មហាសាមគ្គីជនជាតិ ភូមិស្រុកផ្លាស់ថ្មី

23/09/2025 - 08:44

មាមីងខ្មែររីករាយអំណរបុណ្យសែនដូនតា

បុណ្យសែនដូនតារបស់ជនរួមជាតិខ្មែរណាមបូប្រព្រឹត្តឡើងក្នុង ៣ ថ្ងៃចាប់ពីថ្ងៃទី ២១-២៣ ខែកញ្ញា ឆ្នាំ២០២៥។ នៅឃុំតាយវុាំង ទីក្រុងកឹងធើ ជាភូមិដែលមានជនរួមជាតិខ្មែររស់នៅកុះករ បរិយាកាសអំណរបុណ្យសែនដូនតាមានភាពអ៊ូអរក្នុងប៉ុន្មានថ្ងៃកន្លងមកម៉្លេះ។

មាមីងខ្មែរមកវត្តបឹងទន្សា ឃុំតាយវុាំង ទីក្រុងកឹងធើ ក្នុងឱកាសបុណ្យសែនដូនតា។

ឃុំតាយវុាំង មានប្រជាជនចំនួន ៣៤.០០០ នាក់ ក្នុងនោះ ជនរួមជាតិខ្មែរស្រូបអត្រាជិត៨០%។ ប៉ុន្មានឆ្នាំជិតៗនេះ ដោយការយកចិត្តទុកដាក់ចង្អុលការរបស់គណៈកម្មាធិការបក្ស រដ្ឋអំណាចភូមិភាគព្រមទាំងការផ្សព្វផ្សាយមានប្រសិទ្ធភាពបណ្តាគោលនយោបាយជនជាតិ ទើបជីវភាពសម្ភារៈនិងស្មារតីរបស់ជនរួមជាតិខ្មែរកាន់តែបានលើកកម្ពស់ពីមួយថ្ងៃទៅមួយថ្ងៃ អ្នកណាក៏រីករាយទទួលបុណ្យសែនដូនតាដោយក្តីសប្បាយ និងសុខដុមរមនា។

មកកាន់ភូមិទីបញឹក សព្វថ្ងៃដងផ្លូវបានចាក់បេតុងរាបរលូន តភ្ជាប់ពីភូមិមួយទៅភូមិមួយ ពីឃុំមួយទៅឃុំមួយ សម្រួលដល់ការធ្វើដំណើរទៅមកបានងាយស្រួល។ តាមដងផ្លូវជនបទគឺមានផ្ទះថ្ម សង់ឡើងជាជួររឹងមាំ សមរម្យ ជួយឱ្យគ្រួសារក្រ គ្រួសារក្បែរក្រមានផ្ទះនៅលំនឹងទទួលបុណ្យសែនដូនតាក្នុងបរិយាកាសសប្បាយរីករាយ សុភមង្គល។ ឆ្នាំ២០២៥ ភូមិទីបញឹកសង់ផ្ទះបានចំនួន ២៣ ខ្នង ជូនគ្រួសារក្រីក្រ និងគ្រួសារក្បែរក្រដោយសរុបថវិកាជាង១ពាន់លានដុង។

បងឌោច័ន្ទសិរី ប្រជាជននៅភូមិទីបញឹក រីករាយ ឱ្យដឹង៖ “ឆ្នាំនេះ ផ្ទះខ្ញុំទទួលបុណ្យសែនដូនតាក្នុងផ្ទះថ្មីស្អាតបាត។ ខ្ញុំអរគុណរដ្ឋអំណាចភូមិភាគដែលបានយកចិត្តទុកដាក់ជួយប្រជាជនក្រីក្រដូចយើងខ្ញុំនេះ”។

មាមីងខ្មែរនៅឃុំតាយវុាំង ទីក្រុងកឹងធើ ប្រមូលផលខ្ទឹមស្លឹក។

តាំងពីកន្លះខែមុនបុណ្យដូនតា មាមីងខ្មែរបានរៀបចំបោសសម្អាតផ្ទះសម្បែង ទីសក្ការបូជាដើម្បីរៀបចំទទួលអំណរបុណ្យសែនដូនតា។ នៅវត្តបឹងទន្សា ព្រះសង្ឃនិងពុទ្ធបរិស័ទនាំគ្នារៀបចំបោសសម្អាតក្នុងបរិវេណវត្ត។ បរិយាកាសបុណ្យសែនដូនតារៀបចំគ្រប់ទីកន្លែង ផ្ទះណាក៏វេចនំអន្សមជ្រូក នំទៀនជាដើម។ល។ សម្រាប់យកទៅជូនឪពុកម្តាយ ជីដូនជីតានិងយកទៅប្រគេនព្រះសង្ឃ។

លោកសើុងសៀន ប្រធានគណៈកម្មការវត្តបឹងទន្សា ឱ្យដឹង៖ “ពិធីបុណ្យសែនដូនតាឆ្នាំនេះ មាមីងមានក្តីរីករាយណាស់។ អាស្រ័យរដ្ឋអំណាចភូមិភាគយកចិត្តទុកដាក់ ទើបជីវភាពសម្ភារៈនិងស្មារតីរបស់ប្រជាជនកាន់តែបានលើកកម្ពស់ពីមួយថ្ងៃទៅមួយថ្ងៃ មិនតែប៉ុណ្ណោះមាមីងថែមទាំងរួមចំណែកកសាងសំណង់ក្នុងវត្តទៀតផង។

លោកង្វៀងវុាំងយេ អនុប្រធានគណៈកម្មាធិការប្រជាជនឃុំតាយវុាំង ឱ្យដឹង៖ “រយៈពេលកន្លង អាស្រ័យការផ្សព្វផ្សាយមានប្រសិទ្ធភាពនៃកម្មវិធីទិសដៅជាតិអំពីការបំបាត់ផ្ទះបណ្តោះអាសន្ន ផ្ទះទ្រុឌទ្រោម ព្រមទាំងការរួមចំណែកយ៉ាងសកម្មរបស់ប្រជាជន ទើបឃុំតាយវុាំងមានភាពវិវឌ្ឍន៍យ៉ាងសកម្ម។ បុណ្យសែនដូនតាឆ្នាំនេះ កាន់តែមានន័យជាងទៀត ពេលដែលមាមីងនៅឃុំតាយវុាំង មានគ្រួសារខ្លះបានទទួលផ្ទះថ្មី រឹងមាំ ជួយអភិវឌ្ឍសេដ្ឋកិច្ច កូនចៅបានទៅរៀនគ្រប់គ្នា វិស័យវប្បធម៌ សុខាភិបាល អប់រំបន្តបានវិនិយោគនិងសុក្រឹត”។

ពិធីបុណ្យសែនដូនតា មិនត្រឹមតែជាឱកាសសម្រាប់រំលឹកនឹកគុណដល់បុព្វការីជនប៉ុណ្ណោះទេ ថែមទាំងជាឱកាសសម្រាប់ប្រជាជននៅឃុំតាយវុាំង ក្រឡេកមើលមកដំណាក់កាលខិតខំប្រឹងប្រែង ដើម្បីរួមគ្នាអភិរក្សតម្លៃប្រពៃណី និងបោះជំហានកាន់តែរឹងមាំក្នុងដំណាក់កាលអភិវឌ្ឍថ្មី៕

ហុងទើ-ដាលីន

ចែករំលែកអត្ថបទ

ពាក្យគន្លឹះ