មហាសាមគ្គីជនជាតិ ភូមិស្រុកផ្លាស់ថ្មី

18/09/2023 - 14:06

ដងផ្លូវសប្បាយរីករាយ

លោក ង្វៀងវ៉ាន់ហុង លេខាសាខាបក្ស និងជាប្រធានភូមិទ្រឿងថាំង ឃុំទ្រឿងឡុង A ស្រុកចូវថាញ់ A ខេត្តហូវយ៉ាង ហៅដងផ្លូវកាត់ទទឹងភូមិជាផ្លូវសប្បាយរីករាយ។ ព្រោះផ្លូវនេះ នាំមកភាពងាយស្រួលជូនប្រជាជននៅភូមិដែលមានជនរួមជាតិខ្មែររស់នៅច្រើនកុះករ។

លោកហុង និងមាមីងនៅទីនេះហៅដងផ្លូវនេះថា “ផ្លូវសប្បាយរីករាយ” ពីព្រោះពេលនាំគ្នាចេញដកស្មៅបោសសម្អាតនិងពេលធ្វើដំណើរលើដងផ្លូវស្អាតបាត អ្នកណាក៏មានភាពសប្បាយរីករាយ។

ដូចភូមិសាស្ត្រនានានៅខេត្តហូវយ៉ាង ឃុំទ្រឿងឡុង A មានជនរួមជាតិខ្មែររស់នៅលាយឡំជាមួយជនជាតិដទៃៗនៅភូមិទ្រឿងថាំង។ រយៈពេលកន្លង ភូមិទ្រឿងថាំងបានទទួលផលពីគោលនយោបាយអាទិភាពពិសេសដោយឡែករបស់រដ្ឋសម្រាប់ជនរួមជាតិភាគតិច។ លោកង្វៀងវ៉ាន់ហុង រៀបរាប់៖ “ភូមិទ្រឿងថាំង គឺជាភូមិដំបូងដែលមានស្ថានីយផ្គត់ផ្គង់ទឹកស្អាត។ ផ្លូវបេតុង សាលារៀនរឹងមាំ ក៏បានកសាងរួចរាល់លឿនជាងភូមិដទៃ។ មូលហេតុ អាស្រ័យភូមិបានទទួលផលពីកម្មវិធី ១៣៥ របស់រដ្ឋសម្រាប់ជនរួមជាតិភាគតិច”។

សាខាសមាគមនារីភូមិទ្រឿងថាំង រៀបចំដាំផ្កាដកឃឹមតាមដងផ្លូវ។

អាស្រ័យមានហេដ្ឋារចនាសម្ព័ន្ធបានទទួលផលពីកម្មវិធី គម្រោងដាច់ដោយឡែក ម៉្លោះហើយ ពេលភូមិភាគកសាងជនបទថ្មី ជនបទកម្រិតខ្ពស់ ភូមិទ្រឿងថាំងមានភាពងាយស្រួលច្រើន។ តាមប្រសាសន៍លោក ង្វៀងវ៉ាន់ហុង ជាមួយនឹងមូលដ្ឋានគ្រឹះដែលមានស្រាប់ ភូមិភាគវិនិយោគលើកកម្ពស់គុណភាពផ្នែកសំណង់ គឺអាចនឹងសម្រេចលក្ខឋាន។ តួយ៉ាងដូច ផ្លូវដានកាត់ទទឹងភូមិក្បែរប្រឡាយកិញតេ ត្រូវបានពង្រីកបន្ថែមតាមលក្ខឋានជនបទថ្មី។ ពេលសេដ្ឋកិច្ចមានភាពលំនឹង ប្រជាជនជាច្រើនគ្រួសារជួសជុលផ្ទះសម្បែងស្អាតបាត ធ្វើរបង រួមវិភាគទានជាមួយភូមិភាគធ្វើបង្គោលទង់ ដាក់អំពូលភ្លើង ដាំផ្កាលម្អសងខាងផ្លូវ ។ល។ យូរៗ ក្លាយជាទម្លាប់ឱ្យតែឃើញស្មៅដុះគ្របផ្កា ប្រជាជននាំគ្នាដកស្មៅសម្អាតផ្លូវឱ្យភ្លឺ-បៃតង-ជ្រះ- ស្អាត។ ពេលធ្វើពលកម្មរួម មាមីងចេញកុះករ ពួកគាត់ធ្វើបណ្តើរជជែកគ្នាបណ្តើរ ផ្ទុះសំណើចក្អាកក្អាយ ញុាំងឱ្យស្មារតីសាមគ្គីកាន់តែស្អិតល្មួត។

បងឌាំងវ៉ូវ ជាជនជាតិខ្មែរ កើតនិងធំដឹងក្តីនៅភូមិទ្រឿងថាំង។ ហេតុដូច្នេះ ការផ្លាស់ប្តូររបស់ភូមិនេះ គាត់ជាអ្នកយល់ច្បាស់ហើយ ដឹងគុណចំពោះការវិនិយោគរបស់រដ្ឋ។ បងវ៉ូវ រៀបរាប់៖ “គ្មានអ្នកណានឹកស្មានថា តំបន់សេដ្ឋកិច្ចថ្មីពីមុន អាចរីកចម្រើនបានដូចសព្វថ្ងៃ។ ចំពោះគ្រួសារខ្ញុំ អាស្រ័យប្រភពទុនឧបត្ថម្ភបង្កើតមុខរបររកស៊ីរបស់រដ្ឋ ខ្ញុំយកទៅវិនិយោគ ទិញម៉ាស៊ីនបូមទឹកធ្វើសេវាកម្ម។ ផ្តើមពីម៉ាស៊ីន បូមទឹកនេះ ខ្ញុំរកបានប្រាក់ចំណូលដើម្បីកែលម្អសេដ្ឋកិច្ចគ្រួសារ ជម្នះលំបាក ឈានឡើងជីវភាពធូរធារ”។

លោកហុង ឱ្យដឹងបន្ថែម៖ “ប្រជាជនភូមិទ្រឿងថាំងប្តេជ្ញាចិត្តកសាងជនបទថ្មីគំរូ។ មូលដ្ឋានគ្រឹះលើកនេះ គឺលុបបំបាត់គ្រួសារក្រីក្រ ដូច្នេះ ជឿជាក់ថាទិសដៅសម្រេចបទដ្ឋានភូមិជនបទថ្មីគំរូ នឹងមិនយូរប៉ុន្មានទេ”៕

ហាថាញ់-មុនី

ចែករំលែកអត្ថបទ

ពាក្យគន្លឹះ