ការអនុវត្តទម្រង់រដ្ឋអំណាចភូមិភាគ ២ ថ្នាក់ នៅទីក្រុងកឹងធើ ជំហានដំបូងបានកត់សម្គាល់មានលទ្ធផលវិជ្ជមានជាច្រើន រួមចំណែកធ្វើឱ្យប្រសើរការគ្រប់គ្រងនិងដឹកនាំ ព្រមទាំងបង្កើនគុណភាពនៃការបម្រើប្រជាជន។ ទោះជាយ៉ាងណា រដ្ឋអំណាចគ្រប់លំដាប់ថ្នាក់ ពិសេសគឺថ្នាក់ឃុំ នៅតែប្រឈមនឹងការលំបាកមួយចំនួន ដូចជា មូលដ្ឋានសម្ភារ ការខ្វះបុគ្គលិកនិងបញ្ហាផ្សេងៗ ដែលត្រូវការដំណោះស្រាយឱ្យបានឆាប់រហ័ស។
ដំណើរការរលូន និងមានប្រសិទ្ធភាព
តាមរបាយការណ៍របស់គណៈកម្មាធិការប្រជាជនទីក្រុងកឹងធើ មុនពេលរៀបចំស្ថាប័នឡើងវិញ ទីក្រុងមានស្ថាប័នជំនាញថ្នាក់ខេត្តចំនួន ៣៩ មជ្ឈមណ្ឌលបម្រើសេវារដ្ឋបាលរដ្ឋចំនួន ៣ និងអង្គភាពបម្រើបុព្វហេតុរដ្ឋចំនួន ១.៤៧៥។ បច្ចុប្បន្ន ទីក្រុងនៅសល់ស្ថាប័នជំនាញចំនួន ១៤ មជ្ឈមណ្ឌលបម្រើសេវារដ្ឋបាលរដ្ឋថ្នាក់ទីក្រុងចំនួន ១ មជ្ឈមណ្ឌលបម្រើសេវារដ្ឋបាលរដ្ឋថ្នាក់ឃុំចំនួន ១០៣ និងអង្គភាពបម្រើបុព្វហេតុរដ្ឋចំនួន ១.៤៩៤ (រួមមាន អង្គភាពថ្នាក់ទីក្រុងចំនួន ២៣៨ និងអង្គភាពថ្នាក់ឃុំចំនួន ១.២៥៦)។ បន្ទាប់ពីការរៀបចំឡើងវិញ ចំណុចកណ្ដាលមួយចំនួនត្រូវបានកាត់បន្ថយ កាត់បន្ថយចំនួនកម្មាភិបាលកាន់តំណែងដឹកនាំនិងគ្រប់គ្រង ខណៈការទទួលនិងដោះស្រាយនីតិវិធីរដ្ឋបាលធានាដំណើរការយ៉ាងរលូន និងមានប្រសិទ្ធភាព។
.webp "ការអនុវត្តរដ្ឋអំណាចភូមិភាគ ២ ថ្នាក់៖ ទោះនៅលំបាក ប៉ុន្តែបានបង្រួមនិងមានប្រសិទ្ធភាព")
ទីក្រុងកឹងធើ កំពុងផ្តោតលើការវិនិយោគហេដ្ឋារចនាសម្ព័ន្ធឌីជីថល ដើម្បីធានាដំណើរការរដ្ឋបាលភូមិភាគ ២ ថ្នាក់ ប្រព្រឹត្តទៅដោយរលូននិងមានប្រសិទ្ធភាព។ រូបថត៖ ប្រជាជនកំពុងអនុវត្តនីតិវិធីរដ្ឋបាលនៅមជ្ឈមណ្ឌលបម្រើសេវារដ្ឋបាលរដ្ឋទីក្រុងកឹងធើ។
តាមប្រសាសន៍លោក ប៊ូយហ្វាងលីម នាយករងមន្ទីរមហាផ្ទៃទីក្រុងកឹងធើ ប្រព័ន្ធព័ត៌មានសម្រាប់ដោះស្រាយនីតិវិធីរដ្ឋបាលរបស់ទីក្រុង បានដំណើរការមានស្ថិរភាព ធានាការទទួលនិងដោះស្រាយសំណុំឯកសាររបស់ប្រជាជនបានយ៉ាងល្អ។ ការរួមបញ្ចូលនិងតភ្ជាប់ប្រព័ន្ធព័ត៌មានដោះស្រាយនីតិវិធីរដ្ឋបាល ជាមួយច្រកទ្វារសេវារដ្ឋថ្នាក់ជាតិបានអនុវត្តព្រមៗគ្នា។ ជាលទ្ធផល នីតិវិធីរដ្ឋបាលទាំងអស់ដែលមានលក្ខខណ្ឌគ្រប់គ្រាន់ បានផ្តល់ជាសេវារដ្ឋតាមប្រព័ន្ធអនឡាញ។ អត្រាឯកសារអនឡាញ គិតត្រឹមខែមេសា ឆ្នាំ២០២៦ សម្រេចបាន ៩៣,៧៣%; ខណៈអត្រាឌីជីថលូបនីយកម្មឯកសារ លទ្ធផលដោះស្រាយនីតិវិធីរដ្ឋបាល និងការផ្តល់លទ្ធផលអេឡិចត្រូនិក សម្រេចបាន ៩៥,១២% (ភាគកម្រិតទាំងនេះសុទ្ធតែកើនឡើង បើប្រៀបធៀបនឹងមុនពេលរៀបចំអង្គភាពរដ្ឋបាលថ្នាក់ខេត្ត និងថ្នាក់ឃុំឡើងវិញ)។ កម្រិតពេញចិត្តអំពីគុណភាពបម្រើប្រជាជននិងអាជីវកម្មក្នុងការអនុវត្តនីតិវិធីរដ្ឋបាល សម្រេចបាន ៩៥,៥៧% លើសភាគកម្រិតដែលរដ្ឋាភិបាលបានប្រគល់។
លោកង៉ោអាញ់តិន នាយកមន្ទីរវិទ្យាសាស្ត្រនិងបច្ចេកវិទ្យាទីក្រុងកឹងធើ ឱ្យដឹង៖ “មន្ទីរបានធ្វើសេនាធិការជូនគណៈកម្មាធិការប្រជាជនទីក្រុងវិនិយោគហេដ្ឋារចនាសម្ព័ន្ធបច្ចេកវិទ្យាព័ត៌មាន និងបន្តកែលម្អជាបន្តបន្ទាប់ ដើម្បីធានាដំណើរការមានប្រសិទ្ធភាពនិងរលូនបណ្តាប្រព័ន្ធព័ត៌មានចង្អុលការនិងដឹកនាំ ចាប់ពីថ្នាក់ទីក្រុងរហូតដល់មូលដ្ឋាន។ នៅគណៈកម្មាធិការប្រជាជនថ្នាក់ឃុំ ការវិនិយោគលើហេដ្ឋារចនាសម្ព័ន្ធបច្ចេកវិទ្យាព័ត៌មាន និងបំពាក់សម្ភារៈធ្វើការ ដូចជា កំព្យូទ័រ បណ្តាញអ៊ីនធឺណិត ឧបករណ៍ចុះហត្ថលេខាឌីជីថលជាដើម ។ល។ បានអនុវត្តព្រមៗគ្នា បង្កលក្ខណៈងាយស្រួលដល់កម្មាភិបាលនិងបុគ្គលិកបំពេញភារកិច្ចលើបរិស្ថានអេឡិចត្រូនិក”។
ភូមិភាគនានាកំពុងជំរុញការផ្លាស់ប្ដូរឌីជីថល ដើម្បីធ្វើទំនើបកម្មខឿនរដ្ឋបាល បង្កើនគុណភាពបម្រើប្រជាជននិងអាជីវកម្ម។ ជាក់ស្តែង សង្កាត់និញកេវ បានសហការជាមួយ VNPT កឹងធើ អនុវត្តសាកល្បងកម្មវិធីបច្ចេកវិទ្យាឌីជីថល ក្នុងសកម្មភាពគ្រប់គ្រងនិងដឹកនាំ។ តាមរយៈនោះ បានវិនិយោគដំឡើងឧបករណ៍ Kiosk ឆ្លាតវៃ នៅមជ្ឈមណ្ឌលបម្រើសេវារដ្ឋបាលរដ្ឋសង្កាត់ ជំនួយការសប្បនិម្មិត (ជួយកម្មាភិបាលអនុវត្តភារកិច្ចលើបរិស្ថានអេឡិចត្រូនិក) ឧបករណ៍បំពងសំឡេងឆ្លាតវៃ (បញ្ជាឆ្លាតវៃតាមរយៈប្រព័ន្ធសេវា ៤G) និងកម្មវិធី “អប់រំឌីជីថល” “ពលរដ្ឋឌីជីថល” ដើម្បីជំរុញការផ្លាស់ប្ដូរឌីជីថលលើវិស័យនានា។
បញ្ហាប្រឈម និងការលំបាក
នៅក្នុងសន្និបាតបូកសរុបបណ្ដោះអាសន្ន រយៈពេល ១ ឆ្នាំ អនុវត្តការរៀបចំអង្គភាពរដ្ឋបាលគ្រប់លំដាប់ថ្នាក់ និងសកម្មភាពរបស់រដ្ឋបាលភូមិភាគ ២ ថ្នាក់ លោកប៊ូយហ្វាងលីម នាយករងមន្ទីរមហាផ្ទៃទីក្រុងកឹងធើ បានឱ្យដឹង បន្ទាប់ពីរៀបចំរដ្ឋបាលភូមិភាគ ២ ថ្នាក់ បានកើតមានបញ្ហានិងការលំបាកជាច្រើន។ ក្នុងនោះ មានការលំបាក ៣ ក្រុម រួមមាន៖ យន្តការគោលនយោបាយពាក់ព័ន្ធនឹងប្រាក់បៀវត្ស និងប្រាក់ឧបត្ថម្ភសម្រាប់កម្មាភិបាលថ្នាក់ឃុំមានកម្រិតទាប បើប្រៀបធៀបនឹងតម្រូវការអនុវត្តភារកិច្ចការងារ។ កងជួរកម្មាភិបាលនិងបុគ្គលិក រងសម្ពាធខ្ពស់ដោយបរិមាណការងារច្រើន គុណភាពកម្មាភិបាលមិនទាន់ស្មើគ្នា និងខ្វះធនធានមនុស្ស ពីជំនាញវិជ្ជាជីវៈ។ ហេដ្ឋារចនាសម្ព័ន្ធ បច្ចេកវិទ្យាព័ត៌មាន និងទិន្នន័យមិនទាន់ព្រមៗគ្នា។
យោងតាមគណៈកម្មាធិការប្រជាជនសង្កាត់វីថាញ សង្កាត់នៅខ្វះបុគ្គលិកជំនាញផ្នែកសុខាភិបាល បច្ចេកវិទ្យាព័ត៌មាន និងអប់រំ។ ដូច្នេះ ត្រូវរៀបចំកម្មាភិបាលដែលមានជំនាញផ្សេងមកបំពេញភារកិច្ចជំនួស នេះអាចប៉ះពាល់មួយផ្នែកដល់គុណភាពនិងវឌ្ឍនភាពនៃការធ្វើសេនាធិការនិងអនុវត្តការងារ។ ឃុំ សង្កាត់មួយចំនួនក៏បានលើកឡើងអំពីហេដ្ឋារចនាសម្ព័ន្ធបណ្តាញ និងប្រព័ន្ធព័ត៌មានដោះស្រាយនីតិវិធីរដ្ឋបាល ពេលខ្លះនៅតែមានស្ថានភាព “កកស្ទះ” បណ្តាញទិន្នន័យមិនទាន់ព្រមៗគ្នា បុគ្គលិកត្រូវដោះស្រាយការងារដោយដៃ និងធ្វើបច្ចុប្បន្នភាពក្នុងកម្មវិធីផង ត្រូវចំណាយពេលច្រើន។
លោកទ្រឿងកាញ់ត្វៀង ប្រធានគណៈកម្មាធិការប្រជាជនទីក្រុងកឹងធើ បានវាយតម្លៃដោយត្រង់ទៅលើបញ្ហាខ្វះខាត អន់ថយក្នុងការរៀបចំរដ្ឋបាលភូមិភាគ ២ ថ្នាក់ថា៖ សមត្ថភាពជំនាញវិជ្ជាជីវៈរបស់កម្មាភិបាលនិងបុគ្គលិកមួយចំនួននៅថ្នាក់មូលដ្ឋាន មិនទាន់ឆ្លើយតបបានពេញលេញទៅតាមតម្រូវការភារកិច្ចក្នុងបរិការណ៍ថ្មីនៅឡើយ។ ហេដ្ឋារចនាសម្ព័ន្ធបច្ចេកវិទ្យាព័ត៌មាននិងមូលដ្ឋានទិន្នន័យ ក៏នៅមិនទាន់មានភាពស្របគ្នា ខណៈប្រព័ន្ធកម្មវិធីមួយចំនួនមិនទាន់តភ្ជាប់គ្នាបានពេញលេញ ជះឥទ្ធិពលដល់ប្រសិទ្ធភាពនៃការដោះស្រាយការងារ។
ប្រធានគណៈកម្មាធិការប្រជាជនទីក្រុងកឹងធើ បានសំណូមពរឱ្យបន្តពង្រឹងនិងរៀបចំចំនួនការិយាល័យជំនាញចំណុះគណៈកម្មាធិការប្រជាជនថ្នាក់ឃុំ; ផ្តុំកម្លាំងលើកកម្ពស់គុណភាពកងជួរកម្មាភិបាល បុគ្គលិក អ្នករដ្ឋការថ្នាក់ឃុំ ជាសំខាន់អំពីសមត្ថភាពក្នុងការផ្លាស់ប្ដូរឌីជីថល; ជំរុញការកែទម្រង់រដ្ឋបាល ភ្ជាប់ជាមួយការផ្លាស់ប្ដូរឌីជីថលលើគ្រប់វិស័យ; ធ្វើឱ្យសុក្រឹតហេដ្ឋារចនាសម្ព័ន្ធឌីជីថលនិងមូលដ្ឋានទិន្នន័យប្រើរួម; ព្រមទាំងកសាងខឿនរដ្ឋបាលបើកចំហ តម្លាភាព ទំនើប ដោយយកប្រជាជននិងអាជីវកម្មជាស្នូលក្នុងការបម្រើ៕
ប្រភព៖ baocantho.com.vn -ប្រែសម្រួល៖ ពេជ្រសឿន
ពាក្យគន្លឹះ
នាយក៖ ហ្វិញហ្វាងម៉េន
លិខិតអនុញាតលេខ ៧៨៩/GP- BTTTTអាស្រ័យក្រសួងព័ត៌មាននិងសារគមនាគមន៍ផ្តល់នូវថ្ងៃទី០២-១២-២០២១។លេខ២៤ ត្រឹងវ៉ាំងហ្វាយ សង្កាត់និញកេវ ក្រុងកឹងធើ - ទូរស័ព្ទ: (០២៩២) ៣៨៣០០៩៨
ទូរសារ: (០២៩២) ៣៨៣០៥៦១។ អ៊ីម៉ែល: toasoan@baocantho.com.vn
ទំនាក់ទំនងផ្សាយពាណិជ្ជកម្ម: quangcao@baocantho.com.vn
សរសេរច្បាស់ប្រភព "សារព័ត៌មានអេឡិចត្រូនិកកឹងធើ" នៅពេលផ្សាយបន្តពី websiteនេះ។
អភិវឌ្ឍន៍ដោយ:
