មហាសាមគ្គីជនជាតិ គំរូក្នុងសហគមន៍

30/06/2025 - 14:38

កម្មាភិបាលអស់ពីចិត្តជាមួយនឹងការងារសម្រុះសម្រួល

បងស្រី ថាច់ធីហ្វា ប្រធានគណៈកម្មាធិការរណសិរ្សមាតុភូមិវៀតណាមឃុំវិញត្រាច់ដុង ក្រុងបាកលីវ ខេត្តបាកលីវ ជាកម្មាភិបាលនារី ម្នាក់ពូកែក្នុងការងារសម្រុះសម្រួល បានជនរួមជាតិខ្មែរស្រឡាញ់រាប់អាន ថ្នាក់ដឹកនាំឃុំជឿទុកចិត្ត។

បងស្រីថាច់ធីហ្វា។

បងស្រីហ្វា ចូលរួមការងារនៅមូលដ្ឋានពីឆ្នាំ ២០០៩ ដល់ឆ្នាំ ២០១៥ ក្នុងតំណែងជាលេខាសម្ព័ន្ធយុវជនឃុំ និងចូលរួមជាសមាជិកក្រុមប្រឹក្សាសម្រុះសម្រួលឃុំ។ ឆ្នាំ ២០២០ គាត់បានបោះឆ្នោតកាន់តំណែងជាប្រធានគណៈកម្មាធិការរណសិរ្សមាតុភូមិវៀតណាមឃុំវិញត្រាច់ដុងរហូតដល់សព្វថ្ងៃ។ ក្នុងអំឡុង ១០ ឆ្នាំ ចូលរួមការងារសម្រុះសម្រួល មធ្យមភាគក្នុងមួយឆ្នាំគាត់ រួមជាមួយនឹងក្រុមប្រឹក្សាសម្រុះសម្រួលឃុំ ធ្វើការសម្រុះសម្រួលជាង ៤០ ករណី ជាសំខាន់គឺទំនាស់លើវិស័យ ដូចជា៖ វិវាទដីធ្លី ទំនាស់កើតឡើងក្នុងជីវភាពអាពាហ៍ពិពាហ៍និងគ្រួសារ។ល។ ករណីភាគច្រើនដែលមានបងស្រីហ្វាចូលរួមសម្រុះសម្រួល មានអត្រាជោគជ័យខ្ពស់។ បងស្រីហ្វា ឱ្យដឹង៖ “ខ្ញុំជាកម្មាភិបាលខ្មែរបំពេញការងារនៅមូលដ្ឋានជាច្រើនឆ្នាំ ហេតុនោះខ្ញុំក្តាប់ច្បាស់ពីស្ថានការណ៍ជីវភាពរបស់មាមីង។ ព្រោះហេតុនោះ ពេលគ្រួសារប្រជាជនកើតមានទំនាស់ វិវាទ ខ្ញុំតែងចុះទៅដល់ផ្ទះដើម្បីក្តាប់ស្ថានការណ៍ និងស្តាប់យោបល់។ ពេលយល់ច្បាស់ពីហេតុការណ៍ខ្ញុំទន់ភ្លន់ក្នុងការវិភាគវែកញែកហេតុការណ៍សមហេតុសមផល គួបផ្សំរវាងច្បាប់ជាមួយនឹងមនោសញ្ចេតនាភូមិផងជាមួយ”។ តាមប្រសាសន៍បងស្រីហ្វា ពេលសម្រុះសម្រួលសម្រេចជោគជ័យនូវករណីទំនាស់ វិវាទម្តងៗ គាត់មានអារម្មណ៍សប្បាយរីករាយ សុភមង្គលខ្លាំងណាស់ បំផុតគឺករណីទាក់ទងដល់អាពាហ៍ពិពាហ៍និងគ្រួសារ។ ពីព្រោះ គាត់មានបំណងចង់ឱ្យរាល់គ្រួសារមានសុភមង្គល ដើម្បីអភិវឌ្ឍសេដ្ឋកិច្ច អប់រំ កូនចៅក្លាយជាមនុស្សល្អ។

បងស្រីថាច់ធីហ្វា ទទួលប័ណ្ណសរសើររបស់គណៈកម្មាធិការប្រជាជនខេត្តបាកលីវ។

ដើម្បីធ្វើបានល្អនូវការងារសម្រុះសម្រួលនេះ បងស្រីហ្វា តែងចូលរួមវគ្គហ្វឹកហ្វឺនផ្សព្វផ្សាយ អប់រំច្បាប់ អានសៀវភៅច្រើន ធ្វើបច្ចុប្បន្នភាពឯកសារនិងបទប្បញ្ញត្តិថ្មីៗ ។ល។ ទន្ទឹមនឹងនោះ គាត់នៅទាំងសហការជាមួយអង្គការមហាជន ផ្សព្វផ្សាយច្បាប់ផ្គួបបញ្ចូលនៅពេលសមាជប្រចាំខែ; ផ្សព្វផ្សាយ វែកញែកក្នុងការទទួលជួបប្រជាពលរដ្ឋ ទទួលឯកសារដោះស្រាយបែបបទរដ្ឋបាល; ផ្សព្វផ្សាយតាមស្ថានីយផ្សាយសំឡេង តាមបណ្តាញសង្គម ដូចជា៖ zalo, Facebook របស់រណសិរ្សមាតុភូមិឃុំ ។ល។ ក្រៅពីនោះ បងស្រីហ្វា នៅទាំងរួមជាមួយអ្នកមានប្រជាប្រិយក្នុងជនរួមជាតិខ្មែរឃោសនា ផ្សព្វផ្សាយ អប់រំច្បាប់ ជួយប្រជាជនក្តាប់ និងយល់ដឹងច្បាប់ កាត់បន្ថយ ទំនាស់វិវាទកើតឡើង។

លោកស្រី ង៉ោអៀងញ៉ៀង លេខាគណៈកម្មាធិការបក្សឃុំវិញត្រាច់ដុង ឱ្យដឹង៖ “បងស្រីថាច់ធីហ្វា ជាកម្មាភិបាលមានប្រជាប្រិយ បានមាមីងខ្មែរស្រឡាញ់រាប់អាន និងសម្រេចបានល្អនូវភារកិច្ចដែលថ្នាក់លើប្រគល់ជូនជានិច្ច។ គាត់រវៀសរវៃ ប៉ិនប្រសប់ក្នុងការវិនិច្ឆ័យនិងដោះស្រាយ សម្រេចជោគជ័យ មានប្រសិទ្ធភាពនូវករណីទំនាស់ ម្ល៉ោះហើយ រាល់ករណីប្តឹងតវ៉ាឡើងថ្នាក់លើ កាន់តែថយចុះពីមួយថ្ងៃទៅមួយថ្ងៃ។ ប្រការនេះ បញ្ជាក់ឱ្យឃើញថា បងស្រីហ្វា បង្កបានក្តីទុកចិត្ត ក្លាយជាអ្នកសម្រុះសម្រួលគួរជាទីទុកចិត្តរបស់ប្រជាជន រួមចំណែករក្សាមនោសញ្ចេតនាភូមិស្រុក និងសន្តិសុខសណ្តាប់ធ្នាប់ត្រូវបានធានា”៕

យីអាញ-វិមាន

ចែករំលែកអត្ថបទ

ពាក្យគន្លឹះ