មហាសាមគ្គីជនជាតិ ភូមិស្រុកផ្លាស់ថ្មី

22/04/2026 - 06:55

អនុវត្តវិទ្យាសាស្ត្របច្ចេកទេសក្នុងការផលិត ផ្ដល់ប្រសិទ្ធភាពសេដ្ឋកិច្ចខ្ពស់

ជាច្រើនឆ្នាំមកនេះ នៅលើភូមិឋានទីក្រុងកឹងធើ ការជំរុញអនុវត្តវិទ្យាសាស្ត្របច្ចេកទេសក្នុងការផលិតកសិកម្ម បាននាំមកនូវការវិវឌ្ឍន៍យ៉ាងសកម្មជាច្រើន។ តាមរយៈនោះ ជួយលើកកម្ពស់ទិន្នផល គុណភាពកសិផល បន្ថយការចំណាយ និងកម្លាំងពលកម្មព្រមទាំងឆ្លើយតប ទៅនឹងតម្រូវការកាន់តែខ្ពស់នៃទីផ្សារ សំដៅដល់ការផលិតប្រកបដោយចីរភាព បន្សាំនឹងការប្រែប្រួលអាកាសធាតុ។

បងលីវើង នៅភូមិដៃសូ ឃុំយ៉ាហ្វា ទីក្រុងកឹងធើ ប្រើដ្រូនកសិកម្មក្នុងការផលិតស្រូវនាំមកនូវប្រសិទ្ធភាពសេដ្ឋកិច្ចខ្ពស់។

ក្រោយពីការដាំដុះជាច្រើនឆ្នាំមក បងឡេថាញតឹង នៅភូមិបៃង៉ាង ឃុំតឹងហ្វា បានយល់ថា វិធីសាស្ត្រដាំដុះតាមបែបប្រពៃណីនៅមានចំណុចខ្វះខាតជាច្រើន ប្រសិទ្ធភាពសេដ្ឋកិច្ចទាប។ ហេតុដូច្នេះ ក្នុងបំណងចង់ផ្គត់ផ្គង់ផលិតផលដែលមានគុណភាពទៅកាន់ទីផ្សារ ឆ្លើយតបនឹងតម្រូវការកាន់តែខ្ពស់នៃអ្នកប្រើប្រាស់ ឆ្នាំ២០២០ បងតឹង បានបុលទុនពីធនាគារគោលនយោបាយសង្គម ដើម្បីវិនិយោគដាក់ប្រព័ន្ធបាញ់ទឹកផ្សែងក្រូចស្វ័យប្រវត្តិដល់ចម្ការស្វាយកែវរមៀតលើផ្ទៃដី ០២ ហិកតា។ ចែករំលែកអំពីអត្ថប្រយោជន៍នៃទម្រង់នេះ បងតឹង ឱ្យដឹង៖ “ប្រព័ន្ធបាញ់ទឹកផ្សែងក្រូចលើដើមស្វាយ ជួយឱ្យយើងម្ចាស់ការក្នុងការសម្រួលបរិមាណទឹកស្រោចស្រព ប្រិតសំចៃបានទឹកនិងជី។ ចំពោះរបៀបស្រោចស្រពកាលពីមុន ទុយោទឹកត្រូវអូសទៅដល់គល់ស្វាយនីមួយៗដើម្បីស្រោចកម្លាំងទឹកហូរខ្លាំងពិបាកគ្រប់គ្រងនិងធ្វើឱ្យហូរច្រោះដីនិងជី។ ឯប្រព័ន្ធបាញ់ទឹកផ្សែងក្រូចពីលើនឹងផ្តល់ទឹកបានគ្រប់គ្រាន់ដល់ដើមស្វាយ ព្រមទាំងជួយលាងជម្រះទឹកភ្លៀងខុសរដូវដែលជាប់លើផ្កាស្វាយផងដែរ។ ក្រៅពីនេះ ប្រព័ន្ធនេះនៅទាំងជួយប្រិតសំចៃពេលវេលានិងកម្លាំងពលកម្ម ដោយគ្រាន់តែអនុវត្តតាមជំហានងាយៗមួយចំនួន គឺអាចស្រោចស្រពលើផ្ទៃដីជាច្រើនហិកតាបានយ៉ាងឆាប់។ ចំពោះផ្ទៃដីដាំស្វាយកែវរមៀត ០២ ហិកតា ផ្តល់ទិន្នផលបានជាង២០តោនក្នុងមួយរដូវ តម្លៃពី ៥០.០០០-៧០.០០០ ដុងក្នុងមួយគីឡូក្រាម។ បើប្រៀបនឹងពីមុន ទិន្នផលគឺខ្ពស់ជាងប្រហែល ២០%”។

ជាមួយនឹងទិសដៅយន្តូបនីយកម្មកសិកម្ម និងជំរុញការអនុវត្តបច្ចេកវិទ្យាខ្ពស់ក្នុងការផលិត ដើម្បីជួយបង្កើនទិន្នផល ព្រមទាំងប្រិតសំចៃកម្លាំងពលកម្ម ពេលវេលានិងបន្ថយការប៉ះពាល់នឹងសារធាតុគីមី។ ឆ្នាំ ២០២៤ គ្រួសារ៎បងលីវើងនៅភូមិដៃសូ ឃុំយ៉ាហ្វា បានវិនិយោគជាង ៤០០ លានដុង ដើម្បីទិញដ្រូនកសិកម្មសម្រាប់បម្រើការផលិត។ សំណេះសំណាលជាមួយយើងខ្ញុំបងលីវើង ឱ្យដឹង៖ “ចាប់ពីមានដ្រូនមក បានជួយឱ្យគ្រួសារខ្ញុំកាត់បន្ថយចំណាយ បានច្រើនលើការព្រោះស្រូវ បាញ់ថ្នាំនិងបាច់ជី។ ក្រៅពីនេះ នៅទាំងជួយឱ្យគ្រួសារមានចំណូលបន្ថែមពីការស៊ីឈ្នួលបាញ់ថ្នាំឱ្យមាមីងក្នុងភូមិភាគទៀតផង”។ ក្រៅពីបន្ថយបានកម្លាំងពលកម្ម ពេលវេលាថែទាំនិងជួយឱ្យកសិករបន្ថយការប៉ះពាល់ផ្ទាល់នឹងសារធាតុគីមី ប្រើប្រាស់ដ្រូនបាញ់ថ្នាំផ្តល់ប្រសិទ្ធភាពខ្ពស់ជាងការបាញ់ដោយដៃ។ ល្បឿននៃការបាញ់ថ្នាំក៏លឿនជាងមុន ក្នុងមួយហិកតាចំណាយពេលត្រឹមតែ ១៥ នាទីប៉ុណ្ណោះ ខណៈដែលការបាញ់ដោយដៃត្រូវចំណាយពេលរហូតដល់ ៣ ម៉ោង។ “ប្រើប្រាស់ដ្រូនកសិកម្ម ជួយបន្ថយការចំណាយប្រហែល ៣០% បើធៀបនឹងវិធីសាស្ត្រធ្វើតាមបែបបុរាណ ទិន្នផលស្រូវក៏កើនឡើងយ៉ាងច្បាស់ក្រឡែត កើនពី ៨០០ គីឡូក្រាមក្នុងមួយកុងឡើងដល់ ១.០០០គីឡូក្រាមក្នុងមួយកុង” បងលីវើង បានឱ្យដឹងដូច្នេះ។

ប្រព័ន្ធបាញ់ទឹកផ្សែងក្រូចស្វ័យប្រវត្តិដល់ចម្ការស្វាយកែវរមៀតរបស់បងឡេថាញតឹង នៅភូមិបៃង៉ាង ឃុំតឹងហ្វា ទីក្រុងកឹងធើ។

តាមសមមិត្តដាំងតឹងយ៉ាង អនុប្រធានសមាគមកសិករទីក្រុងកឹងធើ បានឱ្យដឹង ដើម្បីជំរុញការអនុវត្តវិទ្យាសាស្ត្របច្ចេកទេសទៅក្នុងការផលិត នៅពេលខាងមុខ មន្ទីរ ស្ថាប័ន ភូមិភាគនិងអង្គភាពពាក់ព័ន្ធនានានឹងបង្កើនការសាកល្បងពូជថ្មីៗ។ ពង្រីកទម្រង់ផលិតដែលអនុវត្តវិទ្យាសាស្ត្រនិងបច្ចេកទេសជឿនលឿន សម្រេចប្រសិទ្ធភាពសេដ្ឋកិច្ចនិងឆ្លើយតបតម្រូវការទីផ្សារ។ បង្កលក្ខណៈងាយស្រួលសម្រាប់ការ ចងសម្ព័ន្ធរវាងកសិករនិងអាជីវកម្ម ធានាបាននូវច្រកចេញសម្រាប់ផលិតផល ព្រមទាំងអំពាវនាវដល់អាជីវកម្មឱ្យមកវិនិយោគក្នុងវិស័យកសិកម្ម បង្កការងារធ្វើនិងបង្កើនប្រាក់ចំណូលសម្រាប់ពលកម្មនៅជនបទ។

អាចសង្កេតឃើញថា អាស្រ័យការអនុវត្តវិទ្យាសាស្ត្របច្ចេកទេសជឿនលឿន ទម្រង់សេដ្ឋកិច្ចជាច្រើនបានបង្កើនប្រសិទ្ធភាព។ តាមរយៈនោះ រួមចំណែកធ្វើឱ្យសម្បូរបែបនូវផលិតផលកសិកម្ម ជួយជំរុញការបង្វែររចនាសម្ព័ន្ធសេដ្ឋកិច្ចកសិកម្មនៅក្នុងភូមិឋានទីក្រុង៕

ថាញវ៉ាង-ដាលីន

ចែករំលែកអត្ថបទ

ពាក្យគន្លឹះ