើហិង្សាលើកុមារ...។ តាមរយៈនោះ ជួយឱ្យនារីមានភាពម្ចាស់ការជាងក្នុងការថែទាំខ្លួន និងកសាងគ្រួសារសុភមង្គល។ ទន្ទឹមនឹងនោះ សមាគមសហព័ន្ធនារីឃុំ ក៏បានចាត់តាំងប្រគល់អំណោយចំនួន ៨០ ចំណែក ដែលមានតម្លៃសរុប ២៤ លានដុង ជូនដល់សមាជិកា និងនារីដែលមានជីវភាពលំបាក។

លោកស្រី ដងធីគីមគ្វៀន ប្រធានសមាគមសហព័ន្ធនារីឃុំវិញវៀង បានចែករំលែក៖ "តាមរយៈការអនុវត្តទម្រង់នេះ យើងខ្ញុំមិនត្រឹមតែសំដៅអនុវត្តគោលនយោបាយប្រជាសាស្ត្រប៉ុណ្ណោះទេ ថែមទាំងឆ្ពោះទៅរកគោលដៅដ៏វែងឆ្ងាយជាងនេះទៀតផង។ រៀនសូត្រតាមអ៊ំ យើងខ្ញុំយកចិត្តទុកដាក់ថែទាំនិងគិតគូរដល់ជីវភាពរបស់សមាជិកានារី និងប្រជាជន ដោយប្រការជាក់ស្តែងបំផុត។ នៅពេលគ្រួសារនីមួយៗមានសុភមង្គល ទើបសង្គមអាចរីកចម្រើនប្រកបដោយចីរភាព"។

សមាគមសហព័ន្ធនារីឃុំវីថាញ់១ បានសហការជាមួយគណៈកម្មាធិការរណសិរ្សមាតុភូមិវៀតណាមឃុំ ប្រគល់ថវិកាពីមូលនិធិ "ធៀនតឹម" ដើម្បីឧបត្ថម្ភដល់គ្រួសារក្រីក្រចំនួន ២ គ្រួសារ ទឹកប្រាក់សរុប ២០ លានដុង។ បងស្រី ង្វៀងធីគីមស្វៀង នៅភូមិ ៤A បានសម្តែងការត្រេកអរ៖ "នាងខ្ញុំសប្បាយចិត្តណាស់ដែលទទួលបានការឧបត្ថម្ភថវិកា ១០ លានដុង។ អាស្រ័យហេតុនេះ គ្រួសារនាងខ្ញុំមានលក្ខខណ្ឌបន្ថែមទៀតដើម្បីដោះស្រាយជីវភាព និងបន្តចិញ្ចឹមកូនៗទាំង ៤ នាក់ឱ្យបានទៅរៀនសូត្រ"។

លោកស្រី ទ្រឿងងុកមិញ ប្រធានសមាគមសហព័ន្ធនារីឃុំវីថាញ់១ បានឱ្យដឹងបន្ថែម៖ "នាពេលខាងមុខ ក្នុងឱកាសទិវាខួបកំណើតអ៊ំ សមាគមសហព័ន្ធនារីឃុំនឹងចលនាក្នុងសង្គម ចាត់តាំងបង្ហាញទម្រង់ "ល្វែងទំនិញសូន្យដុង" ដើម្បីឧបត្ថម្ភសមាជិកា និងនារីដែលមានស្ថានភាពលំបាក។ នេះជាសកម្មភាពសុខុមាលភាពសង្គម ពង្រីកស្មារតី "ជួយគ្នាទៅវិញទៅមក" និង "ជួយគ្នាក្នុងគ្រាក្រ" របស់សមាគមសហព័ន្ធនារីឃុំ។ ទន្ទឹមនឹងនោះ សមាគមនឹងបង្ហាញទម្រង់ "៥ គ្មាន ៣ ស្អាត ៣ សុខសាន្ត" នៅភូមិចំនួន ២"។

ដោយសកម្មភាពជាក់ស្តែងនិងមានអត្ថន័យដើម្បីសហគមន៍នារីកឹងធើបានថ្វាយជូនលោកអ៊ំនូវ "បាច់ផ្កា" ដ៏ស្រស់បំព្រងបំផុត។ ប្រការនេះមិនត្រឹមតែអំណះអំណាងពីទឹកចិត្តមេត្តាធម៌ប៉ុណ្ណោះទេ ថែមទាំងបានគូសបង្ហាញយ៉ាងច្បាស់នូវរូបភាពរបស់នារីសម័យទំនើប មានទឹកចិត្តសប្បុរស ទទួលខុសត្រូវ ស្វាហាប់ និងតែងតែខិតខំប្រឹងប្រែងដើម្បីសហគមន៍៕

កាវអ្វាញ់ - ចន្ថា

ចែករំលែកអត្ថបទ

ពាក្យគន្លឹះ