តាមការគ្រោងទុក ចាប់ពីថ្ងៃទី១ ខែកក្កដា ឆ្នាំនេះ ប្រាក់បៀវត្សរ៍គោលនឹងកើនឡើង ៨% គោលនយោបាយជាច្រើនដែលពាក់ព័ន្ធក៏មានការផ្លាស់ប្តូរ ក្នុងនោះ មានកម្រិតបង់ធានារ៉ាប់រងសុខាភិបាល។
នៅពេលប្រាក់បៀវត្សរ៍គោលកើនឡើង ប្រជាជនជាច្រើនមានការចាប់អារម្មណ៍ចំពោះកម្រិតបង់ធានារ៉ាប់រងសុខាភិបាល ព្រោះកម្រិតបង់នៃប្រភេទធានារ៉ាប់រងនេះ ត្រូវបានគណនាស្មើនឹង ៤,៥% នៃប្រាក់បៀវត្សរ៍គោល។
តើកម្រិតបង់ធានារ៉ាប់រងសុខាភិបាលនាពេលខាងមុខប្រែប្រួលយ៉ាងណា ?
ប្រាក់បៀវត្សរ៍គោល ត្រូវបានកែសម្រួលដំឡើង ចុងក្រោយបំផុតគឺកាលពីខែកក្កដា ឆ្នាំ២០២៤។ ពេលនោះ ប្រាក់បៀវត្សរ៍គោលត្រូវបានកែសម្រួលពី ១,៨ លានដុងឡើងដល់ ២,៣៤ លានដុង/ខែ ជាមួយនឹងកម្រិតកើនឡើង ៣០%។
ជាមួយនឹងកម្រិតដំឡើងប្រាក់បៀវត្សរ៍គោល ៨% ដូចបានពោលខាងលើ ប្រាក់បៀវត្សរ៍គោលនឹងកើនឡើងដល់កម្រិតប្រមាណ ២,៥២៧ លានដុង/ខែ គឺកើនបន្ថែម ១៨៧.២០០ដុង។
តាមសេចក្ដីកំណត់ កម្រិតបង់ធានារ៉ាប់រងសុខាភិបាល បច្ចុប្បន្នត្រូវបានគណនាស្មើនឹង៤,៥% នៃប្រាក់បៀវត្សរ៍គោល។
នៅពេលប្រាក់បៀវត្សរ៍គោលកើនឡើងដូចកម្រិតដែលបានពោលខាងលើ ចំនួនទឹកប្រាក់បង់ធានារ៉ាប់រងសុខាភិបាលរបស់ក្រុមមុខសញ្ញាមួយចំនួន ក៏កើនឡើងទៅតាមនោះដែរ។
បច្ចុប្បន្ន ចំពោះអ្នកចូលរួមធានារ៉ាប់រងសុខាភិបាលតាមគ្រួសារ អ្នកទី១ បង់ស្មើនឹង ៤,៥% នៃប្រាក់បៀវត្សរ៍គោល; អ្នកទី២, ទី៣, ទី៤ រៀងគ្នាគឺបង់ស្មើនឹង ៧០%, ៦០%, ៥០% នៃកម្រិតបង់របស់អ្នកទី១; ចាប់ពីអ្នកទី៥ ទៅបង់ស្មើនឹង ៤០%។
ប្រសិនបើប្រាក់បៀវត្សរ៍គោលកើនឡើងដល់ ២,៥២៧ លានដុង ចាប់ពីថ្ងៃទី១ ខែកក្កដា កម្រិតបង់ធានារ៉ាប់រងសុខាភិបាលតាមគ្រួសាររបស់អ្នកទី១ ស្មើនឹង ១១៣.៧១៥ ដុងក្នុងមួយខែ; អ្នកទី២ គឺ ៧៩.៦០០ ដុង; អ្នកទី៣ គឺ ៦៨.២២៩ ដុង; អ្នកទី៤ គឺ ៥៦.៨៥៧ ដុង; និងចាប់ពីអ្នកទី៥ ទៅស្មើនឹង ៤៥.៤៨៦ដុង។
គិតតាមឆ្នាំ អ្នកទី១ នឹងត្រូវបង់ប្រមាណ ១.៣៦៤.៥៨០ ដុង ហើយសមាជិកបន្តបន្ទាប់ នឹងថយចុះជាលំដាប់ រហូតដល់អ្នកទី៥ គឺត្រូវបង់ប្រមាណ ៥៤៥.៨៣២ ដុង។
លំដាប់អ្នកបង់ អត្រាបង់កម្រិតបង់ប្រចាំខែ (ដុង) កម្រិតបង់ពេញមួយឆ្នាំ (ដុង)
អ្នកទី ១ ១០០% (ស្មើនឹង ៤,៥% នៃប្រាក់បៀវត្សរ៍គោល) ១១៣.៧១៥ ១.៣៦៤.៥៨០
អ្នកទី ២ ៧០% នៃកម្រិតបង់អ្នកទី ១ ៧៩.៦០០ ៩៥៥.២០០
អ្នកទី ៣ ៦០% នៃកម្រិតបង់អ្នកទី ១ ៦៨.២២៩ ៨១៨.៧៤៨
អ្នកទី ៤ ៥០% នៃកម្រិតបង់អ្នកទី ១ ៥៦.៨៥៧ ៦៨២.២៨៤
អ្នកទី ៥ ៤០% នៃកម្រិតបង់អ្នកទី ១ ៤៥.៤៨៦ ៥៤៥.៨៣២
ចំពោះសិស្ស - និស្សិត ថវិការដ្ឋបានបង្កើនកម្រិតឧបត្ថម្ភឡើងយ៉ាងតិច ៥០%។ ទន្ទឹមនឹងនោះ អ្នកដែលចំណុះគ្រួសារក្បែរក្រនៅតាមឃុំដែលលំបាក នៅតែបានថវិការដ្ឋទូទាត់ជូន ១០០% នៃទឹកប្រាក់ទិញប័ណ្ណធានារ៉ាប់រងសុខាភិបាល។ ជនជាតិភាគតិច ក៏ទទួលបានការឧបត្ថម្ភយ៉ាងតិច ៧០% នៃកម្រិតបង់ផងដែរ៕
យោង៖ tuoitre.vn - ថាច់ធី
ពាក្យគន្លឹះ