12/04/2022 - 10:22

នំអន្សមជ្រូក​ត្រា​កួង​សម្រេច​ OCOP ផ្កាយ ៣

មូល​ដ្ឋាន​វេច​នំអន្សម​ជ្រូក​ត្រា​កួង មាន​ផ្លាក​យីហោ​ជិញ​យីរបស់​គ្រួ​សារ​បង​ស្រី​ ថាច់​ធីយី នៅ​ភូមិ​ហ្វា​ហាវ ឃុំ​ភឿក​ហាវ ស្រុក​ចូវ​ថាញ់ ខេត្ត​ត្រា​វិញ​ ទើប​បាន​ទទួល​ស្គាល់​សម្រេច​ OCOP ផ្កាយ ៣ ។​ នេះ​ជាប្រ​ការ​ដែល​មនុស្ស​ជាច្រើន​បាន​រំពឹង​ទុក​ ព្រោះ​នំអន្សម​ជ្រូក​ជិញ​យី មាន​រស​ជាតិ​ឈ្ងុយ​ឆ្ងាញ់​ ល្បី​សុស​សាយ​គ្រប់​ទិស​ទី​។​

បង​ស្រី​ ថាច់​ធីយី (ជិញយី) ទទួល​វិញ្ញា​បនបត្រ​ទទួល​ស្គាល់​ផលិត​ផល​ សម្រេច​ OCOP ផ្កាយ ៣ របស់​គណៈ​កម្មា​ធិការ​ប្រ​ជា​ជន​ខេត្ត​ត្រា​វិញ​។​

រៀង​រាល់​ថ្ងៃ​ គ្រួ​សារ​បង​ស្រី​ជិញ​យី លក់​បាន​ពី​ ២០០-៣០០ នំ ហើយ​នំដែល​គាត់​វេច​នេះ​មាន​ទម្ងន់​ពី​ ៧០០ក្រាម​ដល់​ ១,២ គីឡូ​ក្រាម​។​ ក្នុង​ឱកាស​ថ្ងៃ​បុណ្យ​ទាន​ជន​ជាតិ​វៀត​ណាម គាត់​អាច​លក់​បាន​រាប់​ពាន់​នំឯណោះ​។​ នំអន្សម​ជ្រូក​ជិញ​យី មាន​ពណ៌​ច្រើន​គួរ​ឱ្យ​ទាក់​ទាញ​ មាន​រស​ជាតិ​ឈ្ងុយ​ឆ្ងាញ់​ តម្លៃ​ចាប់​ពី​ ៦០.០០០-៨០.០០០ ដុង​ក្នុង​នំមួយ​។​ នំមាន​រស​ជាតិ​ឈ្ងុយ​ឆ្ងាញ់​ អតិថិ​ជន​តែង​និយម​ចូល​ចិត្ត​ ទើប​មូល​ដ្ឋាន​នំអន្សម​ជ្រូក​ជិញ​យី មាន​កម្ម​ករ​ជិត​ ២០ នាក់​ធ្វើ​ការ​ជា​ប្រ​ចាំ​ និង​រក​បាន​ប្រាក់​ចំ​ណូល​ក្នុង​មួយ​ថ្ងៃ​ពី​ ២០០.០០០-៣០០.០០០ ដុង​។​

នំអន្សម​ជ្រូក​ជិញ​យី បាន​អតិថិ​ជន​វាយ​តម្លៃ​ខ្ពស់​ពី​គុណ​ភាព​និង​រស​ជាតិ​ នំអាច​ទុក​ពិសា​បាន​យូរ​ថ្ងៃ​។​ វត្ថុ​ធាតុ​ដើម​មាន​ដូច​ជា​ អង្ករ​ដំ​ណើប សណ្ដែក​បាយ សាច់ជ្រូក​បី​ជាន់​ ពង​ទា​ប្រៃ​ជា​ដើម​។​ នំអន្សម​ជ្រូក​ជិញ​យី វេច​តាម​បែប​ប្រ​ពៃណី​ ហើយ​ស្ងោរ​ដោយ​ចង្ក្រាន​ដុត​ឱស។​ កម្ម​ករ​ពេល​ចូល​កន្លែង​វេច​នំ ត្រូវ​អនា​ម័យត្រឹម​ត្រូវ​ ពាក់​ស្រោម​ដៃ​ ពាក់​ម៉ាស់ សំ​ដៅ​ធានា​អនា​ម័យ​សុវត្ថិ​ភាព​ចំ​ណី​អា​ហារ។​ នៅ​ពេល​ស្ងោរ​ឆ្អិន នំត្រូវ​បាន​ដាក់​ចូល​ថង់ ប្រើ​ម៉ាស៊ីន​ប៊ឺត ខ្យល់​អ៊ុត​មាត់​ថង់ និង​បិទ​ស្លាក​សញ្ញា​ ដើម្បី​ងាយ​ស្រួល​ក្នុង​ការ​ដឹក​ជញ្ជូន​ និង​រក្សា​ទុក​បាន​យូរ​ថ្ងៃ​។​

 បង​ស្រី​ថាច់​ធីយី ត្រៀម​ដាក់​នំស្ងោរ​។​

បង​ស្រី​ថាច់​ធីយី ម្ចាស់​មូល​ដ្ឋាន​នំអន្សម​ជ្រូក​ជិញ​យី ឱ្យ​ដឹង​៖ “ខ្ញុំ​គ្រោង​ទុក​ថា​ នៅ​ពេល​ខាង​មុខ​នឹង​ពង្រីក​អា​ជីវ​កម្ម​បន្ថែម​ ដោយ​យក​ផលិត​ផល​ទៅ​ដាក់​តាំង​នៅ​តាម​មណ្ឌល​ទេស​ចរណ៍ សម្រាប់​ភ្ញៀវ​ទេស​ចរ​ទស្សនា​និង​ទិញ​នំ។​ ទន្ទឹម​នឹង​នោះ​ ពង្រីក​ប​ន្ថែម​ដេប៉ូ​ចែក​ ចាយ​នៅ​តាម​ខេត្ត​ ក្រុង​ក្នុង​តំ​បន់​ ដើម្បី​ផ្សព្វ​ផ្សាយ​ផលិត​ផល​នំដល់​អតិថិ​ជន​ជិត​ឆ្ងាយ​បាន​ដឹង​ឮ​។​ ផ្ដើម​ពី​នោះ​ បង្កើត​បាន​ការ​ងារ​ធ្វើ​និង​ប្រាក់​ចំ​ណូល​លំ​នឹង​ដល់​មាមីង​នៅ​ភូមិ​ ស្រុក​”។​ បង​ថាច់​សុភា​ នៅ​ភូមិ​ធ្លក​ទទឹង ឃុំ​កីម​ហ្វា ឱ្យ​ដឹង​៖ “មុន​នេះ​ គ្រួ​សារ​ខ្ញុំ​ក្រលំ​បាក​ ត្រូវ​ទៅ​ធ្វើ​ការ​ឈ្នួល​ដល់​ក្រុង​ហូជី​មិញ​ តែប្រាក់​ចំ​ណូល​មិន​លំ​នឹង​។​ សព្វ​ថ្ងៃ​ បាន​បង​យីឱ្យ​ចូល​ជួយ​វេច​នំ គ្រួ​សារ​ខ្ញុំ​មាន​ ៣ នាក់​មក​ធ្វើ​ការ​នៅ​ទីនេះ​ រក​បាន​ប្រាក់​ចំ​ណូល​ ៦០០.០០០ ដុង​ក្នុង​មួយ​ថ្ងៃ​។​ អា​ស្រ័យ​មាន​មូល​ដ្ឋាន​នំ​អន្សម​ជ្រូក​ជិញ​យីនៅ​ក្បែរ​ផ្ទះ​ គ្រួ​សារ​ខ្ញុំ​ក៏​មាន​ការ​ងារ​ធ្វើ​លំ​នឹង​ ឥឡូវ​ជីវ​ភាព​បាន​ធូរ​ធារ​ជាង​មុន​ច្រើន​”។​

អនុប្រ​ធាន​គណៈ​កម្មា​ធិការ​ប្រ​ជា​ជន​ឃុំ​ភឿក​ហាវ ឡេ​មិញ​ធឺ​ ឱ្យ​ដឹង​៖ “គណៈ​កម្មា​ធិការ​ប្រ​ជា​ជន​ខេត្ត​ត្រា​វិញ​ ទើប​ចេញ​សេចក្ដី​សម្រេច​លេខ​ ៦១២/QĐ-UBND ស្ដី​ពី​ការ​ទទួល​ស្គាល់​ វាយ​តម្លៃ​ពី​កម្រិត​ផលិត​ផល​ OCOP របស់​ខេត្ត​ត្រា​វិញ​ ឆ្នាំ ​២០២១។​ នំអន្សម​ជ្រូក​នៃ​មូល​ដ្ឋាន​ជិញ​យី ត្រូវ​បាន​ទទួល​ស្គាល់​ជាផលិត​ផល​សម្រេច​ OCOP ផ្កាយ ៣ នោះ​ក៏​ជា​មោទ​កភាព​របស់​ឃុំ​យើង​ដែរ​។​ ហេតុ​នេះ​ ឃុំ​នឹង​បង្ក​លក្ខណៈ​ដើម្បី​មូល​ដ្ឋាន​ដំ​ណើរ​ការ​ បាន​ល្អ​នៅ​ពេល​មុខ​ រិះ​រក​វិធី​ដើម្បី​បើក​ទូលាយ​ ទីផ្សារ​ផលិត​ផល​ ហើយ​លក់​កាន់​តែ​បាន​ច្រើន​ ពី​មួយ​ថ្ងៃ​ទៅ​មួយ​ថ្ងៃ​”៕​

                       សើុង​ម៉ាល័យ​-ពេជ្រ​សឿន​

ចែករំលែកអត្ថបទ