មហាសាមគ្គីជនជាតិ គំរូក្នុងសហគមន៍

18/11/2024 - 15:53

គ្រប់យ៉ាងដើម្បីសិស្សជាទីស្រឡាញ់

ពីព្រោះចង់បង្រៀនអក្សរខ្មែរ លោកគ្រូ ឡឹមហ៊ីបប៉ា គ្រូបង្រៀនអនុវិទ្យាល័យជនជាតិអន្តេវាសិកឡុងភូ ខេត្តសុកត្រាំង បានបន្តសិក្សាថ្នាក់មហាវិទ្យាល័យភាសាខ្មែរណាមបូ។ លោកគ្រូប៉ា បានបំប៉នសិស្សជាច្រើនឈ្នះរង្វាន់ជាសិស្សពូកែភាសាខ្មែរថ្នាក់ខេត្ត។

លោកគ្រូឡឹមហ៊ីបប៉ា។

ឆ្នាំ២០០២ លោកគ្រូប៉ា ប្រឡងបញ្ចប់មហាវិទ្យាល័យគរុកោសល្យរូបវិទ្យា ហើយបានមកបង្រៀននៅអនុវិទ្យាល័យភូហ៊ឺវ។ លុះដល់ឆ្នាំ ២០០៤ អនុវិទ្យាល័យជនជាតិអន្តេវាសិកឡុងភូបានបង្កើត លោកគ្រូបានចាត់មកបង្រៀននៅសាលានេះ។ ដោយធ្លាប់រៀននៅសាលាមធ្យមសិក្សាបំពេញវិជ្ជាបាលីណាមបូ ម្ល៉ោះហើយលោកគ្រូប៉ា យល់ជ្រៅជ្រះពីអក្សរសាស្ត្រខ្មែរ។ អាស្រ័យហេតុនោះ លោកគ្រូត្រូវបានចាត់ឱ្យបង្រៀនបន្ថែមផ្នែកភាសាខ្មែរ។ លោកគ្រូប៉ា ឱ្យដឹង៖ “ខ្ញុំមានបំណងចង់ក្លាយជាគ្រូបង្រៀនភាសាខ្មែរ ហេតុដូច្នេះ ខណៈពេលបានសាលាចាត់ឱ្យបង្រៀនបន្ថែមវិញ្ញាសានេះគឺខ្ញុំពេញចិត្តណាស់។ នៅពេលដឹងថា សាកលវិទ្យាល័យត្រាវិញមានបណ្តុះបណ្តាលគ្រូបង្រៀនមុខវិជ្ជាអក្សរសាស្ត្រខ្មែរ ខ្ញុំសម្រេចចិត្តទៅរៀនបន្ថែមបរិញ្ញាបត្រទី២។ ឆ្នាំ២០១៤ ខ្ញុំប្រឡងបញ្ចប់ ហើយក្លាយជាគ្រូបង្រៀនផ្លូវការបង្រៀនភាសាខ្មែររហូតដល់សព្វថ្ងៃ”។

ម៉ោងបង្រៀនភាសាខ្មែររបស់លោកគ្រូឡឹមហ៊ីបប៉ា។

បច្ចុប្បន្ន លោកគ្រូប៉ា ទទួលបន្ទុកបង្រៀនភាសាខ្មែរដល់សិស្សថ្នាក់ទី៦ ទី៩ ហើយបានសាលាប្រគល់ភារៈឱ្យបំប៉នក្រុមជម្រើសសិស្សពូកែផង។ លោកគ្រូប៉ា ឱ្យដឹង៖ “ខ្ញុំទទួលបន្ទុកបង្រៀនថ្នាក់ទី៦ គឺសំដៅសម្រាំងសិស្ស ទើបចូលរៀនដំបូងដើម្បីមានវិធីសាស្ត្របង្រៀនសមស្រប។ ពីព្រោះបច្ចុប្បន្ន ប្រមាណ ៩០% សិស្សចូលរៀនក្នុងថ្នាក់គឺមិនចេះអាន មិនចេះសរសេរអក្សរខ្មែរ ម្ល៉ោះហើយត្រូវមានវិធីសាស្ត្របង្រៀនសមស្រប។ ហេតុដូច្នោះ ខ្ញុំជ្រើសរើសវិធីបង្រៀនប្រកបអក្សរ និយាយពាក្យធម្មតាក្នុងទំនាក់ទំនងប្រាស្រ័យ រីឯសិស្សដែលចេះអក្សរ គឺបង្រៀនតាមកម្មវិធី។ ធ្វើបានដូច្នេះទើបសិស្សចេះនិយាយ ចេះសរសេរអក្សរខ្មែរ។ ថ្នាក់ទី ៩ គឺសំដៅបំប៉នឱ្យប្អូនៗប្រឡងជាប់វិញ្ញាសាខ្មែរ និងមានចំណេះដឹងសម្រាប់ប្រឡងសិស្សពូកែភាសាខ្មែរថ្នាក់ខេត្ត” ដើម្បីមានវិធីសាស្ត្របង្រៀនសមស្រប ជួយសិស្សចេះអាន ចេះសរសេរភាសាខ្មែរ លោកគ្រូប៉ា ថែមទាំងស្រាវជ្រាវសៀវភៅបន្ថែម និងវិធីសាស្ត្របង្រៀនភាសាខ្មែរតាមប្រព័ន្ធអនឡាញទៀតផង។ ទន្ទឹមនឹងនោះ លោកគ្រូស្វែងយល់ស្រាវជ្រាវជាច្រើនពីវចនានុក្រមខ្មែរ-វៀត វៀត-ខ្មែរ ដើម្បីបង្រៀនសិស្សចេះបកប្រែ។ អាស្រ័យហេតុនោះ សិស្សចូលរួមបំប៉នក្នុងក្រុមជម្រើសសិស្សពូកែថ្នាក់ខេត្តកាន់តែច្រើនឡើង។ មកទល់ពេលនេះ លោកគ្រូប៉ា បានបំប៉នសិស្សប្រមាណ ៣០ នាក់ ប្រឡងសិស្សពូកែភាសាខ្មែរថ្នាក់ខេត្តហើយឈ្នះរង្វាន់ខ្ពស់ផង។ ប្អូនត្រឿងធីថាវមី សិស្សថ្នាក់ទី ៩A២ ឱ្យដឹង៖ “លោកគ្រូប៉ា គាត់មានវិធីសាស្ត្របង្រៀនល្អ ឆាប់យល់ ឆាប់ចាំនិងសរសេរអក្សរតិចខុស ម្ល៉ោះហើយប្អូនពេញចិត្តណាស់។ ប្អូនស្ថិតក្នុងចំណោមក្រុមជម្រើសសិស្សពូកែ ហេតុនេះ ក្រៅពីរៀនក្នុងថ្នាក់ លោកគ្រូថែមទាំងជូនឯកសារនិងសៀវភៅស្រាវជ្រាវជាច្រើន ដើម្បីជាជំនួយសម្រាប់ធ្វើតែងសេចក្តីបានល្អ។ សព្វថ្ងៃ ប្អូនមានទុនចំណេះដឹងពាក្យពេចន៍ ដើម្បីត្រៀមបានល្អក្នុងសម័យប្រឡងសិស្សពូកែវិញ្ញាសាខ្មែរថ្នាក់ខេត្តរយៈពេលខាងមុខ”។

លោកគ្រូ លៀងហៀងសឺ នាយកសាលាអនុវិទ្យាល័យជនជាតិអន្តេវាសិកឡុងភូ ឱ្យដឹង៖ “លោកគ្រូឡឹមហ៊ីបប៉ា ជាអ្នកអស់ពីចិត្តចំពោះអាជីព ស្រឡាញ់សិស្សនិងយល់ជ្រៅជ្រះពីភាសាខ្មែរ - បាលី ហេតុនោះមានវិធីសាស្ត្របង្រៀនល្អ សមស្របនឹងសមត្ថភាពរបស់សិស្ស។ ពិសេស លោកគ្រូប៉ា បានបំប៉នសិស្សពូកែៗទទួលបានបណ្ណសរសើរជាច្រើនរបស់គណៈកម្មាធិការប្រជាជនខេត្តសុកត្រាំង”៕

យ្វីអាញ- លីសៀ

ចែករំលែកអត្ថបទ

ពាក្យគន្លឹះ