មហាសាមគ្គីជនជាតិ គំរូក្នុងសហគមន៍

05/02/2024 - 12:51

ធ្វើមានផ្ដើមពីការដាំត្រសក់ផ្អែម

ដោយមហិច្ឆតាចង់ធ្វើមានយុវវ័យ ង្វៀងហ្វាងយ្វី នៅភូមិកៀកប៊ិញ ឃុំឡឹមកៀក ស្រុកថាញ់ទ្រី ខេត្តសុកត្រាំង បានសម្រេចចិត្តបោះបង់ការងារវិលត្រឡប់មកផ្ទះដាំត្រសក់ផ្អែម ហើយសព្វថ្ងៃក្លាយជាសេដ្ឋីវ័យក្មេង។

ទម្រង់ដាំត្រសក់ផ្អែមរបស់ង្វៀងហ្វាងយ្វី។

ឆ្នាំ២០១២ ពេលប្រឡងបញ្ចប់វិស្វករដាំដុះ ហ្វាងយ្វី ធ្វើការឱ្យក្រុមហ៊ុនជី។ អស់រយៈពេលច្រើនឆ្នាំឃ្លាតឆ្ងាយពីផ្ទះ មិនឃើញសេសសល់ប៉ុន្មាន ទើបបងសម្រេចចិត្តវិលត្រឡប់មកស្រុកកំណើតធ្វើមានលើផ្ទៃដីរបស់គ្រួសារវិញ។ ក្រោយពីឈប់សម្រាកការងារនៅឆ្នាំ ២០១៩ ហ្វាងយ្វីបានចល័តគ្រប់ខេត្ត ដូច៖ ហូវយ៉ាង តៀងយ៉ាង ឡុងអាង សុកត្រាំង ៘ ដើម្បីទស្សនាស្វែងយល់ពីទម្រង់ដាំត្រសក់ផ្អែម ក្នុងផ្ទះសំណាញ់ និងស្វែងរកសៀវភៅអានពីបច្ចេកទេសដាំដុះ ថែទាំត្រសក់ផ្អែម។ ឆ្នាំ២០២០ ខណៈពេលក្តាប់បាននូវបច្ចេកទេសនិងរបៀបដាំត្រសក់ផ្អែម ហ្វាងយ្វី បានវិនិយោគសង់ផ្ទះសំណាញ់លើផ្ទៃដី ១.២០០ ម៉ែត្រការ៉េដំឡើង ប្រព័ន្ធស្រោចស្រពតំណក់លើដំណាំត្រសក់ផ្អែមជាង ៣.២០០ ទង។ ហ្វាងយ្វី ឱ្យដឹង៖ “ខ្ញុំគិតថាវ័យនៅក្មេង ប្រសិនបើវិនិយោគបរាជ័យគឺធ្វើឡើងវិញ អ្វីដែលសំខាន់គឺមានទឹកចិត្តប្តេជ្ញា និងចំណង់ចំណូលចិត្តនោះ គឺការងារអាចនឹងជោគជ័យជាមិនខាន។ ក្នុងរយៈពេលដាំ ខ្ញុំមើលថែដោយផ្ទាល់តាំងពីរបៀបថែទាំ ហេតុនោះ តាំងពីរដូវដាំដំបូង ត្រសក់របស់ខ្ញុំក៏បានផល និងលក់ដាច់តែម្តង។ ម្យ៉ាងទៀត ត្រសក់ផ្អែមខ្ញុំដាំតាមបែបសរីរាង្គវត្ថិភាព ហេតុនោះ ផ្លែគុណភាពស្រួយផ្អែមឆ្ងាញ់ អតិថិជនពេញនិយម”។

ង្វៀងហ្វាងយ្វី ឧទ្ទេសនាមពីរបៀបដាំត្រសក់ផ្អែមដល់គណៈប្រតិភូរបស់ឧត្តមសេនីយ៍ឯកបម្រុង ត្រឹងក្វាងភឿង សមាជិកមជ្ឈិមបក្ស អនុប្រធានរដ្ឋសភា អញ្ជើញទស្សនាផ្សារណាត់។

បើតាមហ្វាងយ្វី ពេលក្តាប់ច្បាស់ពីបច្ចេកទេសដាំដុះ គឺត្រសក់ដែលដាំក្នុងផ្ទះសំណាញ់តែងធានាទិន្នផល។ ចំណុចសំខាន់គឺអ្នកដាំត្រូវមើលថែដោយផ្ទាល់ ឆ្លងកាត់រដូវដាំដុះដើម្បីដកបទពិសោធន៍ពីរបៀបថែទាំ ដូច៖ ដាក់ជី ស្រោចទឹក ប្រឡេះក្តឹប ៘ សម្រាប់រដូវក្រោយៗទៀត។ អាស្រ័យហេតុនោះ ក្រោយពីរយៈពេលដាំបាន ៣ រដូវ ហ្វាងយ្វី ក៏ក្តាប់បានបច្ចេកទេសដាំត្រសក់ផ្អែមក្នុងដៃ ហេតុនោះផ្ទះសំណាញ់មួយល្វែង ១.២០០ ម៉ែត្រការ៉េ សម្រេចទិន្នផលចាប់ពី ៤-៥ តោន/រដូវ។ ហ្វាងយ្វី ឱ្យដឹង៖ “គ្រាប់ពូជមុននឹងដាំ ត្រូវត្រាំទឹកក្នុងរយៈពេល៤ម៉ោង (ទឹកក្តៅ២ភាគ + ទឹកត្រជាក់៣ ភាគ)។ បន្ទាប់មកលាងឱ្យជ្រះហើយយកគ្រាប់ទៅផ្អាប់ក្នុងកន្សែង រយៈពេល ២០ ម៉ោង រហូតដល់គ្រាប់មៀមយកទៅបណ្តុះរហូតដល់ចេញស្លឹកពីរសឹមយកទៅដាំ។ ក្នុងមួយទងទុកមួយផ្លែ ដើម្បីឱ្យទងលូតលាស់ល្អ ហើយចន្លោះក្នុងមួយម៉ោងត្រូវស្រោចទឹកម្តង ស្រោចរយៈពេលពី ៥-៧ នាទី (បញ្ជាប្រព័ន្ធស្រោចស្រពដែលមានស្រាប់)។ រយៈពេលលូតលាស់របស់ត្រសក់ផ្អែមរហូតដល់ប្រមូលផលគឺ ២,៥ ខែ ម៉្លោះហើយខ្ញុំដាំបាន ៤ រដូវ/ឆ្នាំ”។

បច្ចុប្បន្ន ហ្វាងយ្វី លក់ត្រសក់ផ្អែមឱ្យឈ្មួញក្នុងតម្លៃពី ៤០.០០០ - ៤៥.០០០ដុង/គ.ក ដោយឡែកត្រសក់ដែលដាក់សែនបុណ្យចូលឆ្នាំថ្មីវៀតណាម តម្លៃពី៣៥០.០០០ - ៤០០.០០០ ដុង/គ.ក (ត្រសក់ដែលមានឆ្លាក់អក្សរ)។ ជាមួយនឹងផ្ទៃដីដំបូងជាង ១.២០០ ម៉ែត្រការ៉េ សព្វថ្ងៃ ហ្វាងយ្វី បានពង្រីកផ្ទៃដីដាំដុះដល់ទៅ៣.០០០ ម៉ែត្រការ៉េ។ ជាមួយតម្លៃលក់នេះ មធ្យមភាគ ហ្វាងយ្វីចំណេញបានជាង ១ ពាន់លានដុង/ឆ្នាំ។ លោកស្រី ត្រឹងធីភឿងថាវ អនុលេខាសម្ព័ន្ធយុវជនឃុំឡឹមកៀក ឱ្យដឹង៖ “ង្វៀងហ្វាងយ្វី ជាសម្ព័ន្ធយុវជនជនជាតិខ្មែរតែម្នាក់គត់របស់ឃុំដែល “ហ៊ានគិតហ៊ានធ្វើនិងហ៊ានវិនិយោគដើម្បីធ្វើមាន”។ ពិសេសទម្រង់ដាំត្រសក់ផ្អែមក្នុងផ្ទះសំណាញ់របស់ហ្វាងយ្វី ផ្ដល់ប្រសិទ្ធភាពសេដ្ឋកិច្ចខ្ពស់ ហើយជាទម្រង់គំរូត្រូវបានយុវជនខ្មែរជាច្រើនមកទស្សនារៀនសូត្រ។ ចុងឆ្នាំ២០២៣ ត្រសក់ផ្អែមសម្រេចស្តង់ដារ OCOP ហើយត្រូវបានសម្ព័ន្ធយុវជនឃុំឧបត្ថម្ភបុលទុនអនុគ្រោះចំនួនទឹកប្រាក់ ១០០ លានដុង អាចនឹងជួយឱ្យហ្វាងយ្វី ពង្រីកផ្ទះសំណាញ់ និងបង្កើតយីហោ នាំផលិតផលឱ្យកាន់តែមានឈ្មោះបោះសំឡេងថែមទៀត”៕

យ្វីអាញ- លីសៀ

ចែករំលែកអត្ថបទ

ពាក្យគន្លឹះ