មហាសាមគ្គីជនជាតិ គំរូក្នុងសហគមន៍

30/09/2024 - 14:37

បានជួយដល់មនុស្សច្រើនគ្នាគឺជាក្តីសុខបំផុត!

ទោះបីអាយុ ៧៤ ឆ្នាំក៏ពិតមែន ប៉ុន្តែអ៊ំស្រីឡឹមអាញ់ង្វៀក នៅឃុំឡាកគ្វើយ ស្រុកទ្រីតូង ខេត្តអាងយ៉ាង នៅតែចូលចិត្តធ្វើសកម្មភាពសប្បុរសធម៌សង្គមនៅឡើយ។ ដូចដែលអ៊ំស្រី ឱ្យដឹង៖“ បានជួយដល់មនុស្សច្រើនគ្នាគឺជាក្តីសុខបំផុត ! ” ។

អ៊ំស្រីឡឹមអាញ់ង្វៀក។

អ៊ំស្រីឡឹមអាញ់ង្វៀក រៀបរាប់៖ ខណៈពេលជីវភាពគ្រួសារបានលំនឹង កូនទាំង ៤ នាក់ក៏មានវ័យវឌ្ឍនាការ និងមានមូលដ្ឋាន អាជីវកម្ម គាត់ចាប់ផ្តើមធ្វើការងារសប្បុរសធម៌ នៅកន្លែងគ្រឹះស្ថានសម្ភារៈកសិកម្មអាញ់ង្វៀក នៅឃុំឡាកគ្វើយ។ ដំបូង អ៊ំស្រីធ្វើការងារសប្បុរសធម៌តែថ្ងៃពេញបូណ៌មី និងនាឱកាសបុណ្យចូលឆ្នាំថ្មីវៀតណាម។ កាលនោះ គាត់ប្រើឱ្យកូនចៅជ្រើសរើសនិងដើរចែកចាយលិខិតណាត់ដល់គ្រួសារក្រីក្រ អ្នកដែលមានជីវភាពខ្វះខាត ឬឈឺថ្កាត់លើភូមិសាស្ត្រឃុំ ដែលគ្រួសារគាត់ធ្លាប់ស្គាល់។ លុះដល់ថ្ងៃសន្យា អ៊ំស្រីទិញអង្ករជូនមាមីងក្នុងម្នាក់ចាប់ពី ៥-១០ គ.ក ដើម្បីចែករំលែកដល់មាមីងក្នុងពេលលំបាក មានអាសន្ន។ រួចហើយ អ៊ំស្រីប្រគេនវត្ថុធាតុដើម (ប្រេងឥន្ធនៈ) នៅតាមវត្តលើភូមិសាស្ត្រស្រុក; ឧបត្ថម្ភអង្ករ ១ តោន ក្នុងថ្ងៃពេញបូណ៌ខែ៧ (ចន្ទគតិវៀតណាម) មីកញ្ចប់ជូនគ្រួសារក្រីក្រ គ្រួសារមានជីវភាពខ្វះខាត; គួបផ្សំនឹងក្រុមហ៊ុនទទួលខុសត្រូវមានកម្រិត Newtech Crop Science ជូនអាហារូបករណ៍ ១៥ ចំណែកដល់សិស្សវិទ្យាល័យបាជុក ក្នុងមួយចំណែក ១,៥ លានដុង រួមមាន៖ កាបូបសិស្ស សៀវភៅសរសេរ និងទឹកប្រាក់ ៥០០.០០០ ដុង។ ជារៀងរាល់ឆ្នាំ ឱ្យតែដល់ពិធីបុណ្យត្រុងធូ គ្រួសារអ៊ំស្រីតែងជូននំរាប់សិបចំណែកដល់សិស្សមានជីវភាពខ្វះខាត និងអាទិភាពដល់សិស្សជនជាតិខ្មែរ៘

អ៊ំស្រីឡឹមអាញ់ង្វៀក ក្នុងឱកាសជូនអំណោយជំរុញដំណើរប្អូនទៅសាលា
នៅឃុំឡាកគ្វើយ ស្រុកទ្រីតូង ខេត្តអាងយ៉ាង។

ក្នុងរយៈពេលដែលផ្ទុះជំងឺ COVID-១៩ ទន្ទឹមនឹងការផ្តល់ជូនមីកញ្ចប់ អង្ករ និងទឹកសុទ្ធដល់មាមីងក្នុងភូមិ គ្រួសារអ៊ំស្រីង្វៀក ថែមទាំងឱ្យភូមិភាគខ្ចីយានយន្តធ្វើជាមធ្យោបាយទៅមក ជំនួយស្បៀងអាហារតាមទីតាំងផ្សេងៗដែលធ្វើចត្តាឡីសក័ទៀតផង។ ថ្មីៗនេះ គ្រួសារអ៊ំស្រីបានទិញរថយន្តសង្គ្រោះជាបន្ទាន់មួយគ្រឿង សម្រាប់ការដឹកអ្នកជំងឺដោយឥតគិតថ្លៃដល់មាមីងដែលមានជីវភាពខ្វះខាតនៅភូមិភាគផងដែរ។ ព្រមជាមួយនោះ សហការជាមួយកាសែតកឹងធើនិងប៉ុស្តិ៍ការពារព្រំដែនឡាកគ្វើយ រៀបចំកម្មវិធី “ជំរុញដំណើរប្អូនទៅសាលា” - ជូនកង់ ៣០ គ្រឿង ទឹកប្រាក់ ៣០០.០០០ ដុងដល់សិស្សក្រីក្រលើភូមិសាស្រ្តឃុំនិងឧបត្ថម្ភទឹកប្រាក់ទិញធានារ៉ាប់រងសុខាភិបាលឱ្យសិស្សានុសិស្សដែលប៉ុស្តិ៍ការពារព្រំដែនឡាកគ្វើយទទួលគាំពារ។

អ៊ំស្រី ឡឹមអាញ់ង្វៀក ចែករំលែក៖ កាលពីកុមារភាពអ៊ំស្រីក្រលំបាកណាស់ គ្រួសារមានបងប្អូនច្រើន រៀនសូត្រមិនបានជ្រៅជ្រះនឹងគេ (រៀនបានតែថ្នាក់ទី ៤ សាលានៅភូមិ)។ អាយុ ១៩ ឆ្នាំ មានប្តី រួចហើយមានកូនជាបន្តបន្ទាប់ លុះដល់ឆ្នាំ ១៩៧៨ ប្តីស្លាប់ត្រូវពួកប៉ុលពតសម្លាប់ បន្សល់ទុកកូន ៣ នាក់ដែលមិនទាន់ដឹងក្តី ហើយអ៊ំស្រី កំពុងមានផ្ទៃពោះកូនពៅ ៣ ខែកន្លះទៀតផង។ កាលនោះ អ៊ំស្រីង្វៀកទើបតែអាយុបាន ២៩ ឆ្នាំប៉ុណ្ណោះ។ ទោះបីរៀនសូត្របានតិចតួចក៏ពិតមែន ប៉ុន្តែជីវភាពបានជំរុញឱ្យអ៊ំស្រីរៀនសូត្របានឆាប់រហ័សអំពីដំណើរជីវិត ម្ល៉ោះហើយកសាងបានមូលដ្ឋានរកស៊ីដូចសព្វថ្ងៃនេះ។ ដំណើរជីវិតបានឆ្លងកាត់នូវដំណាក់កាលក្រលំបាកផ្ទួនៗ ប៉ុន្តែ អាស្រ័យដោយមោះមុតដូចអ៊ំស្រីបានពោលថា “បុណ្យចាស់ជួយទំនុកបម្រុង” ទើបអ៊ំស្រីមានសុខភាពដើម្បីគិតគូរពលកម្មរកប្រាក់កាសផង និងចិញ្ចឹមកូនៗបានធំដឹងក្តីផង។ អាស្រ័យហេតុនោះ សព្វថ្ងៃជីវភាពបានលំនឹង អ៊ំស្រីង្វៀក មានបំណងចូលរួមសកម្មភាពមនុស្សធម៌ ជួយមាមីងក្រលំបាក និងអ្នកមានជីវភាពខ្វះខាតជាដើម។ ដ្បិតអី “ក្នុងពេលបានជួយដល់មនុស្សច្រើនគ្នា គឺខ្ញុំមានក្តីសុខបំផុត” អ៊ំស្រីង្វៀក បានឱ្យដឹងដូច្នេះ៕

គីមស្វឹង-លីសៀ

ចែករំលែកអត្ថបទ

ពាក្យគន្លឹះ