មហាសាមគ្គីជនជាតិ គំរូក្នុងសហគមន៍

19/08/2024 - 16:33

អស់ពីព្រះទ័យដើម្បីសាសនានិងសង្គម

ព្រះឧបជ្ឈាយ៍ ហ៊ឺវហ៊ិញ ព្រះចៅអធិការវត្តឃោសិតារាម ឃុំហឹងហោយ ស្រុកវិញឡើយ ខេត្តបាកលីវ តែងអស់ពីព្រះទ័យដើម្បីសាសនានិងសង្គម ម្ល៉ោះហើយ បានព្រះសង្ឃនិងពុទ្ធបរិស័ទគោរពរាប់អាន។

ព្រះឧបជ្ឈាយ៍ ហ៊ឺវហ៊ិញ (ព្រះអង្គទី២ខាងឆ្វេង) ទទួលអំណោយអំណរបុណ្យចូលឆ្នាំថ្មីពីគណៈកម្មាធិការរណសិរ្សមាតុភូមិវៀតណាមដោវ៉ាន់ចៀង។

ព្រះតេជព្រះគុណ តាំងសាវង្ស អនុប្រធានសមាគមព្រះសង្ឃសាមគ្គីស្នេហាជាតិខេត្តបាកលីវ មានថេរដីកា៖ “ព្រះឧបជ្ឈាយ៍ ហ៊ឺវហ៊ិញ តែងយកព្រះទ័យទុកដាក់គិតគូរការងារសាសនា ការងារសង្គម និងគិតគូរដល់ការអភិវឌ្ឍរបស់សមាគម។ ចំពោះវត្តអារាម ព្រះអង្គតែងគិតគូរកសាងយ៉ាងសមរម្យ បង្កលក្ខណសម្បត្តិដល់ព្រះសង្ឃបួសក្នុងវត្តរៀនសូត្រធម៌អាថ៌ អក្សរសាស្រ្តជាដើម។ ក្រៅពីនោះ ព្រះអង្គក៏យកព្រះទ័យទុកដាក់យ៉ាងខ្លាំងលើការរៀនសូត្ររបស់កូនចៅពុទ្ធបរិស័ទក្នុងចំណុះជើងវត្ត។ អស់រយៈពេលជាច្រើនឆ្នាំកន្លង វត្តតែងបើកថ្នាក់បង្រៀនអក្សរខ្មែរ ភាសាបាលី ធម្មវិន័យ ជូនដល់ព្រះសង្ឃនិងកូនចៅជនរួមជាតិខ្មែរ”។

ព្រះឧបជ្ឈាយ៍ ហ៊ឺវហ៊ិញ (ខាងស្ដាំ) ទទួលប័ណ្ណសរសើររបស់គណៈកម្មាធិការប្រជាជនខេត្តបាកលីវ ដោយមានស្នាដៃឆ្នើមក្នុងការងារសមាគមព្រះសង្ឃសាមគ្គីស្នេហាជាតិខេត្ត។

យោងតាមថេរដីកា ព្រះឧបជ្ឈាយ៍ ហ៊ឺវហ៊ិញ ឆ្នាំ ១៩៨៩ ព្រះអង្គបានទទួលនិមន្តពីវត្តសិរីមានជ័យខេត្តកាម៉ាវ មកធ្វើព្រះចៅអធិការនៅវត្តឃោសិតារាម រហូតមកទល់បច្ចុប្បន្ន។ ពេលមកទីនេះ ព្រះអង្គបានបើកថ្នាក់បង្រៀនអក្សរខ្មែរ ភាសាបាលី ធម្មវិន័យជូនដល់ព្រះសង្ឃនិងកូនចៅជនរួមជាតិខ្មែរក្នុងចំណុះជើងវត្ត។ ចំណែកក្នុងឱកាសវិស្សមកាល ក៏និមន្តចុះទៅតាមភូមិដែលមានជនរួមជាតិខ្មែររស់នៅកុះករដើម្បីបង្ហាត់បង្រៀន ម្ល៉ោះហើយកូនចៅជនរួមជាតិខ្មែរនៅតំបន់ឃុំហឹងហោយ ចេះអានចេះ សរសេរអក្សរខ្មែរសឹងគ្រប់គ្នា។ មកទល់បច្ចុប្បន្ន មានកូនចៅជនរួមជាតិខ្មែររាប់រយនាក់បានប្រឡងបញ្ចប់សញ្ញាបត្រមហាវិទ្យាល័យ អនុមហាវិទ្យាល័យ និងមធ្យមសិក្សា ហើយកំពុងបំពេញការងារក្នុងស្ថាប័នរដ្ឋជាច្រើននៅថ្នាក់ស្រុក ខេត្តនិងមជ្ឈិម។

ក្នុងតួនាទីជាប្រធានសមាគមព្រះសង្ឃសាមគ្គីស្នេហាជាតិខេត្ត ព្រះឧបជ្ឈាយ៍ ហ៊ឺវហ៊ិញ ក៏បានអំពាវនាវដល់វត្តនានាបើកថ្នាក់បង្រៀនអក្សរខ្មែរ ដើម្បីកូនចៅជនរួមជាតិខ្មែរបានរៀនក្នុងឱកាសវិស្សមកាល រួមចំណែកក្នុងការថែរក្សាភាសានិងអក្សរសាស្រ្តរបស់ជនជាតិផងខ្លួន។ ទន្ទឹមនឹងនោះ ព្រះអង្គបានឃោសនា កៀរគរជនរួមជាតិខ្មែរអនុវត្តល្អនូវគោលការណ៍ គោលមាគ៌ារបស់បក្ស គោលនយោបាយ ច្បាប់របស់រដ្ឋ។ ព្រះឧបជ្ឈាយ៍ ហ៊ឺវហ៊ិញ មានថេរដីកា៖ “អាត្មាភាពបានអានសៀវភៅជាច្រើនរបស់លោកប្រធានហូជីមិញ ជាមួយនឹងការងារសាសនា ជនជាតិ ដោយមានចំណុចជាច្រើនដែលស្រដៀងគ្នានឹងទ្រឹស្ដីពុទ្ធសាសនា។ ពីព្រោះព្រះពុទ្ធតែងប្រៀនប្រដៅមនុស្សឱ្យរស់នៅប្រតិបត្តិល្អការងារសាសនា អនុវត្តល្អការងារសង្គម មិនសាងអំពើបាប ធ្វើការមានប្រយោជន៍ជូនសង្គម។ អាស្រ័យហេតុនោះ អាត្មាភាពតែងរំលឹកដល់ពុទ្ធបរិស័ទឱ្យរស់នៅសាមគ្គី កសាងអំពើល្អ ធ្វើការមានប្រយោជន៍ជូនសង្គមនិងគ្រួសារ ជាពិសេសគឺគិតគូរឱ្យកូនៗ រៀនសូត្របានត្រឹមត្រូវ មានតែដូច្នោះទើបជួយដល់វង្សត្រកូល ភូមិស្រុក សង្គមកាន់តែរីកចម្រើន”។

ទន្ទឹមនឹងនោះ ព្រះឧបជ្ឈាយ៍ ហ៊ឺវហ៊ិញ នៅទាំងកៀរគរគណៈកម្មការនៅតាមវត្តខ្មែរនានាលើភូមិសាស្រ្តឃុំហឹងហោយ សហការជាមួយនឹងនគរបាលឃុំ បង្កើត “ក្លិប៣សកម្មក្នុងជនរួមជាតិខ្មែរ”។ មកទល់បច្ចុប្បន្ន មានរយៈពេល ១០ ឆ្នាំសកម្មភាព ក្លិបបានក្លាយជា “ជំនួយការ” របស់កម្លាំងនគរបាលក្នុងការងារធានាសន្តិសុខសណ្ដាប់ធ្នាប់នៅភូមិស្រុក។ សមាជិកទាំងឡាយក្នុងក្លិបបានសកម្មកៀរគរជនរួមជាតិខ្មែរ ចូលរួមចលនាទូទាំងប្រជាជនការពារសន្ដិសុខមាតុភូមិ ដោះស្រាយជម្លោះក្នុងវង្សត្រកូល កៀរគរប្រជាជនសកម្មចូលរួមបង្ការប្រឆាំង និងថ្កោលទោស កសាងទំនាក់ទំនងសាមគ្គីនិងជួយគ្នាទៅវិញទៅមកក្នុងជីវភាព៕

យ្វីអាញ់ - ថាច់ធី

ចែករំលែកអត្ថបទ

ពាក្យគន្លឹះ