មហាសាមគ្គីជនជាតិ ភូមិស្រុកផ្លាស់ថ្មី

07/10/2025 - 08:48

ជីវភាពថ្មីនៅឃុំធ្វឹងហ្វា

ប៉ុន្មានឆ្នាំកន្លង ការផ្សព្វផ្សាយគោលនយោបាយជនជាតិនិងកម្មវិធីទិសដៅជាតិ បានធ្វើឱ្យជីវភាពសេដ្ឋកិច្ច-សង្គមមានការរីកចម្រើន; ហេដ្ឋារចនាសម្ព័ន្ធបានវិនិយោគកសាងសមរម្យ; ជីវភាពសម្ភារៈនិងស្មារតីរបស់មាមីងបានកែលម្អ ទិដ្ឋភាពជនបទតំបន់ជនជាតិភាគតិចនៅឃុំធ្វឹងហ្វាទី ក្រុងកឹងធើ កាន់តែស្រស់ស្អាត។ ភាពវិវឌ្ឍនេះ គឺជាកម្លាំងជំរុញសម្រាប់ប្រជាជនរួមជាមួយនឹងរដ្ឋអំណាចគ្រប់លំដាប់ថ្នាក់ បន្តការខិតខំអនុវត្តទិសដៅអភិវឌ្ឍសេដ្ឋកិច្ច-សង្គមនៅភូមិភាគ។

ផ្លូវជនបទនៅតំបន់ជនរួមជាតិខ្មែរ ឃុំធ្វឹងហ្វា បានវិនិយោគកសាងសមរម្យ ឆ្លើយតបការធ្វើដំណើរនិងដឹកជញ្ជូនកសិផលរបស់ប្រជាជន។

បច្ចុប្បន្ន ឃុំធ្វឹងហ្វា មានជនរួមជាតិខ្មែររស់នៅជាង ៧៥%។ រយៈពេលកន្លង រដ្ឋអំណាចភូមិភាគតែងយកចិត្តទុកដាក់ចំពោះជីវភាពរបស់ប្រជាជន ឆ្លងតាមរយៈកម្មវិធី គម្រោងជាច្រើនរបស់មជ្ឈិមនិងកម្មវិធីសុខុមាលភាពសង្គម រួមចំណែកលើកកម្ពស់ជីវភាពសម្ភារៈនិងស្មារតីរបស់ប្រជាជន។ លោកគឹមចែ អ្នកមានប្រិយភាពនៅឃុំធ្វឹងហ្វា ចែករំលែក៖ “ឃុំធ្វឹងហ្វា មានជនរួមជាតិខ្មែររស់នៅច្រើន ហើយគ្រួសារក្រីក្រក៏បានបក្ស រដ្ឋនិងភូមិភាគឧបត្ថម្ភសាងសង់ផ្ទះថ្មី។ ក្រៅពីនោះ ហេដ្ឋារចនាសម្ព័ន្ធបានវិនិយោគកសាងរឹងមាំ; សាលារៀននិងដំណាក់សុខាភិបាល បានសាងសង់ទូលំទូលាយ ប្រព័ន្ធគមនាគមន៍ជនបទ បានវិនិយោគព្រមៗគ្នា ងាយស្រួលក្នុងការធ្វើដំណើរទៅមក។ ពិសេស ប្រជាជនភូមិភាគមានការខិតខំពលកម្មផលិត ប្រឹងប្រែងឈានឡើងដើម្បីកែលម្អជីវភាព”។

ទន្ទឹមនឹងការអភិវឌ្ឍហេដ្ឋារចនាសម្ព័ន្ធជនបទ ជីវភាពរបស់ប្រជាជនមានការលើកកម្ពស់ជាបណ្តើរៗ អាស្រ័យការអភិវឌ្ឍបច្ចេកវិទ្យាព័ត៌មាន និងផ្គត់ផ្គង់សេវាងាយស្រួលនានាផងដែរ។ មីងថាច់ធីសាភឿង ភូមិត្រាកាញ់ A២ ឃុំធ្វឹងហ្វា ឱ្យដឹង៖ “សព្វថ្ងៃនេះ មាមីងខ្មែរភាគច្រើនចេះប្រើប្រាស់ទូរស័ព្ទឆ្លាតវៃ ម្យ៉ាងទៀតប្រព័ន្ធអ៊ីនធឺណិត មានការរីកចម្រើន ម្ល៉ោះហើយមាមីងអាចអនុវត្តបែបបទរដ្ឋបាលតាមប្រព័ន្ធអ៊ីនធឺណិត បន្ទាប់មកស្ថាប័នមានសមត្ថកិច្ចនឹងមកប្រគល់លទ្ធផលដល់ផ្ទះ ឃើញថាមានការងាយស្រួល ហើយមិនសូវបង់ខាត់ពេលវេលានិងលុយកាក់”។

ឃុំធ្វឹងហ្វា ទីក្រុងកឹងធើ ជាឃុំត្រូវបានរួមបញ្ចូលពីឃុំធ្វឹងហ្វានិងឃុំភូតឹង ស្រុកចូវថាញ ខេត្តសុកត្រាំង (ចាស់)។ ប៉ុន្មានឆ្នាំកន្លង ប្រជាជនសប្បាយរីករាយយ៉ាងខ្លាំងចំពោះការយកចិត្តទុកដាក់របស់បក្ស និងរដ្ឋ។ ទន្ទឹមនឹងនោះ ប្រជាជនបានទទួលឧបត្ថម្ភបុលទុនពីធនាគារគោលនយោបាយសង្គម ដើម្បីអភិវឌ្ឍសេដ្ឋកិច្ច រួមចំណែកលុបបំបាត់ភាពអត់ឃ្លាន បន្ថយភាពក្រីក្រក្នុងឃុំ។ អ្នកស្រីចូវហុងហ្វា ប្រធានគណៈកម្មាធិការរណសិរ្សមាតុភូមិវៀតណាមឃុំធ្វឹងហ្វា មានប្រសាសន៍៖ “ឃុំបានផ្តោតការយកចិត្តទុកដាក់គិតគូរដល់អ្នកក្រ ជាមួយនឹងការងារផ្សព្វផ្សាយនូវគោលនយោបាយជូនប្រជាជនបានទាន់ពេល ជាពិសេសចំពោះគ្រួសារជនជាតិភាគតិច។ ជាក់ស្តែង ក្នុងរយៈពេលកន្លង ឃុំបានឧបត្ថម្ភសាងសង់និងជួសជុលផ្ទះជូនប្រជាជន១០៨គ្រួសារ; រៀបចំបើកថ្នាក់បណ្តុះបណ្តាលមុខរបរជូនប្រជាជនជាង២.៣០០នាក់; ចែកជូនអង្ករប្រមាណ១០តោន ឧបត្ថម្ភថវិកានិងគ្រឿងឧបភោគបរិភោគដល់គ្រួសារក្រីក្រ និងគ្រួសារជនជាតិភាគតិចក្នុងឃុំជាដើម។

ចំពោះការរីកចម្រើននៃភូមិស្រុក ប្រជាជននៅឃុំធ្វឹងហ្វា ទីក្រុងកឹងធើ មានការរីករាយយ៉ាងខ្លាំងចំពោះការយកចិត្តទុកដាក់របស់បក្ស រដ្ឋ និងរដ្ឋអំណាចភូមិភាគ។ នេះក៏ជាកម្លាំងជំរុញសម្រាប់មាមីងបន្តរួមសាមគ្គី ថែរក្សាប្រពៃណីវប្បធម៌ដ៏ល្អរបស់ជនជាតិ និងកសាងភូមិស្រុកឱ្យកាន់តែសម្បូរសប្បាយ៕

ដាលីន - ថាច់ធី

ចែករំលែកអត្ថបទ

ពាក្យគន្លឹះ