កីឡា - ទេសចរណ៍ កីឡា - ទេសចរណ៍

30/06/2025 - 14:38

កីឡាការិនីទាំងឡាយពោរពេញដោយទេពកោសល្យ

មានមិនតិចកីឡាការិនីកម្រិតកំពូលបានប្រឈមនឹងបញ្ហាពេលចូលនិវត្តន៍ ដោយសារតែការហ្វឹកហាត់យ៉ាងតឹងរឹង ធ្វើឱ្យពួកគេខកខានក្នុងការសិក្សានិងឱកាសផ្សេងៗ។ ប៉ុន្តែ សម្រាប់រាជិនីកីឡាវាយសី Tai Tzu Ying និងកីឡាការិនីច្រើននាក់ផ្សេងទៀត ពួកគេបានបង្កើតឱកាសសម្រាប់ខ្លួនឯង។

កីឡាការិនីមានសញ្ញាបត្រ បណ្ឌិត Tai Tzu Tying។

Tai Tzu Ying មិនត្រឹមតែជាកីឡាការិនីមានជំនាញខ្ពស់ទេ ថែមទាំងជាអ្នកសម្បូរទៅដោយភាពច្នៃប្រតិដ្ឋ មាំមួន និងរក្សាបានភាពរឹងប៉ឹងជាង ១០ ឆ្នាំមកនេះ។ នាងគឺជាប្រភពជំរុញឱ្យមនុស្សជំនាន់ក្រោយស្រឡាញ់ចូលចិត្តកីឡា វាយសី ដោយលក្ខណៈប្រកួតដ៏អស្ចារ្យ ទឹកចិត្តតស៊ូ និងជ្រើសរើសរបៀបរស់នៅវិជ្ជមាន។ Tai គឺជាកីឡាការិនីដ៏ឆ្នើមមួយរូបនៃវិស័យកីឡាវាយសីពិភពលោក៖ នៅវ័យ ១៣ ឆ្នាំ នាងទទួលបានរង្វាន់លេខ ២ នៅពានរង្វាន់ Vietnam Open ២០០៧; វ័យ ១៥ ឆ្នាំ ទទួលបានរង្វាន់លេខ ២ នៅពានរង្វាន់ Asian Championship ២០០៩; វ័យ ១៧ ឆ្នាំ ឈ្នះពានជើងឯក US Open ២០១១; ឈ្នះពានធំៗចំនួន ៨ នៅឆ្នាំ ២០១៨ ហើយកាន់តំណែងលេខ ១ ពិភពលោកខាងឯកត្តជននារីចំនួន ២៥៨ សប្តាហ៍ជាប់ៗគ្នា – ជាកំណត់ត្រាប្រវត្តិសាស្រ្តមួយមិនទាន់មាននរណាអាចបំបែកបាននៅឡើយ។

ទោះបីជានាងមិនទាន់ប្រកាសចូលនិវត្តន៍ផ្លូវការក៏ដោយ ប៉ុន្តែនៅពានរង្វាន់ថ្មីៗនេះ Tai មិនចូលរួមប្រកួត រួមទាំងពានរង្វាន់តៃវ៉ាន់បើកទូលាយនៅប្រទេសរបស់នាង។ នៅពេលថ្មីៗនេះ មូលហេតុក៏ត្រូវបានបង្ហើប គឺនាងចំណាយពេលវេលាដើម្បីការពារនិក្ខេបបទបណ្ឌិត។ Tai Tzu Ying ក្លាយជាកីឡាការិនីវាយសីដំបូងបង្អស់លើពិភពលោកដែលមានសញ្ញាបត្របណ្ឌិត។ មិនតែប៉ុណ្ណោះ ក្នុងការប្រកួតអាជីពជាងដប់ឆ្នាំកន្លង នាងក៏សាងសង់បានលំនៅឋានយ៉ាងសមរម្យសម្រាប់ខ្លួនឯងផងដែរ ដោយមានហាងលក់គ្រឿងកីឡាវាយសីនៅទីក្រុងតៃប៉ិ។

បន្ទាប់ពីការពារជោគជ័យមេដាយមាសអូឡាំពិកនៅទីក្រុងប៉ារីស អតីតកីឡាការិនីលេខ ១ ពិភពលោក Chen Yu Fei (ចិន) បានសុំផ្អាកការប្រកួតជាបណ្តោះអាសន្ន។ អ្នកគាំទ្រជាច្រើនសន្និដ្ឋានថា នាងកំពុងរៀបចំសម្រាប់ការចូលនិវត្តន៍ ដោយសារតែនាងមានបញ្ហាសន្លាក់ខ្នង។ ប៉ុន្តែបន្ទាប់ពីជាងមួយឆ្នាំ នាងបានត្រឡប់មកប្រកួតវិញយ៉ាងជោគជ័យ ហើយបានបញ្ចប់ការសិក្សាបរិញ្ញាបត្រជាន់ខ្ពស់នៅប្រទេសអូស្ត្រាលី។ កីឡាការិនី វាយសី Huang Dongping របស់ចិន ប្រកួតខ្លឹមសារគូបុរសនារី ដែលបច្ចុប្បន្នឈរចំណាត់ថ្នាក់លេខ ២ ពិភពលោក ក៏កំពុងសិក្សាបរិញ្ញាបត្រជាន់ខ្ពស់នៅក្នុងស្រុកផងដែរ។ ជាមួយនឹងមេដាយមាសអូឡាំពិកនៅជប៉ុន និងមេដាយពាន ជើងឯកនៅពានរង្វាន់ធំៗជាច្រើនទៀត Huang គ្រប់សមត្ថភាពដើម្បីចាប់ផ្តើមអាជីពផ្សេង ប៉ុន្តែ សម្រាប់នាង ការសិក្សាគឺត្រូវបានចាត់ទុកជាចម្បង។ កីឡាការិនីវាយសីចិន He Bing Jiao ក៏បានប្រកាសចូលនិវត្តន៍បន្ទាប់ពីឈ្នះមេដាយប្រាក់នៅអូឡាំពិកទីក្រុងប៉ារីស។ ប៉ុន្តែនាងតែងមានវត្តមានចូលរួមជាមួយក្រុមជម្រើសជាតិនៅពេលប្រកួតម្តងៗ ក្នុងនាមជាអ្នកថតរូប។ Bing Jiao កំពុងសិក្សាផ្នែកសារគមនាគមន៍ ដើម្បីក្លាយជាអ្នកសារព័ត៌មានកីឡានេះជាក្តីស្រមៃរបស់នាងតាំងពីក្មេង៕

ហាថាញ - សុផន

ចែករំលែកអត្ថបទ

ពាក្យគន្លឹះ