មហាសាមគ្គីជនជាតិ គំរូក្នុងសហគមន៍

18/05/2026 - 22:24

គំរូសិស្សរៀនពូកែវិញ្ញាសាអក្សរសាស្រ្តខ្មែរថ្នាក់ទីក្រុង

ពេលរំលឹកដល់ប្អូន គឹមតឹងឡុក សិស្សថ្នាក់ទី១២C២ នៃសាលាវិទ្យាល័យជនជាតិអន្តេវាសិកហ្វិញកឿង ទីក្រុងកឹងធើ ទាំងលោកគ្រូ អ្នកគ្រូ និងមិត្តរួមសាលាសុទ្ធតែលាន់មាត់សរសើរ។ ដ្បិតអី ប្អូនគឺជាសិស្សម្នាក់គត់របស់សាលាដែលមានស្នាដៃដណ្តើមបានរង្វាន់លេខ១ ចំនួនពីរដង និងរង្វាន់លេខ២ ចំនួនមួយដង ក្នុងការប្រឡងសិស្សរៀនពូកែវិញ្ញាសាអក្សរសាស្រ្តខ្មែរថ្នាក់ទីក្រុង។ ស្នាដៃដ៏ឆ្នើមនេះ មិនត្រឹមតែជាមោទនភាពរបស់គ្រួសារនិងសាលារៀនប៉ុណ្ណោះទេ ថែមទាំងរួមចំណែកធ្វើឱ្យរីកសាយភាយទឹកចិត្តស្រឡាញ់ភាសា និងអក្សរសាស្ត្ររបស់ជនជាតិខ្មែរក្នុងស្រទាប់យុវវ័យទៀតផង។

ប្អូនគឹមតឹងឡុក។

ប្អូនឡុក ធំដឹងក្តីឡើងក្នុងគ្រួសារមួយដែលមានប្រពៃណីស្រឡាញ់ភាសា និងអក្សរសាស្ត្រខ្មែរ នៅភូមិបឹងព្រលិត ឃុំត្រឹងដេ។ តាំងពីតូច ប្អូនឡុកបានជីតាបង្រៀនអក្សរសាស្រ្តខ្មែរ ហើយពេលរៀនកម្រិតបឋមសិក្សា រហូតដល់កម្រិតអនុវិទ្យាល័យ ក្រៅពីរៀនអក្សរខ្មែរនៅក្នុងថ្នាក់ នាឱកាសវិស្សមកាល ប្អូនតែងតែទៅវត្តដើមពោធិ៍ដើម្បីរៀនសូត្រ។ ប្អូនឡុក បានរាយរ៉ាប់៖ “ក្នុងការរស់នៅប្រចាំថ្ងៃ គ្រួសារខ្ញុំតែងប្រស្រ័យទាក់ទងគ្នាជាភាសាខ្មែរ។ ខ្ញុំរៀនអក្សរខ្មែរតាំងពីតូចរហូតដល់សព្វថ្ងៃ នៅក្នុងវត្តមានព្រះសង្ឃជួយបង្រៀននៅក្នុងសាលារៀនមានលោកគ្រូអ្នកគ្រូ ពេលមកដល់ផ្ទះវិញមានជីតាជួយណែនាំ ហេតុនេះហើយអក្សរខ្មែរបានដក់ជាប់យ៉ាងជ្រាលជ្រៅក្នុងចិត្ត។ នៅក្នុងផ្ទះមានសៀវភៅ និងកាសែតខ្មែរជាច្រើន ពេលទំនេរខ្ញុំតែងតែអានបន្ថែម ម្ល៉ោះហើយទើបស្ទាត់ជំនាញអក្សរខ្មែរបែបនេះ”។ ចំពោះប្អូនឡុក ការចេះនិយាយ និងចេះអក្សរខ្មែរ មិនត្រឹមតែសម្រាប់ប្រស្រ័យទាក់ទងគ្នាប៉ុណ្ណោះទេ ប៉ុន្តែវានៅជាមោទនភាពក្នុងការថែរក្សាភាសាកំណើតផងដែរ។ ហេតុដូច្នេះហើយ ពេលឈានជើងចូលរៀននៅសាលាវិទ្យាល័យជនជាតិអន្តេវាសិកហ្វិញកឿង ក្រៅពីរៀនចំណេះដឹងទូទៅ ប្អូនតែងតែចំណាយពេល

ជាពិសេស ក្នុងឆ្នាំ២០២២ ពេលកំពុងរៀនកម្រិតអនុវិទ្យាល័យ ប្អូនឡុក ធ្លាប់ដណ្តើមបានរង្វាន់លេខ៣ វិញ្ញាសាអក្សរសាស្រ្តខ្មែរ ក្នុងការប្រឡងសិស្សរៀនពូកែថ្នាក់ខេត្តសុកត្រាំងចាស់ (បច្ចុប្បន្នជាទីក្រុងកឹងធើ) ម្ល៉ោះហើយនេះជាមូលដ្ឋាននិងជាកម្លាំងចលករដើម្បីប្អូនជឿជាក់ក្នុងការប្រឡងសិស្សពូកែថ្នាក់ទីក្រុង។ ពេលឈានចូលរៀនថ្នាក់ទី១០ ប្អូនឡុក បានសាលាជ្រើសរើសដើម្បីបណ្តុះបណ្តាល បំប៉នវិញ្ញាសាអក្សរសាស្រ្តខ្មែរ ត្រៀមប្រឡងសិស្សពូកែថ្នាក់ទីក្រុង។ ចាប់ពីឆ្នាំ២០២៤ ដល់ឆ្នាំ២០២៦ ប្អូនឡុក តែងតែចូលរួមការប្រឡងសិស្សរៀនពូកែមុខវិញ្ញាសាអក្សរសាស្រ្តខ្មែរ ហើយទទួលបានរង្វាន់លេខ១ ចំនួនពីរដង និងរង្វាន់លេខ២ ចំនួនមួយដងជាបន្តបន្ទាប់ថ្នាក់ទីក្រុង។ ប្អូនឡុក បានឱ្យដឹង៖ “ក្រៅពីម៉ោងរៀននៅក្នុងថ្នាក់ ខ្ញុំតែងម្ចាស់ការអានសៀវភៅ និងកាសែតអក្សរខ្មែរជាច្រើន ជាពិសេសគឺអានកាសែតអនឡាញខ្មែរកឹងធើជាញឹកញយ ដើម្បីបង្កើនទុនពាក្យសម្តី បម្រើឱ្យការសរសេរតែងសេចក្តីជាខ្មែរបានល្អ។ ក្រៅពីនេះ ខ្ញុំនៅទាំងស្វែងយល់បន្ថែមអំពីសៀវភៅវចនានុក្រមខ្មែរ, ខ្មែរ-វៀតណាម, វៀតណាម-ខ្មែរ ដើម្បីបម្រើឱ្យការបកប្រែ និងតែងតែសន្ទនាជាមួយលោកគ្រូអ្នកគ្រូ និងមិត្តភក្តិដើម្បីលើកកម្ពស់ជំនាញ។ ខ្ញុំយល់ថា ចង់រៀនពូកែវិញ្ញាសាអក្សរសាស្រ្តខ្មែរ គឺត្រូវតែខំប្រឹងអានសៀវភៅ កាសែតឱ្យបានច្រើន ដើម្បីសន្សំមេពាក្យ និងសរសេរឱ្យបានច្រើនទើបមិនសូវខុសអក្ខរាវិរុទ្ធ”។

មិនត្រឹមតែរៀនពូកែវិញ្ញាសាអក្សរសាស្រ្តខ្មែរប៉ុណ្ណោះទេ ប្អូនឡុកនៅទាំងចាត់តាំងជួយបង្រៀនបន្ថែមដល់មិត្តភក្តិដែលរៀនខ្សោយមុខវិញ្ញាសាអក្សរសាស្រ្តខ្មែរនៅក្នុងសាលាទៀតផង។ ប្អូនគឹមភីរឹត សិស្សថ្នាក់ទី១០ បានឱ្យដឹង៖ “បងឡុកគឺជាគំរូដ៏ល្អសម្រាប់ខ្ញុំរៀនសូត្រតាម គាត់រៀនពូកែផង និងអស់ពីចិត្តក្នុងការណែនាំមិត្តភក្តិដែលរៀនខ្សោយវិញ្ញាសាអក្សរសាស្រ្តខ្មែរនៅតាមថ្នាក់នីមួយៗផង។ រៀងរាល់ពេលល្ងាច បងឡុក តែងតែឡើងថ្នាក់បង្រៀនដល់ក្រុមមិត្តភក្តិ ហើយរបៀបបង្រៀនអក្សរខ្មែររបស់បងគឺងាយយល់ ងាយចាំ ហេតុនេះខ្ញុំចូលចិត្តណាស់។ សព្វថ្ងៃ ខ្ញុំបានបងឡុកណែនាំរៀនអក្សរ និងឱ្យខ្ចីឯកសាររៀនសូត្រ ទើបខ្ញុំស្ទាត់ជំនាញអក្សរខ្មែរ។ ឆ្នាំក្រោយ ខ្ញុំនឹងចូលរួមប្រឡងសិស្សរៀនពូកែមុខវិញ្ញាសាអក្សរសាស្រ្តខ្មែរថ្នាក់ទីក្រុង សង្ឃឹមថានឹងទទួលបានរង្វាន់ខ្ពស់ៗដូចបងឡុកដែរ”។

លោកគ្រូដាំងថាញវ៉ូវ ចាងហ្វាងរងសាលាវិទ្យាល័យជនជាតិអន្តេវាសិកហ្វិញកឿង បានវាយតម្លៃ៖ "ប្អូនឡុក ជាសិស្សស្លូតបូត ឧស្សាហ៍ព្យាយាម រួសរាយរាក់ទាក់ម្នាក់ និងជាលេខាសាខាសម្ព័ន្ធយុវជនសកម្មចូលរួមបណ្តាសកម្មភាពវប្បធម៌ កីឡារបស់សាលានិងថ្នាក់។ មិនត្រឹមតែរៀនពូកែវិញ្ញាសាអក្សរសាស្រ្តខ្មែរប៉ុណ្ណោះទេ ប្អូនឡុក នៅទាំងជាសិស្សរៀនពូកែរបស់សាលាទៀតផង ហេតុនេះប្អូនគឺជាគំរូដ៏ល្អអំពីស្មារតីជម្នះការលំបាក ស្មារតីស្វ័យសិក្សា និងការទទួលខុសត្រូវក្នុងការរៀនសូត្រ"។

ស្នាដៃទទួលបានរង្វាន់លេខ១ ចំនួនពីរដង និងរង្វាន់លេខ២ ចំនួនមួយដង វិញ្ញាសាអក្សរសាស្រ្តខ្មែរថ្នាក់ក្រុង គឺជាលទ្ធផលសបញ្ជាក់ឱ្យឃើញពីការខិតខំប្រឹងប្រែងរៀនសូត្រ និងសេចក្តីស្រឡាញ់ចំពោះភាសាកំណើត រួមចំណែកក្នុងការអភិរក្សភាសា និងអក្សរសាស្ត្រជនជាតិខ្មែរ។ ប្អូនឡុក បានចែករំលែក៖ “បំណងប្រាថ្នារបស់ខ្ញុំគឺប្រឡងចូលសាកលវិទ្យាល័យគរុកោសល្យផ្នែកអក្សរសាស្ត្រខ្មែរ ដើម្បីក្លាយជាលោកគ្រូបង្រៀនអក្សរខ្មែរ។ ដើម្បីសម្រេចបានបំណងប្រាថ្នានេះ ចំពោះមុខខ្ញុំនឹងខិតខំប្រឹងប្រែងរៀនសូត្រឱ្យបានល្អ ដើម្បីប្រឡងជាប់នៅក្នុងសម័យប្រឡងមធ្យមសិក្សាចំណេះទូទៅថ្នាក់ជាតិខាងមុខនេះ"។ ជាមួយនឹងលទ្ធផលសិក្សាដែលសម្រេចបានក្នុងរយៈពេល៣ឆ្នាំកន្លងមក សង្ឃឹមថាប្អូនឡុក នឹងទទួលបានលទ្ធផលគាប់ប្រសើរក្នុងការប្រឡងនាពេលខាងមុខ ដើម្បីក្លាយជាគ្រូបង្រៀនអក្សរខ្មែរ នាំយកចំណេះដឹងទៅបណ្ដុះបណ្ដាលដល់កូនចៅជនជាតិខ្មែរនៅតំបន់ជនបទត្រឹងដេដូចបំណងប្រាថ្នា៕

យ្វីអាញ -ថាច់ធី

ចែករំលែកអត្ថបទ

ពាក្យគន្លឹះ