ព្រឹត្តិការណ៍ - នយោបាយ ព្រឹត្តិការណ៍

15/02/2026 - 10:53

នាយកមន្ទីរជនជាតិនិងសាសនា អញ្ជើញទៅសួរសុខទុក្ខ និងជូនអំ ណោយដល់ជនជាតិភាគតិចនៅទីក្រុងកឹងធើ

លោកឡឹមហ្វាងម៉ូវ នាយកមន្ទីរជនជាតិនិងសាសនាទីក្រុងកឹងធើ បានអញ្ជើញទៅសួរសុខទុក្ខ ប្រសិទ្ធពរបុណ្យចូលឆ្នាំថ្មីវៀតណាម និងជូនអំណោយដល់អ្នកមានប្រិយភាព គ្រួសារក្រីក្រ នៅតាមបណ្តាឃុំតំបន់ជនជាតិភាគតិចលើភូមិឋានទីក្រុង។

លោកឡឹមហ្វាងម៉ូវ នាយកមន្ទីរជនជាតិនិងសាសនាទីក្រុងកឹងធើ ជូនអំណោយ
ដល់អ្នកមានប្រិយភាពនិងគ្រួសារក្រីក្រ។

អញ្ជើញចូលរួមជាមួយគណៈប្រតិភូ មានព្រះតេជគុណ ថិតប៊ិញតឹម សមាជិកគណៈប្រចាំការក្រុមប្រឹក្សាអភិបាល អនុប្រធានគណៈប្រចាំការនៃគណៈអភិបាលសមាគមពុទ្ធសាសនាវៀតណាមទីក្រុងកឹងធើ រួមជាមួយតំណាងថ្នាក់ដឹកនាំគណៈកម្មាធិការបក្ស រដ្ឋអំណាចភូមិភាគ និងសប្បុរសជន។

គណៈប្រតិភូបានអញ្ជើញទៅបណ្តាឃុំធ្វឹងហ្វា ហ៊ូដាក់គៀងនិងអាងនិញ។ នៅកន្លែងនីមួយៗលោកឡឹមហ្វាងម៉ូវ បានសួរសុខទុក្ខយ៉ាងស្និទ្ធស្នាលពីជីវភាព ស្ថានភាពផលិត ការសិក្សារបស់កូនចៅមាមីងជនរួមជាតិ ព្រមទាំងកត់សម្គាល់នូវរាល់ការខិតខំប្រឹងប្រែងរបស់គណៈកម្មាធិការបក្ស រដ្ឋអំណាចភូមិភាគ ក្នុងការគិតគូរដល់សុខុមាលភាពសង្គម អនុវត្តប្រកបដោយប្រសិទ្ធភាពនូវរាល់គោលនយោបាយជនជាតិនិងសាសនា។

ក្នុងឱកាសនេះ គណៈប្រតិភូបានជូនអំណោយជិត ១០០ ចំណែក ដល់អ្នកមានប្រិយភាពគំរូ និងជិត ៣០០ ចំណែកជូនដល់គ្រួសារក្រីក្រ គ្រួសារដែលមានជីវភាពលំបាកលើភូមិឋាន។ អំណោយទាំងនេះ ទោះបីមានតម្លៃមិនច្រើនក៏ដោយ ប៉ុន្តែបានបង្ហាញពីការយកចិត្តទុកដាក់ ចែករំលែករបស់ថ្នាក់ដឹកនាំទីក្រុងចំពោះមាមីងជនជាតិភាគតិច ជាពិសេសគឺក្នុងដំណាក់កាលក្រោយពីរួមបញ្ចូលអង្គភាពរដ្ឋបាល។

ថ្លែងការណ៍ក្នុងពិធីជួបសំណេះសំណាល លោកឡឹមហ្វាងម៉ូវ បានសង្កត់ធ្ងន់៖ “បក្ស និងរដ្ឋ តែងកំណត់ការងារជនជាតិជាភារកិច្ចយុទ្ធសាស្ត្រយូរអង្វែង។ ទីក្រុងកឹងធើ នឹងបន្តអនុវត្តព្រមៗគ្នានូវរាល់គោលនយោបាយជំនួយអភិវឌ្ឍសេដ្ឋកិច្ច-សង្គម លើកកម្ពស់ជីវភាពសម្ភារៈនិងស្មារតីជូនមាមីងជនជាតិភាគតិច។ លោកសង្ឃឹមថា កងជួរអ្នកមានប្រិយភាពនឹងបន្តពង្រីកតួនាទីជាស្ពានតភ្ជាប់ សកម្មឃោសនា ចលនាប្រជាជនឱ្យអនុវត្តល្អនូវគោលការណ៍របស់បក្ស គោលនយោបាយ ច្បាប់របស់រដ្ឋ រក្សានូវអត្តសញ្ញាណវប្បធម៌ជនជាតិ សាមគ្គីកសាងជីវភាពថ្មី”។

សកម្មភាពសួរសុខទុក្ខ និងជូនអំណោយ បានបង្ហាញពីការយកចិត្តទុកដាក់យ៉ាងជ្រាលជ្រៅរបស់ថ្នាក់ដឹកនាំទីក្រុង ចំពោះតំបន់ជនជាតិភាគតិច រួមចំណែកពង្រឹងផែនមហាសាមគ្គីទូទាំងជនជាតិ បង្កកម្លាំងជំរុញដើម្បីមាមីងបន្តឈានឡើងអភិវឌ្ឍសេដ្ឋកិច្ច លំនឹងជីវភាពក្នុងឆ្នាំថ្មី៕

ហុងទើ - សុផន

ចែករំលែកអត្ថបទ

ពាក្យគន្លឹះ