សុខភាព - អប់រំ សុខភាព

04/10/2025 - 09:47

ព្យាបាលជំងឺតេតាណូស ករណីធ្ងន់ដោយជោគជ័យ

ជាមួយភារកិច្ចចាត់ទុកសុខភាពនិងអាយុជីវិតរបស់អ្នកជំងឺសំខាន់ចម្បង កងជួរបុគ្គលិកពេទ្យនៃមន្ទីរពេទ្យពហុព្យាបាលសុកត្រាំងនិងមន្ទីរពេទ្យឯកទេសផ្នែកសម្ភពនិងកុមារ បានធ្វើការព្យាបាលនិងសង្គ្រោះអ្នកជំងឺតេតាណូស ឆ្លងផុតគ្រោះថ្នាក់ដោយជោគជ័យ នាំមកភាពសប្បាយរីករាយនិងសុភមង្គលដល់អ្នកជំងឺនិងក្រុមគ្រួសារ។

ជាមួយនឹងការព្យាបាលដោយអស់ពីចិត្តរបស់ក្រុមវេជ្ជបណ្ឌិត អ្នកជំងឺឈ្មោះ L.T មានសុខភាពល្អប្រសើរឡើងវិញ។

ថ្មីៗនេះ មន្ទីរពេទ្យពហុព្យាបាលខេត្តសុកត្រាំង បានសង្គ្រោះអ្នកជំងឺឈ្មោះ L.T (អាយុ៧៤ឆ្នាំ) នៅឃុំមីទូ ទីក្រុងកឹងធើ ដែលមានជំងឺតេតាណូសកម្រិតធ្ងន់ ឆ្លងផុតពីគ្រោះថ្នាក់។ តាមរយៈនោះ នៅថ្ងៃទី៧ ខែសីហា ឆ្នាំ២០២៥ អ្នកជំងឺឈ្មោះ L.T បាននាំចូលមន្ទីរពេទ្យដោយសាររងរបួសជើងស្តាំមិនបានព្យាបាលជាង៧ថ្ងៃ ហើយមិនបានចាក់វ៉ាក់សាំងបង្ការជំងឺតេតាណូស។ គ្រួសារអ្នកជំងឺបានឱ្យដឹងថា ពេលរងរបួសអ្នកជំងឺឈ្មោះ L.T ទៅទិញថ្នាំនៅឱសថស្ថានលេប។ ប៉ុន្មានថ្ងៃក្រោយមក អ្នកជំងឺមានរោគសញ្ញារឹងថ្គាមរឹងកញ្ចឹងក កន្ត្រាក់សាច់ដុំ បានគ្រួសារនាំចូលមន្ទីរពេទ្យ។

នៅទីនេះ អ្នកជំងឺបានវេជ្ជបណ្ឌិតធ្វើរោគវិនិច្ឆ័យថា កើតជំងឺតេតាណូសទូទៅ ខ្សោយផ្លូវដង្ហើមនិងបានព្យាបាលឆាប់រហ័សដោយវិធានការប្រពោធកម្មសកម្ម ដូចជា បើកបំពង់ដកដង្ហើមសង្រ្គោះបន្ទាន់ ដាក់ម៉ាស៊ីនជំនួយដង្ហើម ប្រើថ្នាំពន្យឺតសសៃសាច់ដុំនិងថ្នាំសម្រួលសសៃប្រសាទ ដើម្បីគ្រប់គ្រងជំងឺកន្ត្រាក់សាច់ដុំ; ទន្ទឹមនឹងនោះ បានចាក់បញ្ចូលសេរ៉ូមបន្សាបជាតិពុលតេតាណូស បញ្ជូលសេរ៉ូមនិងផ្តល់អាហារតាមរយៈបំពង់សុងអាហារ (sonde) ដើម្បីជំនួយអាហារូបត្ថម្ភក្នុងការព្យាបាល។

បន្ទាប់ពី៦ថ្ងៃធ្វើការព្យាបាល អ្នកជំងឺឈ្មោះ L.T មានអាការៈធ្ងន់ធ្ងរ បង្ហាញរោគសញ្ញាជំងឺដាច់សសៃ ឈាមខួរក្បាល ដូចជា៖ សម្ពាធឈាមឡើងខ្ពស់ និង troponin កម្រិត I កើនខ្ពស់។ វេជ្ជបណ្ឌិត ផ្នែកជំងឺឆ្លងនិងផ្នែកសសៃឈាមបេះដូង បានធ្វើរោគវិនិច្ឆ័យថា កើតជំងឺដាច់សសៃឈាមខួរក្បាល ត្រូវធ្វើការឆ្លុះអេកូ (DSA) និងដាក់ស្តែន (stent) សង្គ្រោះបន្ទាន់។ បន្ទាប់មក អ្នកជំងឺបានបន្តព្យាបាលនៅផ្នែកជំងឺឆ្លង។

ក្នុងដំណាក់ការព្យាបាល អ្នកជំងឺនៅទាំងឆ្លងមេរោគតាមឈាមនិងរលាកសួត ប៉ុន្តែត្រូវបានព្យាបាលប្រពោធកម្មសកម្ម ប្រើប្រាស់ថ្នាំអង្គបដិបក្ខប្រាណនិងប្រើម៉ាស៊ីនជំនួយដង្ហើម។ នៅថ្ងៃទី១៩ ខែកញ្ញា អ្នកជំងឺឈ្មោះ L.T អាចដកដង្ហើមបានដោយខ្លួនឯង ឈប់ប្រើម៉ាស៊ីនជំនួយដង្ហើម រហូតដល់ថ្ងៃទី២២ ខែកញ្ញា អ្នកជំងឺក៏បានដកបំពង់ដង្ហើមចេញ។ បច្ចុប្បន្ន អ្នកជំងឺឈ្មោះ L.T មានស្មារតីនឹងនរ ហូបបាន កំពុងហាត់ឈរនិងដើរទៅមកជាធម្មតា។ វេជ្ជបណ្ឌិត តាំងវ៉ូវ ប្រធានផ្នែកជំងឺឆ្លង ចែករំលែក៖ “នេះគឺជំងឺតេតាណូសករណីធ្ងន់ នាំចូលពេទ្យយឺតក្នុងស្ថានភាពកន្ត្រាក់សាច់ដុំ ថែមទាំងវ័យចាស់និងកើតមានរោគសញ្ញាដ៏គ្រោះថ្នាក់ជាច្រើន។ អាស្រ័យសហការជិតដិតរវាងផ្នែកឯកទេស បន្ទាប់ពីព្យាបាលជាង៥០ថ្ងៃ ជាមួយនឹងការប្រែប្រួលដ៏ស្មុគស្មាញ អ្នកជំងឺមានសុខភាពល្អប្រសើរ ទើបបានចុះពីពេទ្យ”។ វេជ្ជបណ្ឌិត តាំងវ៉ូវ បានក្រើនរំលឹកចំពោះករណីដូចអ្នកជំងឺឈ្មោះ L.T អាចបញ្ចៀសជំងឺបានប្រសិនបើចាក់ថ្នាំបង្ការតេតាណូសបានគ្រប់ និងធ្វើការព្យាបាលរបួសបានត្រឹមត្រូវ។ តេតាណូសជាជំងឺដ៏គ្រោះថ្នាក់ ប៉ុន្តែមានវ៉ាក់សាំងបង្ការយ៉ាងមានប្រសិទ្ធភាព ប្រជាជនគប្បីលើកកម្ពស់ការយល់ដឹងនិងស្មារតីបង្ការជំងឺបានត្រឹមត្រូវ។

ថ្មីៗនេះ មន្ទីរពេទ្យឯកទេសផ្នែកសម្ភពនិងកុមារខេត្តសុកត្រាំង បានទទួលព្យាបាលទារកអាយុ៨ថ្ងៃ នៅសង្កាត់វិញចូវ ទីក្រុងកឹងធើ កើតជំងឺតេតាណូស ឆ្លងផុតពីគ្រោះថ្នាក់ដោយជោគជ័យ។ ទារកត្រូវបានគ្រួសារនាំចូលមន្ទីរពេទ្យក្នុងស្ថានភាពដកដង្ហើមផុតៗ ជ្រុះផ្ចិតចេញទឹករងៃ ស្បែកស្លេកស្លាំង ដៃជើងប្រទាញ។ បន្ទាប់ពីពិនិត្យនិងធ្វើតេស្តចាំបាច់ ក្រុមវេជ្ជបណ្ឌិតបានធ្វើរោគវិច្ឆ័យថា ទារកនេះកើតជំងឺតេតាណូស ខ្សោយផ្លូវដង្ហើមនិងឆ្លងមេរោគតាមឈាម។ ទារកត្រូវបានបញ្ជូនទៅព្យាបាលនៅផ្នែកប្រពោធកម្មសកម្មនិងប្រឆាំងជាតិពុល ដើម្បីធ្វើការដាក់ម៉ាស៊ីនជំនួយដង្ហើម ព្យាបាលដោយអង្គបដិបក្ខប្រាណ បញ្ចូលសេរ៉ូមនិងអាហារូបត្ថម្ភតាមសសៃឈាម បង្ការគ្រប់គ្រងការប្រទាញកន្ត្រាក់។ ដោយការព្យាយាមនិងការអស់ពីចិត្តពីថ្លើមរបស់ក្រុមគ្រូពេទ្យឯកទេស ក្រោយពីជិត១ខែព្យាបាលយ៉ាងសកម្ម ទារកឈប់ប្រើម៉ាស៊ីនជំនួយដង្ហើម បញ្ជូនទៅផ្នែកទារក ដើម្បីបន្តតាមដាននិងថែទាំសុខភាពបន្ថែម៧ថ្ងៃមុននឹងចុះពីពេទ្យ។

វេជ្ជបណ្ឌិតឯកទេសកម្រិតII ង្វៀងទ្រឿងខាញ់ ប្រធានផ្នែកទារក ឱ្យដឹង៖ “នេះជាករណីធ្ងន់ធ្ងរក្នុងចំណោមជំងឺតេតាណូសលើទារកជាច្រើន មូលហេតុបណ្តាលមកពីអង្គបដិបក្ខប្រាណខ្សោយឬបរិស្ថានកន្លែងកើតមិនទាន់ធានាជ្រះមេរោគ។ ដើម្បីបង្ការទប់ស្កាត់ក្នុងអំឡុងពេលមានផ្ទៃ ស្ត្រីគប្បីទៅពិនិត្យគភ៌តាមការកំណត់ ចាក់ថ្នាំបង្ការគ្រប់និងត្រូវតាមកាលបរិច្ឆេទ ពិសេសគឺវ៉ាក់សាំងបង្ការជំងឺតេតាណូស ដើម្បីបង្កើតអង្គបដិបក្ខប្រាណការពារម្តាយនិងទារក។ ពេលសម្រាល គប្បីធានាលក្ខណៈជ្រះមេរោគ ដើម្បីបន្ថយទាបបំផុតហានិភ័យឆ្លងរោគតេតាណូស។ ក្រោយពីសម្រាល ឪពុកម្តាយត្រូវថែទាំផ្ចិតនិងអនាម័យទារកឱ្យបានត្រឹមត្រូវ តាមដានដិតដល់រោគសញ្ញាខុសប្រក្រតី ប្រសិនបើទារកមានអាការៈគ្រុនក្តៅ មិនបៅដោះ ប្រទាញកន្ត្រាក់។ល។ គប្បីយកទៅមន្ទីរពេទ្យជាបន្ទាន់ ដើម្បីព្យាបាលទាន់ពេល ជៀសវាងកើតមានអាការៈប្រែប្រួលដ៏គ្រោះថ្នាក់”៕

យ្វីអាញ-មុនី

ចែករំលែកអត្ថបទ

ពាក្យគន្លឹះ