ពាន​រង្វាន់​វាយ​សី China Open ២០១៨ ដែល​ទើប​នឹង​បញ្ចប់​ក្នុង​ពេល​ថ្មី​ៗ​នេះ ចំ​នួន​រង្វាន់​ឡើង​ដល់​១​លាន​ដុល្លា​។ ហាក់​មាន​ភាព​ភ្ញាក់​ផ្អើល​យ៉ាង​ខ្លាំង​ ខណៈ​ពេល​រង្វាន់​ជើង​ឯក​ទោល​បុរស​​​បាន​ទៅ​លើ​កី​ឡា​ករ​វ័យ​ក្មេង​ជន​ជាតិ​ឥណ្ឌូ​ណេ​ស៊ី​ -Anthony  Sinisuka Ginting។

កី​ឡា​ករ Ginting ក្នុង​ពេល​កំ​ពុង​ប្រ​កួត​វាយ​សី។​

ក​ីឡា​ករ Ginting, មិន​បាន​រៀប​លំ​ដាប់​ថ្នាក់​នៅ​ក្នុង​ការ​ប្រ​កួត​លើក​នេះ​ទេ ពី​ព្រោះ​គាត់​ឈរ​លេខ​១៣​ពិ​ភព​លោក​។ ព្រោះ​ហេតុ​នោះ ចាប់​ពី​ការ​ប្រ​កួត​វគ្គ​ដំ​បូង​មក​ គ្មាន​អ្នក​ណា​ស្មាន​ថា​ គាត់​នឹង​ឈាន​ដល់​វគ្គ​ប្រ​កួត​ចុង​ក្រោយ​សោះ​ឡើយ​ ដោយ​សារ​ដៃ​គូរ​បស់​គាត់​សុទ្ធ​តែ​ជា​ជើង​ខ្លាំង​។ នៅ​ជុំ​ទី​១ Ginting ប្រ​កួត​ជា​មួយ​នឹង​ Lin Dan ដែល​ជា​​កី​ឡា​ករ​លំ​ដាប់​កំ​ពូល​ ធ្លាប់​លើក​ពាន​ជើង​​ឯក China Open ចំ​នួន​៥​លើក​ ចំ​ណែក​​ជុំ​ទី​២ ជួប​នឹ​ង​កី​ឡា​ករ Viktor Axel sen ជា​ម្ចាស់​ពាន​រង្វាន់​ជើង​ឯក​លំ​ដាប់​ថ្នាក់​លេខ​​១​ពិ​ភព​លោក​។ ដូច​ជា​ការ​កាត់​ស្មាន​មែន​  Ginting ចាញ់​កី​ឡា​ករ​ Lin Dan នៅ​សិត​ទី​១ ហើយ​ខិត​ខំ​ប្រ​មូល​អា​រម្មណ៍​នៅ​សិត​ទី​២ និង​៣ ក៏​ក្រ​ឡាស់​ស្ថាន​ភាព​យក​ឈ្នះ​លើ​ Lin ​Dan  ដោយ​លទ្ធ​ផល​២​-១​។ ក្រោយ​មក​ យក​ឈ្នះ​លើ Axelsen  ម្ចាស់​ពាន​រង្វាន់​ជើង​ឯក​ China Open​ ២០១៧​ដោយ​លទ្ធ​ផល​២​-០​។ ឈាន​ចូល​ដល់​វគ្គ​ក្រ​កួុត​៨​នាក់​ Ginting ជួប​នឹង​កី​ឡា​ករ​ម្ចាស់​ផ្ទះ​ម្នាក់​ទៀត​គឺ​ ChenLong រៀប​លំ​ដាប់​ថ្នាក់​លេខ​៦​ពិ​ភព​លោក​។ ហាក់​ដូច​ជា Chen Long មាន​ការ​ប្រុង​ប្រ​យ័ត្ន​មុន​ជា​​ស្រេច ខណៈ​ដែល​ Ginting យក​ឈ្នះ​លើ​​ម្ចាស់​ពាន​រង្វាន់​ជើង​ឯក​ China Open ទាំង​២​រូប ម្ល៉ោះ​ហើយ​ គាត់​វាយ​សី​ដោយ​ប្រុង​​ប្រ​យ័ត្ន​ រួច​ឈ្នះ​នៅ​សិត​ទី​១​។ ប៉ុន្តែ​ក្រោយ​ពី​បាន​គ្រូ​បង្វឹក​ណែ​នាំ​យុទ្ធ​សាស្រ្ត​ ឈាន​ចូល​​សិត​ទី​២​និង​៣ ​ កី​ឡា​ករ Ginting ដូច​ជា​មនុស្ស​​ផ្សេង​ទៅ​វិញ បង​បាន​ក្រ​ឡាស់​ស្ថាន​ភាព​យក​​ឈ្នះ​លើ​កី​ឡា​ករ ChenLong ដោយ​លទ្ធ​ផល​ ២-១​។ ការ​ប្រ​កួត​នៅ​ពាក់​កណ្ដាល​ផ្តាច់​ព្រ័ត្រ​ក៏​បាន​ប្រ​ព្រឹត្ត​ឡើង​ដូច​លើក​មុន​ៗ​ដែរ​ កីឡា​ករ Ginting ក៏​ក្រ​ឡាស់​ស្ថាន​ភាព​​យក​ឈ្នះ​កី​ឡាក​រ ChouTienChen លំ​ដាប់​ថ្នាក់​លេខ​៥​ពិ​ភព​លោក ជន​ជាតិ​តៃ​វ៉ាន់​ ដោយ​លទ្ធ​​ផល​២-១ ក្រោយ​ពី​ចាញ់​នៅ​សិត​ទី​១​ ដោយ​ពិន្ទុ​១២​-២១​។

នៅ​វគ្គ​ផ្ដាច់​ព្រ័ត្រ​ កី​ឡា​ករ Kento Momota ជន​ជាតិ​ជប៉ុន កំ​ពុង​មាន​ប្រៀប​ជាង​។ ចំ​ណែក​កី​ឡា​ករ​Ginting មិន​បាន​គេ​វាយ​តម្លៃ​​ខ្ពស់​ឡើយ ជាក់​ស្ដែង​​ក្នុង​វគ្គ​ប្រ​កួត​៨​នាក់ និង​វគ្គ​ពាក់​កណ្ដាល​ផ្ដាច់​ព្រ័ត្រ​ Ginting បាន​ប្រ​ឈម​នឹង​បញ្ហា​ចុះ​កម្លាំង​។ ផ្ទុយ​មក​វិញ ដំ​ណើរ​ការ​ឆ្ពោះ​ទៅ​រក​វគ្គ​ផ្ដាច់​ព្រ័ត្រ​របស់​កី​ឡា​ករ Momota មាន​ភាព​ងាយ​ស្រួល​ជាង​។ Momota មិន​បាន​ជួប​ដៃ​គូ​ខ្លាំង​ៗ​ច្រើន​ទេ ក្រៅ​ពី​កី​ឡា​ករ​ម្ចាស់​ផ្ទះ Shi Yupi អ្នក​ត្រូវ​បាន គាត់​ដណ្ដើម​យក​លំ​ដាប់​ថ្នាក់​លេខ​២​ពិ​ភព​លោក​។ ព្រោះ​ហេតុ​នោះ កី​ឡាករ Momota តែង​យក​ឈ្នះ​រាល់​វគ្គ​ប្រ​កួត​យ៉ាង​ឆាប់​រ​ហ័ស ដោយ​លទ្ធ​ផល​២-​០។

កី​ឡា​ក​រ Ginting ​(ខាង​ឆ្វេង​) និង​កី​ឡា​ករ​ Momota។

សិត​ទី​១​ក្នុង​វគ្គ​ផ្ដាច់​ព្រ័ត្រ​ ខណៈ​ពេល Momota កំ​ពុង​តែ​នាំ​មុខ​ដោយ​ពិន្ទុ​១៩​-១៤​ ស្រាប់​តែ​ Ginting ឈ្នះ​៦​ពិន្ទុ​ជា​បន្ត​បន្ទាប់​ ឈាន​ឡើង​នាំ​មុខ​ Momota ដោយ​ពិន្ទុ​២០​-​១៩។​ គួរ​ឲ្យ​ស្ដាយ​ណាស់​ Ginting បាន​ទុក​ឲ្យ​Momota មាន​ឱ​កាស​ឈ្នះ​២​ពិន្ទុ​បន្ត​បន្ទាប់​ ឈាន​ឡើង​នាំ​មុខ​វិញ​។ ភាព​ស្វិត​ស្វាញ​ក្នុង​​ការ​ប្រ​កួត​ បាន​ធ្វើ​ឲ្យ​Ginting ដណ្ដើម​បាន​១​ពិន្ទុ​មក​វិញ​ មុន​ពេល​ឈ្នះ​ Momota ដោយ​​ពិន្ទុ​២៤-​២២​។ លុះ​ដល់​សិត​ទី​២ Ginting ស្ថិត​ក្នុង​ស្ថាន​ភាព​តាម​ប្រ​កិត​ពី​ក្រោយ​ Momota។ ខណៈ​​ពេល Momota នាំ​មុខ​ដោយ​​ពិន្ទុ​១២- ១៦​ស្រាប់​តែ​Ginting ប្ដូរ​យុទ្ធ​សាស្រ្ត​វាយ​សី​​រហ័ស​វិញ​ ជា​លទ្ធ​ផល​ឈ្នះ ​Momota ដោយ​ពិន្ទុ​២១​-១៩​ ដណ្ដើម​បាន​ពាន​រង្វាន់​ជើង​ឯក​​ដោយ​មិន​នឹក​ស្មាន​ដល់​។ តែ​នេះគឺ​ជា​លទ្ធ​ផល​ដ៏​ស័ក្តិ​សម​បំ​ផុត​សម្រាប់​កី​ឡា​ករ​ដែល​មាន​ស​មត្ថ​ភាព​ ក្រោយ​ពី​រង​របួស​ជា​រឿយ​ៗ​៕

ហា​ថាញ់-​វិ​មាន​

​