គោលនយោបាយ -ការរស់នៅ ការរស់នៅ

03/06/2026 - 20:31

ជនបទកឹងធើ៖ ពីផ្នត់រស់នៅរហូតដល់ការផលិតបៃតង

ទន្ទឹមនឹងការផ្ដុំកម្លាំងអភិវឌ្ឍសេដ្ឋកិច្ច ធ្វើឱ្យសុក្រឹតហេដ្ឋារចនាសម្ព័ន្ធ ទីក្រុងកឹងធើបានជំរុញខ្លាំងក្លានូវការស្ថាបនាទេសភាព ការពារបរិស្ថានជនបទផងដែរ។ នេះជាគ្រឹះស្ថានដ៏សំខាន់ ដើម្បីលើកកម្ពស់គុណភាពជីវភាពប្រជាជន ឆ្ពោះទៅរកការកសាងជនបទជីវស្ថានទំនើប និងចីរភាព។

ដងផ្លូវជនបទ "ភ្លឺ - បៃតង - ជ្រះ - ស្អាត" នៅទីក្រុងកឹងធើ។

រីកសាយភាយបណ្ដាទម្រង់គំរូ

ទីក្រុងកឹងធើបានយកចិត្តទុកដាក់ជាពិសេសក្នុងការដឹកនាំយ៉ាងម៉ឺងម៉ាត់ បង្កការផ្លាស់ប្តូរជ្រាលជ្រៅក្នុងការស្ថាបនាទេសភាពបរិស្ថានជនបទ ភ្លឺ- បៃតង- ជ្រះ- ស្អាត សុវត្ថិភាព។ ការងារការពារបរិស្ថានបានផ្គួបបញ្ជូលនឹងដំណើរការកសាងជនបទថ្មី លាយឡំនឹងយុទ្ធសាស្ត្រទប់ទល់នឹងការប្រែប្រួលអាកាសធាតុ និងការអភិវឌ្ឍទេសចរណ៍ជីវស្ថាន។ ជាមួយទម្រង់ចាត់តាំងរដ្ឋអំណាចភូមិភាគ ២ ថ្នាក់ ការងារសម្របសម្រួល ណែនាំពីទីក្រុងបានអនុវត្តដោយរលូននិងព្រមៗគ្នា។ លើសពីនេះ ការទទួលខុសត្រូវថែរក្សាទេសភាពមិនមែនជារឿងដោយឡែករបស់ស្ថាប័នគ្រប់គ្រងនោះឡើយ គឺត្រូវបានប្រគល់សិទ្ធិ និងផ្សារភ្ជាប់យ៉ាងជិតដិតនឹងស្មារតីភ្ញាក់រលឹករបស់សហគមន៍ប្រជាជននីមួយៗ។

ការងារផ្សព្វផ្សាយអំពីបរិស្ថានបានចូលទៅក្នុងស្ថានភាពជាក់ស្តែង តាមរយៈយុទ្ធនាការឃោសនាព័ត៌មាន ការប្រឡងប្រជែង និងវគ្គបំប៉នជាក់ស្តែងជាច្រើន។ មិនឈប់នៅត្រឹមពាក្យស្លោកនោះទេ របៀបរស់នៅបៃតងបានចូលទៅក្នុងផ្នត់គំនិតនិងរបៀបធ្វើពិតប្រាកដរបស់ប្រជាជន តាមរយៈបណ្តាគំនិតផ្តួចផ្តើមមានភាពបត់បែន និងមានប្រសិទ្ធភាព ដូចជា៖ "ដងផ្លូវគំរូ", "៥ មិន ៣ ស្អាត", "មណ្ឌលតាំងទីលំនៅស្វ័យគ្រប់គ្រងការពារបរិស្ថាន", "ផ្សារស៊ីវិល័យ - ជិតដិតនឹងបរិស្ថាន", "សាសនារួមកម្លាំងការពារបរិស្ថាន", "ទម្រង់ប្រមូលកាកសំណល់ជ័រនៅក្នុងទីស្នាក់ការស្ថាប័ន”។

ប្រសិទ្ធភាពពីបណ្តាគោលការណ៍ទាំងនេះ បានបង្ហាញយ៉ាងរស់រវើកតាមរយៈការ "ផ្លាស់ប្តូរទេសភាព" នៅមូលដ្ឋាន។ ជាក់ស្តែងដូចជានៅឃុំថាញ់ហ្វា ភូមិភាគបានបង្កើតបណ្តាញប្រមូលកាកសំណល់បិទជិត ដោយមាន ១៨ ក្រុមសកម្មភាពមានប្រសិទ្ធភាពនៅតាមតំបន់ប្រជាជនរស់នៅប្រមូលផ្តុំ។ ឃុំបានសហការយ៉ាងជិតដិតជាមួយអង្គភាពប្រមូលកាកសំណល់ ដើម្បីដឹកជញ្ជូន និងវិនិច្ឆ័យសំរាមជាប្រចាំ។ ទន្ទឹមនឹងនោះ ចលនាកសាងអាងផ្ទុកសំបកដបថ្នាំការពាររុក្ខជាតិចំនួន ៤៣ អាង ដើម្បីការពារសុវត្ថិភាពប្រភពទឹកនិងដីផលិត។ តាមរយៈទម្រង់ "ផ្លូវផ្កា ផ្ទះស្អាត" សមាគមនារីឃុំបានចែកកន្ត្រកសំរាម និងណែនាំផ្ទាល់ បង្ហាញបណ្តាគ្រួសារបែងចែកប្រភេទសំរាម។ តាមលទ្ធផលត្រួតពិនិត្យ អត្រាគ្រួសារមានរណ្តៅវិនិច្ឆ័យសំរាមត្រឹមត្រូវតាមសេចក្តីកំណត់សម្រេចដល់ ៩៦,២%; អត្រាប្រភេទសំណល់រឹងបានបែងចែកនិងវិនិច្ឆ័យសម្រេចជាង ៨០%។

ចលនាការពារបរិស្ថាន និងធ្វើឱ្យទេសភាពស្រស់ស្អាតបានផ្សព្វផ្សាយទូទាំងតំបន់ជនបទកឹងធើ នាំមកនូវសេចក្តីរីករាយជាក់ស្តែងនៅក្នុងផ្ទះនីមួយៗ។ បងស្រី ង្វៀងធីម៉ៃ នៅឃុំថើយហឹង បានចែករំលែក៖ "ចាប់តាំងពីភូមិភាគផ្សព្វផ្សាយនិងបំផុសចលនាកសាងទេសភាព ការពារបរិស្ថាន ផ្ទះណាក៏មានការភ្ញាក់រលឹកជាងមុនដែរ សំរាមត្រូវបានប្រមូលទុកដាក់ត្រឹមត្រូវតាមកន្លែងកំណត់។ មិនបាច់មានអ្នកណារំលឹកទេ ម្នាក់ៗម្ចាស់ការបោសសម្អាតបរិវេណផ្ទះរបស់ខ្លួន រួចហើយរួមគ្នាថែទាំបណ្តាដងផ្លូវផ្កាលម្អ។ ឥឡូវឈានជើងចេញពីរបងផ្ទះគឺឃើញផ្លូវថ្នល់ស្អាតបាត បរិយាកាសបរិសុទ្ធ ត្រជាក់ភ្នែកណាស់!"។

រួមកម្លាំងកសាង និងថែរក្សា

មិនបង្អង់ត្រឹមមានរបៀបរបបរស់នៅប្រចាំថ្ងៃប៉ុណ្ណោះទេ ស្មារតីការពារបរិស្ថាននៅទាំងផ្សព្វផ្សាយទូលំទូលាយទៅក្នុងគំនិតផលិត តាមរយៈទិសដៅអភិវឌ្ឍន៍កសិកម្មស្អាត កសិកម្មសរីរាង្គ ដែលកំពុងបានទីក្រុងកឹងធើលើកទឹកចិត្តយ៉ាងខ្លាំងក្លា។ លេចធ្លោគឺទីក្រុងបានបង្កើតបណ្តាតំបន់ផលិតស្រូវគុណភាពខ្ពស់ បន្ថយបំភាយឧស្ម័នទាប គម្រោងការអភិវឌ្ឍប្រកបដោយចីរភាព ១ លានហិកតាជំនាញផលិតស្រូវគុណភាពខ្ពស់ និងបំភាយឧស្ម័នទាប ផ្សារភ្ជាប់នឹងកំណើនបៃតងនៅតំបន់វាលរាបទន្លេគឺវឡុងដល់ឆ្នាំ ២០៣០ ផ្ទៃដីសរុបជាង ១៧០.០០០ ហិកតា។ ទន្ទឹមនឹងនោះ នៅលើភូមិឋានទីក្រុងមាន ៣.៨៩៧ ហិកតាស្រូវ បន្លែបង្ការ ដំណាំហូបផ្លែសម្រេចបានវិញ្ញាបនបត្រ VietGAP, GlobalGAP និង ២០.៧៥៩ ហិកតាស្រូវផលិតតាមទិសដៅសរីរាង្គ។

លោកដុងវ៉ាំងកាញ់ នាយកសហករណ៍ New Green Farm សង្កាត់ថើយឡុង បានឱ្យដឹងថា ចូលរួមទម្រង់ផលិតស្រូវគុណភាពខ្ពស់ និងបំភាយឧស្ម័នទាប បានជួយសមាជិកសហករណ៍បង្កើនប្រាក់ចំណូល អាស្រ័យការអនុវត្តព្រមៗគ្នានូវយន្តូបនីយកម្ម រួមនឹងបច្ចេកទេសជឿនលឿន។ ជាពិសេស ចំបើងក្រោយពេលប្រមូលផលបានយកទៅដាំផ្សិត និងធ្វើជីសរីរាង្គ។ របៀបធ្វើនេះមិនត្រឹមតែនាំមកនូវប្រាក់ចំណូលបន្ថែមសម្រាប់កសិករប៉ុណ្ណោះទេ នៅទាំងបោះចោលទម្លាប់ដុតគល់ជញ្ជ្រាំង បង្កការខ្ជះខ្ជាយ និងបំពុលបរិស្ថានជីវស្ថានទៀតផង។

អាចបញ្ជាក់ថា ការផ្លាស់ប្តូរជាវិជ្ជមានទាំងក្នុងការរស់នៅនិងការផលិត កំពុងរួមចំណែកធ្វើឱ្យទេសភាពជនបទកឹងធើកាន់តែភ្លឺស្វាង។ ទោះជាយ៉ាងណាក៏ដោយ ការការពារនិងថែរក្សាបរិស្ថានតម្រូវឱ្យមានការចូលរួមព្រមៗគ្នា និងស្វិតស្វាញរបស់ទាំងប្រព័ន្ធនយោបាយនិងសហគមន៍ប្រជាជន។ ការពិតបានបង្ហាញឱ្យឃើញថា ការងាររក្សានិងពង្រីកសមិទ្ធផលនៅតាមភូមិភាគមួយចំនួន ជួនកាលនៅតែលេចឡើងនូវចំណុចខ្វះខាតខ្លះៗផងដែរ។ កំណត់ច្បាស់នូវការប្រឈមទាំងនេះ រដ្ឋអំណាចគ្រប់ថ្នាក់កំពុងបន្តរឹតបន្តឹងការគ្រប់គ្រង ជំរុញខ្លាំងការផ្សព្វផ្សាយ ដើម្បីដាស់តឿនស្មារតីភ្ញាក់រលឹកទទួលខុសត្រូវរបស់បុគ្គលម្នាក់ៗ។ រួមជាមួយនោះគឺការពង្រីកជាអតិបរមានូវតួនាទីរបស់បណ្តាអង្គការមហាជន ដើម្បីពង្រីកទូលំទូលាយនូវបណ្តាទម្រង់ល្អៗ របៀបធ្វើប្រកបដោយការច្នៃប្រតិដ្ឋ សំដៅថែរក្សាទេសភាព "ភ្លឺ - បៃតង - ជ្រះ- ស្អាត - សុវត្ថិភាព"។

លោកហ្វិញថាញ់ហ៊ីវ ប្រធានការិយាល័យសម្របសម្រួលបណ្តាកម្មវិធីទិសដៅជាតិទីក្រុងកឹងធើ បានឱ្យដឹង៖ ការិយាល័យបន្តធ្វើសេនាធិការ ជំរុញខ្លាំងព័ត៌មាន ផ្សព្វផ្សាយ និងបំផុសចលនាប្រឡងប្រណាំង។ ទន្ទឹមនឹងនោះ អនុវត្តមានប្រសិទ្ធភាពបណ្តាទម្រង់ "ផ្ទះខ្ញុំជនបទថ្មី", "ដងផ្លូវជនបទថ្មីគំរូ" ពង្រីកតួនាទីម្ចាស់ការរបស់ប្រជាជន និងសហគមន៍ចូលរួមកសាងជនបទកឹងធើ កាន់តែស៊ីវិល័យនិងទំនើប៕

គឹមភុក - ថាច់ធី

ចែករំលែកអត្ថបទ

ពាក្យគន្លឹះ