កំសាន្ត រឿងពីនេះពីនោះ

28/11/2025 - 06:11

គន្លឹះធ្វើឱ្យសម្លៀកបំពាក់ឆាប់ស្ងួត បំបាត់ក្លិនផ្អួរ

អាកាសធាតុសំណើមធ្វើឱ្យសម្លៀកបំពាក់ស្ងួតយឺត ហើយមានធុំក្លិនមិនល្អ។ ខាងក្រោមនេះជាគន្លឹះមួយចំនួនសម្រាប់លោកអ្នកស្វែងយល់ ដើម្បីបន្ថយបញ្ហាទាំងនេះ។

១. លាតសម្លៀកបំពាក់ហាលឱ្យបានធំ

 រូបជាឧទាហរណ៍។

សម្លៀកបំពាក់រដូវរងា ភាគច្រើនជាអាវយឺតក្រាស់ អាវរងាដែលមានហោប៉ៅច្រើននិងមួក ដូច្នេះហើយវាកាន់តែពិបាកស្ងួតពេលអាកាសធាតុសំណើម។ ចំណុចដែលលោកអ្នកត្រូវធ្វើនៅពេលហាលសម្លៀកបំពាក់ គឺលាតសម្លៀកបំពាក់ហាលឱ្យបានធំ។

ការហាលសម្លៀកបំពាក់ត្រូវមានគម្លាត មិនគួរហាលជាប់គ្នាពេក ពីព្រោះអាចបង្កឱ្យមានធុំក្លិនមិនល្អ។

២. ហាលសម្លៀកបំពាក់នៅកន្លែងមានខ្យល់ល្អ

ភាគច្រើនមានទម្លាប់ហាលសម្លៀកបំពាក់នៅមាត់បង្អួច ដើម្បីជៀសវាងភ្លៀងសើម ប៉ុន្តែតាមពិតហាលមាត់បង្អួចធ្វើឱ្យរាំងស្ទះខ្យល់ ដែលនាំឱ្យសម្លៀកបំពាក់ធុំក្លិនផ្អួរ។ កន្លែងល្អបំផុតសម្រាប់ហាលសម្លៀកបំពាក់គឺនៅខាងក្រៅផ្ទះ។

៣. ប្រើកន្សែងដើម្បីប៊ឺតទឹក

មុនពេលហាលសម្លៀកបំពាក់ លោកអ្នកអាចដាក់វាចូលទៅក្នុងកន្សែងស្ងួតធំមួយ ប្រើដៃសង្កត់ខ្លាំងៗដើម្បីឱ្យកន្សែងប៊ឺតយកសំណើមចេញខ្លះ សម្លៀកបំពាក់នឹងឆាប់ស្ងួតជាង។

៤. ថង់ផ្លាស្ទិកនិងម៉ាស៊ីនផ្លុំសក់

វិធីនេះស្រដៀងនឹងការប្រើម៉ាស៊ីនសម្ងួតសម្លៀកបំពាក់។ បន្ទាប់ពីច្របាច់រឹតឱ្យស្ងួត អ្នកដាក់សម្លៀកបំពាក់ទាំងអស់ចូលក្នុងថង់ប្លាស្ទិកធំមួយ បិទមាត់ឱ្យជិត ដោយទុកចន្លោះប្រហោងតូចៗមួយចំនួនដើម្បីឱ្យចំហាយទឹកចេញ។ បន្ទាប់មកប្រើម៉ាស៊ីន ផ្លុំសក់បើកកម្តៅខ្ពស់ វានឹងជួយឱ្យសម្លៀកបំពាក់ឆាប់ស្ងួតជាង។

៥. ប្រើម៉ាស៊ីនប៊ឺតសំណើមនិងកង្ហារ

ម៉ាស៊ីនប៊ឺតសំណើមមិនត្រឹមតែមានប្រសិទ្ធភាពប៊ឺតសំណើមខ្យល់អាកាសប៉ុណ្ណោះទេ ថែមទាំងជាឧបករណ៍ជួយឱ្យសម្លៀកបំពាក់ឆាប់ស្ងួតទៀតផង។ ដាក់សម្លៀកបំពាក់ក្នុងកន្លែងបិទជិត បើកម៉ាស៊ីនប៊ឺតសំណើម អ្នកនឹងឃើញប្រសិទ្ធភាពជាពុំខាន។

អ្នកក៏អាចប្រើកង្ហារបក់ដោយផ្ទាល់ទៅលើសម្លៀកបំពាក់ដែលដាក់វានៅមុខបង្អួចដើម្បីឱ្យភាយចំហាយទឹក។

៦. ប្រើម៉ាស៊ីនត្រជាក់ដើម្បីសម្ងួតសម្លៀកបំពាក់

ក្រៅពីនោះ ម៉ាស៊ីនត្រជាក់ក៏ជាជម្រើសល្អដើម្បីជួយឱ្យសម្លៀកបំពាក់ឆាប់ស្ងួតផងដែរ។ គប្បីជ្រើសរើសបន្ទប់បិទជិតមួយបន្ទប់ តូចគឺកាន់តែល្អ ព្យួរសម្លៀកបំពាក់ឡើង។ បើកម៉ាស៊ីនត្រជាក់ ពេញមួយយប់ព្រឹកឡើងអ្នកនឹងឃើញសម្លៀកបំពាក់ស្ងួតនិងមិនក្លិនផ្អួរទៀតផង៕

យោង៖ Vietnamnet.vn - ថាច់ធី

ចែករំលែកអត្ថបទ

ពាក្យគន្លឹះ