កំសាន្ត និពន្ធ

17/07/2026 - 07:31

គន្លឹះល្អៗដើម្បីបញ្ជៀសការរមួលក្រពើនៅពេលយប់

ប្រសិនបើអ្នកឧស្សាហ៍រមួលក្រពើនៅពេលយប់ សូមរៀនតាមគន្លឹះងាយៗ ខាងក្រោមនេះភ្លាម ដើម្បីបំបាត់អារម្មណ៍ពិបាកទ្រាំពេលរមួលក្រពើ។

ការរមួលក្រពើបង្កឱ្យមានការឈឺចាប់សាច់ដុំភ្លាមៗ ធ្វើឱ្យថយចុះសមត្ថភាពគ្រប់គ្រងឬចលនារបស់សាច់ដុំនោះក្នុងរយៈពេលខ្លី។ រូបថត៖ Runner’s World។

ទោះបីការរមួលក្រពើមិនបង្កគ្រោះថ្នាក់ ឬធ្វើឱ្យខូចសាច់ដុំក៏ដោយ ប៉ុន្តែវានឹងធ្វើឱ្យអ្នកឈឺចាប់ និងពិបាកទ្រាំជាខ្លាំង។ នៅពេលរមួលក្រពើ សាច់ដុំរបស់អ្នកនឹងកន្ត្រាក់ចូលគ្នា និងឈឺចុកចាប់យ៉ាងខ្លាំង។ ស្ថានភាពនេះច្រើនតែកើតឡើងនៅជើង ជាពិសេសគឺកំភួនជើង។ ខាង ក្រោមនេះ ជាមូលហេតុដែលនាំឱ្យរមួលក្រពើ រួមជាមួយគន្លឹះងាយៗ មួយចំនួនដើម្បីជួយអ្នកទប់ទល់នឹងវា។

មូលហេតុបង្កឱ្យរមួលក្រពើ

ដោយសារការបាត់បង់ជាតិទឹក

នៅពេលដែលរាងកាយខ្វះជាតិទឹក វានឹងជះឥទ្ធិពលដល់ចលនានៃចរន្តឈាម ដែលនាំឱ្យកើតមានស្ថានភាពរមួលក្រពើ។ មិនត្រឹមតែប៉ុណ្ណោះ ពេលដែលសាច់ដុំមិនបានផ្គត់ផ្គង់ជាតិទឹកគ្រប់គ្រាន់តាមតម្រូវការទេ សរសៃប្រសាទងាយនឹងរំញោចជាង ពេលមានផលប៉ះពាល់ណាមួយមកលើរាងកាយ ដែលងាយបង្កឱ្យមានការកន្ត្រាក់សាច់ដុំ។

រាងកាយរងភាពត្រជាក់

អ្នកជាច្រើននឹងគេងលក់ស្រួលជាងនៅពេលគេងក្នុងបន្ទប់ម៉ាស៊ីនត្រជាក់។ ទោះជាយ៉ាងណាក៏ដោយ ប្រសិនបើរាងកាយរងសីតុណ្ហភាពត្រជាក់ខ្លាំងពេក វានឹងធ្វើឱ្យសាច់ដុំកន្ត្រាក់ចូលគ្នា និងរឹង ដែលនាំឱ្យកើតមានស្ថានភាពរមួលក្រពើ។ ហេតុដូច្នេះហើយ ពេលចូលគេង អ្នកគួរតែដណ្តប់ភួយកក់ក្តៅនៅត្រង់ជើងរបស់អ្នក ហើយកុំទុកឱ្យបន្ទប់ត្រជាក់ខ្លាំងពេក។

ការឈរក្នុងរយៈពេលយូរ

ប្រសិនបើការងារតម្រូវឱ្យឈរពេញមួយថ្ងៃ ដូចការងារសន្តិសុខ បុគ្គលិកគិតលុយ ឬធ្វើដំណើរពេញមួយថ្ងៃ និងកាន់យួររបស់ធ្ងន់ៗជាច្រើន អ្នកនឹងមានអារម្មណ៍ហត់នឿយនៅត្រង់សាច់ដុំ។ នៅពេលសម្រាកពេលយប់ អ្នកនឹងងាយរមួលក្រពើខ្លាំងណាស់។ ហេតុនេះ អ្នកគួរតែទុកឱ្យដៃជើងរបស់អ្នកបានសម្រាក ឬផ្លាស់ប្តូរឥរិយាបថឱ្យបានញឹកញាប់ ប្រសិនបើកំពុងធ្វើការងារដូចដែលបានរៀបរាប់ខាងលើ។

ការហាត់ប្រាណខ្លាំងពេក

ការហាត់ប្រាណគឺល្អណាស់សម្រាប់សុខភាព និងជួយបន្ថយស្ថានភាពរមួលក្រពើ។ ទោះជាយ៉ាងណាក៏ដោយ ប្រសិនបើហាត់ប្រាណច្រើនជាមួយនឹងលំហាត់ប្រាណធ្ងន់ៗនោះ ឱកាសដែលអ្នករមួលក្រពើនៅតែមានកម្រិតខ្ពស់ ដោយសារតែសាច់ដុំកន្ត្រាក់។

គន្លឹះងាយៗជួយបញ្ជៀសកុំឱ្យរមួលក្រពើពេលគេង

ងូតទឹកក្តៅឧណ្ហៗ

ការងូតទឹកក្តៅឧណ្ហៗមុនពេលចូលគេង គឺជាវិធីសាស្ត្រដ៏ល្អឥតខ្ចោះដើម្បីបន្ថយការឈឺសាច់ដុំ និងជៀសវាងការរមួលក្រពើ។ ក្រៅពីនេះ ទឹកក្តៅឧណ្ហៗ អាចជួយសម្រាល និងធ្វើឱ្យសាច់ដុំបានធូរស្រាល។

ពិសារទឹកជ្រក់

ប្រសិនបើគ្មានភេសជ្ជៈកីឡា ឬទឹកនៅក្បែរខ្លួនដើម្បីបំពេញជាតិទឹកភ្លាមៗពេលស្រេកទឹកទេនោះ អ្នកអាចពិសារទឹកជ្រក់បន្តិចបន្តួចបាន។ វាផ្ទុកទៅដោយសារធាតុស្ទើរតែទាំងអស់ដែលសាច់ដុំរបស់អ្នកត្រូវការ ដើម្បីជៀសវាងការរមួលក្រពើនៅពេលយប់។

ទទួលទានចេក

ផ្លែចេកផ្ទុកទៅដោយជាតិរ៉ែជាច្រើនដែលអាចប្រឆាំងនឹងបញ្ហារមួលក្រពើ។ វាក៏ផ្ទុកសារធាតុកាបូអ៊ីដ្រាត ដែលជួយបំពេញបន្ថែមជាតិស្ករ និងជួយពន្លឿន ពេលវេលាស្តារឡើងវិញនៃសាច់ដុំ។ ទោះបីជាការទទួលទានចេកប្រហែលជាមិនអាចជួយអ្នកជៀសវាងការរមួលក្រពើបានទាំងស្រុងក៏ដោយ ប៉ុន្តែវានៅតែជាជម្រើសដ៏ល្អមួយដែលអ្នកគួរតែសាកល្បង។

បំពេញបន្ថែមជាតិម៉ាញេស្យូម

អាហារដែលផ្ទុកជាតិម៉ាញេស្យូមជួយបានច្រើនណាស់ សម្រាប់អ្នកដែលឧស្សាហ៍រមួលក្រពើពេលយប់។ ដួចជា ផ្លែប៊ឺ សណ្តែក ស្ពៃពួយឡេង សូកូ ឡាខ្មៅ តៅហ៊ូ... គឺជាអាហារដែលសម្បូរទៅដោយជាតិម៉ាញេស្យូម និងសារធាតុចិញ្ចឹមផ្សេងៗទៀត ដែលអ្នកគួរតែបន្ថែមទៅក្នុងរបបអាហាររបស់អ្នក។

ទទួលទានផ្លែអាព្រីកូតក្រៀម

ផ្លែអាព្រីកូតក្រៀមផ្ទុកនូវជាតិប៉ូតាស្យូមយ៉ាងច្រើន ដែលអាចបន្ថយការកន្ត្រាក់សាច់ដុំ និងជួយបានច្រើនដល់អ្នកដែលមានបញ្ហារមួលក្រពើ។ សាកល្បងទទួលទានផ្លែអាព្រីកូតក្រៀមពីរផ្លែជារៀងរាល់ ថ្ងៃក្នុងរយៈពេល ១ ខែ អ្នកនឹងឃើញពីប្រសិទ្ធភាពរបស់វា៕

ប្រភព÷ vietnamnet.vn - សុផន

ចែករំលែកអត្ថបទ

ពាក្យគន្លឹះ