មហាសាមគ្គីជនជាតិ ភូមិស្រុកផ្លាស់ថ្មី

11/12/2018 - 15:17

វិញត្រាច់ដុង បង្កើនគុណភាពឃុំជនបទថ្មី

អនុវត្តល្អនូវគោលនយោបាយជនជាតិសកម្មក្នុងការផ្សព្វផ្សាយ បានប្រជាជនស្របគំនិតគាំទ្រ ម្ល៉ោះហើយឃុំវិញត្រាច់ដុង ក្រុងបាកលីវ ខេត្តបាកលីវ សម្រេចបានជោគជ័យក្នុងការកសាងឃុំជនបទថ្មី។ មុខមាត់ជនបទថ្មីឃុំវិញត្រាច់ដុង ពិតជាមានការផ្លាស់ថ្មីយ៉ាងប្រចក្ស។

កូនចៅជនរួនជាតិខ្មែរ បានរៀនក្នុងសាលាសមរម្យ។

វិញត្រាច់ដុងជាឃុំក្រីក្រ មានជនរួមជាតិខ្មែររស់នៅជាង៧០% ម្ល៉ោះហើយ ឃុំបានទទួលផលពីគោលនយោបាយជនជាតិជាច្រើន ពិសេសគឺកម្មវិធី១៣៥។ តាមប្រសាសន៍លោកត្រឹងង៉ុកចៀង លេខាគណៈកម្មាធិការបក្សឃុំ ៖ ឆ្នាំ២០១១ ទូទាំងឃុំមានគ្រួសារក្រីក្រជាង៣១% ម្ល៉ោះហើយមានគោលនយោបាយជាច្រើន ដូចជា៖ ឧបត្ថម្ភលំនៅឋាន អគ្គិសនី ទឹកស្អាតប្រើប្រាស់ បុលទុន ឧបត្ថម្ភពូជដំណាំ សត្វចិញ្ចឹមនិងបច្ចេកទេស។ល។ ដល់គ្រួសារក្រីក្រ ត្រូវបានផ្សព្វផ្សាយអនុវត្ត។ ពិសេសគឺកម្មវិធី១៣៥ ស្តីពីការសាងសង់សាលារៀន ដំណាក់សុខាភិបាល ផ្លូវជនបទ ធារាសាស្រ្តជាដើម សុទ្ធសឹងត្រូវបានវិនិយោគកសាង។ ព្រោះហេតុនោះ នៅពេលចាប់ផ្ដើមដំណើរការកសាងជនបទថ្មី ប្រព័ន្ធហេដ្ឋារចនាសម្ព័ន្ធជនបទជាសារវ័ន្តត្រូវបានវិនិយោគកសាង; ជីវភាពប្រជាជនក៏បានលើកកម្ពស់ ទើបឃុំអនុវត្តសម្រេចបានឆាប់រហ័សនូវលក្ខឋានជនបទថ្មីទាំង១៩។

ឆ្នាំ២០១៧ ឃុំវិញត្រាច់ដុង បានទទួលស្គាល់សម្រេចបទដ្ឋានជនបទថ្មី។ លោកត្រឹង ង៉ុកចៀង លេខាគណៈកម្មាធិការបក្សឃុំ ឲ្យដឹង ៖ “កំណត់ច្បាស់នូវការផ្សព្វផ្សាយ ជាភារកិច្ចសំខាន់និងយកប្រជាជនជាមូលដ្ឋានគ្រឹះ ម្ល៉ោះហើយគណៈកម្មាធិការបក្ស បានចាត់ការងារដល់អង្គការមហាជននានា បក្ខជនដើម្បីជំរុញការផ្សព្វផ្សាយ ចលនាមាមីងព្រួតដៃអនុវត្ត។ អាស្រ័យហេតុនោះ មាមីងយល់ច្បាស់ពីខ្លឹមសារនិងគោលដៅនៃការកសាងជនបទថ្មី ម្ល៉ោះហើយក៏ស្រុះស្រួលគាំទ្រសាមគ្គីរួមកម្លាំងអនុវត្ត។ លេចធ្លោបំផុត គឺមាមីងបានបរិច្ចាគដីជាង៣.៣០០ម២ ដើម្បីពង្រីកផ្លូវ ដាក់អំពូលភ្លើងផ្លូវសាធារណ៍ចំនួន១៥០ បរិច្ចាគដីកសាងសាលារៀន ដាំដើមឈើ និងធ្វើរបង។ល។ បង្កសោភណភាពជនបទ។ ជាពិសេស មាមីងបានព្រួតដៃរក្សាអនាម័យបរិស្ថាន រួមចំណែកធ្វើឲ្យឃុំជនបទកាន់តែមានភាពស្រស់បំព្រង”។

ក្រៅពីនោះ ឃុំនៅទាំងយកចិត្តទុកដាក់ដល់ការអភិវឌ្ឍផលិតកម្ម បង្កើនប្រាក់ចំណូលដល់ប្រជាជនទៀតផង ដូចជា៖ បង្កើតសហករណ៍ផលិតកម្ម ផ្ទេរជូនវិទ្យាសាស្រ្តបច្ចេកទេសចិញ្ចឹមបង្គានាគតាមទម្រង់ VietGAP ដាំមៀន ឪឡឹក ទំពាំងបារាំងជាដើម។ រីឯការងារកាត់បន្ថយភាពក្រីក្រក៏បានយកចិត្តទុកដាក់ និងសម្រេចបានលទ្ធផលល្អប្រសើរ។ ឆ្លងតាមរយៈនោះ មានគ្រួសារក្រីក្រជាង១២០ បានឧបត្ថម្ភលំនៅឋានដើមទុន ពូជដំណាំ សត្វចិញ្ចឹម និងមធ្យោបាយផលិតកម្មជាដើម។ ផ្តើមពីនោះ អត្រាគ្រួសារក្រីក្ររបស់ឃុំថយចុះនៅត្រឹមតែ៣,៤%។ ព្រះតេជព្រះគុណយឿងក្វឹង ព្រះចៅអធិការវត្តគម្ពីរសាគរព្រែកជ្រៅ ឃុំវិញត្រាច់ដុង មានព្រះថេរដីកា ៖ “បច្ចុប្បន្ន មកកាន់ឃុំវិញត្រាច់ដុង គ្មានអ្នកណាស្មានថា មុននេះគឺជាឃុំក្រីក្រឡើយ។ ផ្លូវគមនាគមន៍បានក្រាលបេតុង អគ្គិសនី ទឹកស្អាតប្រើប្រាស់ អគារសិក្សា ធារាសាស្រ្ត។ល។ សុទ្ធតែបានវិនិយោគកសាង ឆ្លើយតបទៅនឹងតម្រូវការផលិតកម្មរបស់ប្រជាជន។ ពេលធ្វើដំណើរចុះទៅដល់ភូមិនានា ឃើញផ្ទះឥដ្ឋរបស់មាមីងខ្មែរបានសាងសង់ឡើងបន្ថែមជាច្រើន។ នោះគឺដោយសារគោលនយោបាយរបស់បក្ស រដ្ឋ វិនិយោគនិងការយកចិត្តទុកដាក់គិតគូរដោយអស់ពីចិត្តពីថ្លើមរបស់រដ្ឋអំណាច ម្ល៉ោះហើយទើបជីវភាពមាមីងខ្មែរបានលើកកម្ពស់ដូច្នេះ”។

លោកត្រឹងង៉ុកចៀង លេខាគណៈកម្មាធិការបក្សឃុំ ឲ្យដឹង ៖ “ឃុំបន្តជំរុញការផ្សព្វផ្សាយ មាមីងព្រួតដៃរក្សាលំនឹងនូវលក្ខឋានដែលសម្រេចបាន។ បន្តអភិវឌ្ឍហេដ្ឋារចនាសម្ព័ន្ធជនបទ ធារាសាស្រ្តបម្រើការផលិតកម្មដល់ប្រជាជន។ បង្វែររចនាសម្ព័ន្ធពូជដំណាំ សត្វចិញ្ចឹម អភិវឌ្ឍកសិកម្មតាមទិសដៅផលិតទំនិញប្រមូលផ្តុំ; គម្រោងផែនការតំបន់ផលិតកម្ម ដាំដំណាំរួមផ្សំ អនុវត្តវិទ្យាសាស្រ្តបច្ចេកទេសក្នុងការចិញ្ចឹមសត្វ; ជំរុញទឹកចិត្តប្រជាជនដាំដំណាំដែលមានតម្លៃសេដ្ឋកិច្ចខ្ពស់ ដូចជា៖ ទំពាំងបារាំង មៀននិងដំណាំរួមផ្សំរយៈពេលខ្លីជាដើម”៕

លីធាន-វិមាន

ចែករំលែកអត្ថបទ

ពាក្យគន្លឹះ