សុខភាព - អប់រំ អប់រំ

01/07/2019 - 16:26

គំរូល្អក្នុងការរៀនសូត្រ

មកកាន់សាលាមធ្យមសិក្សាចំណេះទូទៅជនជាតិអន្តេវាសិកហ្វិញកឿងសុកត្រាំង សួររកប្អូនឌោធីថាញ់ធ្វី សិស្សថ្នាក់ទី១២A៣ លោកគ្រូអ្នកគ្រូនិងមិត្តភ័ក្តិតែងស្គាល់គ្រប់គ្នា។ ពីព្រោះ ក្នុងរយៈពេល៣ឆ្នាំសិក្សា ប្អូនជាសិស្សម្នាក់ដែលរៀនពូកែរបស់សាលា។ ឆ្នាំសិក្សា២០១៧-២០១៨ ប្អូនទទួលបានជ័យលាភីលេខ១ក្នុងការប្រឡងសិស្សពូកែវិញ្ញាសាខ្មែរថ្នាក់ខេត្ត ដែលមន្ទីរអប់រំនិងបណ្តុះបណ្តាលចាត់តាំង។

ប្អូនឌោធីថាញ់ធ្វី សិស្សសាលាមធ្យមសិក្សាចំណេះទូទៅជនជាតិអន្តេវាសិកហ្វិញកឿងសុកត្រាំង។

ក្នុងពិធីបិទវគ្គឆ្នាំសិក្សា២០១៨-២០១៩ ប្អូនថាញ់ធ្វី ត្រូវបានសាលាជូនរង្វាន់ជាសិស្សរៀនពូកែ ពិសេសប្អូនក៏បានសាលាជូនលិខិតសរសើររង្វាន់លេខ១វិញ្ញាសាខ្មែរថ្នាក់ខេត្តទៀតផង។ ប្អូនថាញ់ធ្វី ឲ្យដឹង៖ “ឪពុកម្តាយជាកសិករ ប៉ុន្តែតាំងពីកុមារភាពរហូតមក ប្អូនតែងបានឳពុកម្តាយបង្កលក្ខណសម្បត្តិល្អបំផុតសម្រាប់រៀនសូត្រ។ ស្រុកកំណើតប្អូននៅឃុំតឹងហ៊ឹង ស្រុកឡុងភូ ផ្ទះនៅក្បែរវត្ត ម្ល៉ោះហើយរដូវវិស្សមកាល ប្អូនតែងទៅរៀនអក្សរខ្មែរក្នុងវត្ត។ តាំងពីប្អូនទទួលបានជ័យលាភីលេខ១ថ្នាក់ស្រុកផ្នែកវិញ្ញាសាខ្មែរ ប្អូនរឹតតែពេញចិត្តនឹងការរៀនអក្សរខ្មែរ និងស្វែងរកឯកសារដើម្បីសិក្សាស្រាវជ្រាវ”។ មិនត្រឹមតែពូកែវិញ្ញាសាខ្មែរប៉ុណ្ណោះទេ គឺប្អូនរៀនពូកែស្ទើរគ្រប់វិញ្ញាសា មិត្តភ័ក្តិគ្រប់គ្នាកោតសរសើរមិនដាច់ពីមាត់។ “ក្នុងការរៀនសូត្រ ប្អូនបានកំណត់ច្បាស់ថា ត្រូវតែរៀនឲ្យបានពូកែដើម្បីប្រឡងចូលមហាវិទ្យាល័យភាសាខ្មែរ។ ហេតុដូច្នោះ ប្អូនបានរៀបចំផែនការយ៉ាងសមស្រប។ ក្រៅពីម៉ោងចូលសាលា ប្អូនស្វែងរកអានអត្ថបទល្អៗនៅលើប្រព័ន្ធ ទាំងអត្ថបទភាសាខ្មែរ-វៀត ឬក៏ធ្វើលំហាត់បង្កើនសមត្ថភាព។ ជាពិសេស មុនពេលចូលរៀន ប្អូនតែងអានធ្វើគ្រោងមេរៀនទុកជាមុន កន្លែងណាមិនយល់កត់ចូលសៀវភៅ ពេលចូលរៀន ឬក៏រៀនជាក្រុម ប្អូននឹងសួរលោកគ្រូអ្នកគ្រូនិងមិត្តភ័ក្តិ ” – ប្អូនថាញ់ធ្វី ចែករំលែកពីការរៀនសូត្រដូច្នេះ។

លោកគ្រូគឹមវ៉ាន់ង៉យ នាយករងនៃសាលាមធ្យមសិក្សាចំណេះទូទៅជនជាតិអន្តេវាសិកហ្វិញកឿង ឲ្យដឹង៖ “ក្នុងរយៈពេលសិក្សា៣ឆ្នាំមកនេះ ប្អូនឌោធីថាញ់ធ្វី គឺជាសិស្សគំរូក្នុងការរៀនសូត្រ ខ្នះខ្នែងជួយមិត្តភ័ក្ត ព្រមទាំងសកម្មចូលរួមការចលនារបស់សាលាទៀតផង។ ពិសេសប្អូនមានអត្តចរិតស្លូតបូត ឧស្សាហ៍ព្យាយាមរៀនសូត្រ ម្ល៉ោះហើយបានសាលាស្ងើចសរសើរពេលប្រជុំសកម្មភាពក្រេមទង់ជាតិ”។

យ្វីអាញ់-លីសៀ

ចែករំលែកអត្ថបទ

ពាក្យគន្លឹះ