មហាសាមគ្គីជនជាតិ គំរូក្នុងសហគមន៍

30/12/2024 - 12:07

មានអារម្មណ៍ថាខ្លួនមានសុខភាពល្អពេលបានចូលរួមប្រណាំងទូក-ង

នោះគឺជាការសំណេះសំណាលរបស់បងស្រីធីមី កីឡាការិនីទូក-ង វត្តមុនីរង្សីសិរីសំពៅមាសសំរោង ឃុំបាងថាច់ ស្រុកយ៉ុងរៀង ខេត្តគៀងយ៉ាង។ សមាជិកក្នុងក្រុមខ្លះហៅគាត់ ថាមីង ខ្លះហៅថាអ៊ំ។ ចំណែកនៅផ្ទះគាត់ជាជីដូនរបស់ចៅ ១០ នាក់។

បងស្រីមី ចូលរួមពិធីបើកមហោស្រពទិវាវប្បធម៌ កីឡានិងទេសចរណ៍ជនរួម
ជាតិខ្មែរខេត្តគៀងយ៉ាង ឆ្នាំ២០២៤។

បងស្រីមី មានអាយុ ៦១ ឆ្នាំ ចូលប្រឡូកក្នុងកីឡាទូក-ងជាង៤០ឆ្នាំ ។ បងស្រីមី រៀបរាប់ឱ្យដឹង៖ “ខ្ញុំចូលរួមលេងកីឡាទូក-ង តាំងពីក្រមុំម៉្លេះ ខណៈពេលមានប្ដី មានកូនខ្ញុំក៏ឈប់មួយរយៈ ដើម្បីគិតគូរសេដ្ឋកិច្ចគ្រួសារ។ ពេលសេដ្ឋកិច្ចគ្រួសារបានលំនឹងហើយពេលទំនេរខ្ញុំក៏សូមចូលរួមក្នុងក្រុមកីឡាទូក-ង។ ប៉ុន្មានឆ្នាំជិតៗនេះ ជីវភាពបានលំនឹង ហេតុនោះ ខ្ញុំទៅតាមទូក-ងប្រណាំងរហូត។ និយាយពិតទៅ ឱ្យតែខ្ញុំបានចុះទូកកាន់ច្រវាអុំប្រណាំង គឺក្នុងខ្លួនហាក់ដូចជាមានសុខភាពល្អ អារម្មណ៍ដូចជាគ្មានជំងឺក្នុងរាងកាយ”។

បងស្រីមី មានបទពិសោធន៍ ហេតុនោះគាត់តែងបង្ហាញពីរបៀបអុំដល់កីឡាករវ័យក្មេង ធ្វើយ៉ាងណាដើម្បីមិនឱ្យបាត់ចង្វាក់អុំជាមួយមិត្តរួមក្រុម។ បងស្រីមី អួត៖ “ក្រុមខ្ញុំឆ្នាំនេះមានទូកថ្មី ហេតុនោះ ប្តេជ្ញាចិត្តនឹងយករង្វាន់លេខ ១ ជូនវត្ត ជូនភូមិស្រុក និងជូនឃុំ”។ ឮបងស្រីមី និយាយ អំពីទូកថ្មី បងស្រីធីអុកយ៉ាវ មិត្តរួមក្រុមរបស់បងស្រីមី ឱ្យដឹងបន្ថែម៖ “ថ្ងៃធ្វើពិធីដាក់ទូកសប្បាយណាស់ ពីព្រោះមានមនុស្សចូលរួមច្រើនកុះករ។ ថ្ងៃនោះ ហាក់ដូចជាកីឡាករទូក-ងទាំងបុរសនិងនារីសុទ្ធសឹងមានវត្តមានទាំងអស់។ ទូក-ងវែង ដូច្នោះ តែស្រុះចិត្តគំនិតគ្នា គឺលើកចុះងាយស្រួលណាស់”។

ឆ្លៀតឱកាសប្រណាំងទូក-ងបុរស-នារី ចាត់តាំងឡើងនៅពេលរសៀល ហេតុនោះបងស្រីយ៉ាវ និងបងស្រីមី ព្រមជាមួយនឹងបងប្អូននារីផ្សេងទៀតបានចូលរួមបើកពិធី និងលើកទឹកចិត្តដល់កីឡាករទូក-ងបុរសៗ។ បងស្រីមី ឱ្យដឹង៖ “ដោយបានចូលរួមប្រណាំង ទើបខ្ញុំមានកាតកីឡាករពាក់បានចូលជិតឆាក មើលសម្ដែងសិល្បៈខ្ញុំចូលចិត្តណាស់”។ ពេលទូក-ងបង្កើនល្បឿន បងស្រីមី និងបងស្រីយ៉ាវ ស្រែកហ៊ោ លើកទឹកចិត្ត។ បងស្រីមី ឱ្យដឹង៖ “ខ្ញុំគ្រាន់តែស្រែកលើកទឹកចិត្ត ហេតុនោះវាមិនប៉ះពាល់ដល់ការប្រណាំងនៅពេលរសៀលនោះទេ”។

និយាយអំពីលក្ខណៈដើម្បីហាត់សម និងប្រណាំងទូក-ង បងស្រីមី បង្ហើមឱ្យដឹង៖ “រដ្ឋបានឧបត្ថម្ភច្រើនណាស់ តាំងពីសង់ផ្ទះរហូតដល់ឱ្យបុលទុនរកស៊ី និងកែប្រែចម្ការ ហេតុនោះទើបជីវភាពគ្រួសារខ្ញុំបានលំនឹង កូនៗមានការងារធ្វើ និងចេញនៅដោយឡែកអស់។ ខ្ញុំក៏ចង់ឱ្យកូនៗ និងចៅៗរបស់ខ្ញុំនឹងចំណាយពេលដើម្បីហាត់សមនិងអុំប្រណាំងដូចខ្ញុំដែរ”។

តាមប្រសាសន៍លោក ហ្វិញខាយស៊ី អនុប្រធានគណៈកម្មាធិការប្រជាជនឃុំបាងថាច់ ទូក-ងវត្តមុនីរង្សីសិរីសំពៅមាសសំរោង មានកីឡាការិនីវ័យចំណាស់ច្រើន ស្រឡាញ់ពេញចិត្តកីឡាទូក-ង។ ពួកគាត់នៅមានសុខភាពល្អ និងមានបទពិសោធន៍ច្រើន ហេតុនោះបានជ្រើសរើសចូលក្រុមដើម្បីអុំប្រណាំងក្នុងឱកាសបុណ្យទានម្តងៗ៕

ហាថាញ់-វិមាន

ចែករំលែកអត្ថបទ

ពាក្យគន្លឹះ