មហាសាមគ្គីជនជាតិ គំរូក្នុងសហគមន៍

20/08/2025 - 08:47

កសិករចេះអនុវត្តទម្រង់រកស៊ីធ្វើមាន

ដោយឆន្ទៈព្យាយាមនិងស្មារតីជម្នះការលំបាក បងលីថុង នៅភូមិទំពក់សក់A ឃុំមីទូ ទីក្រុងកឹងធើ ជាគំរូកសិករខ្មែរឆ្នើមឈានឡើងធ្វើមានពីការធ្វើស្រែ។ ជាមួយទម្រង់រួមផ្សំរវាងផលិតស្រូវគុណភាពខ្ពស់និងធ្វើសេវាកសិកម្ម រាល់ឆ្នាំបងថុង គាត់អាចរកបានប្រាក់ចំណូលជាង ១ ពាន់លានដុង។

បងលីថុង កំពុងលាងជម្រះម៉ាស៊ីនច្រូតស្រូវ។

បច្ចុប្បន្ន បងថុង មានដីស្រែ៨០កុង ម៉ាស៊ីនភ្ជួររាស់៤គ្រឿង និងម៉ាស៊ីនច្រូតស្រូវ២គ្រឿង គិតជាតម្លៃទឹកប្រាក់ជិត២ពាន់លានដុង ក្រៅពីនោះ បងនៅទាំងសង់បានផ្ទះមួយខ្នងតម្លៃជិត២ពាន់លានដុង។ តាមការរៀបរាប់របស់បងលីថុង ឆ្នាំ១៩៩៦ ប្តីប្រពន្ធបងបានឪពុកម្តាយចែកដី ស្រែឱ្យ៦កុង និងដីមួយធារសម្រាប់សង់ផ្ទះពេលចេញរស់នៅដោយឡែក។ កាលនោះ ក្រៅពីធ្វើស្រែបងនៅទាំងឆ្លៀតទៅធ្វើកម្មករសំណង់សម្រាប់ផ្គត់ផ្គង់ជីវភាពគ្រួសារ ចំណែកប្រពន្ធនៅផ្ទះបិតស្រានិងចិញ្ចឹមជ្រូក។ រៀងរាល់ឆ្នាំ ប្តីប្រពន្ធបងសន្សំសំចៃទិញបានដីស្រែពី២-៥កុង។ បងថុង ឱ្យដឹង៖ “ប្តីប្រពន្ធខ្ញុំគិតថា បើរស់នៅតំបន់ជនបទត្រូវតែមានដីស្រែច្រើន ប្រឹងប្រែងធ្វើការរកស៊ីសន្សែសន្សំប្រាក់ពេលមានអ្នកណាបញ្ចាំដី ឬលក់ដីយើងមានប្រាក់ទិញភ្លាម។ ក្រៅពីនោះ ដើម្បីប្រិតសំចៃក្នុងការផលិត ខ្ញុំធ្វើការងារដោយខ្លួនឯងតាំងពីព្រោះស្រូវ បាចជី ឆ្លូកស្រូវ។ល។ ដូច្នេះ ទើបការផលិតស្រូវចំណេញច្រើន”។

សម្រាប់ការផលិតស្រូវវិញ បងថុង បានជ្រើសរើសពូជស្រូវគុណភាពខ្ពស់ ដូចជា OM ៥៤៥១ OM១៨ ដាយថើម៨។ល។ និងអនុវត្តបច្ចេកទេសព្រោះរង្វើលអនុវត្ត IPM ប្រើប្រាស់ថ្នាំការពាររុក្ខជាតិតាមគោលការណ៍៤ត្រូវ (ត្រូវថ្នាំ ត្រូវបរិមាណនិងកម្រិតអង្សាត្រូវពេល និងត្រូវរបៀប) ម៉្លោះហើយ ទិន្នផលស្រូវសម្រេចជាមធ្យមជាង៨តោនក្នុងមួយហិកតា។ ទន្ទឹមនឹងនោះ បងថុង នៅទាំងវិនិយោគទិញម៉ាស៊ីនភ្ជួររាស់ ម៉ាស៊ីនច្រូតស្រូវសម្រាប់ធ្វើស្រែផ្ទះផងនិងធ្វើសេវាកម្មផងដើម្បីរកប្រាក់ចំណូល។ បងថុង ឱ្យដឹងបន្ថែម៖ “សព្វថ្ងៃមានម៉ាស៊ីនភ្ជួររាស់ ម៉ាស៊ីនច្រូតស្រូវ ដូច្នេះ យើងម្ចាស់ការបានពេលវេលាចុះពូជ។ ក្រៅពីស្រែផ្ទះ ខ្ញុំនៅទាំងស៊ីឈ្នួលភ្ជួររាស់ ច្រូតស្រូវឱ្យមាមីងជារួមក្នុងមួយឆ្នាំខ្ញុំរកបានប្រាក់ចំណូលជាង៦០០លានដុង។ សរុបក្នុងមួយឆ្នាំប្រាក់ចំណូលបានមកពីការផលិតស្រូវនិងធ្វើសេវាកសិកម្មគឺជាង១ពាន់លានដុង”។

មិនត្រឹមធ្វើមានតែខ្លួនឯង បងនៅទាំងបង្កការងារធ្វើឱ្យពលករចំនួន១៦នាក់នៅក្នុងភូមិ ក្នុងនោះ ពលករ១៤នាក់ធ្វើការតាមរដូវស្រូវ និងពលករ២នាក់ធ្វើការជុំឆ្នាំ។ ឆ្នាំ២០២៤ បងលីថុង ទទួលប័ណ្ណសរសើររបស់ប្រធានគណៈកម្មាធិការប្រជាជនខេត្តសុកត្រាំង (ចាស់) ទទួលស្គាល់កិត្តិនាមជាកសិករផលិតធ្វើអាជីវកម្មពូកែថ្នាក់ខេត្ត៕

យ្វីអាញ់-ដាលីន

ចែករំលែកអត្ថបទ

ពាក្យគន្លឹះ