សុខភាព - អប់រំ សុខភាព

31/07/2026 - 15:09

ការចុះហត្ថលេខាលើកិច្ចសហប្រតិបត្តិការគ្រប់ជ្រុងជ្រោយ លើកកម្ពស់សមត្ថភាពដល់ប្រព័ន្ធសុខាភិបាលក្នុងតំបន់

(អ.ឡ) - រសៀលថ្ងៃទី ៣០ ខែកក្កដា មន្ទីរសុខាភិបាលទីក្រុងកឹងធើ បានចាត់តាំងសន្និសីទចុះហត្ថលេខាលើកិច្ចសហប្រតិបត្តិការផ្នែកវិជ្ជាជីវៈនិងការផ្ទេរបច្ចេកទេស រវាងមូលដ្ឋានពិនិត្យនិងព្យាបាលជំងឺនានាលើភូមិឋានទីក្រុង ដំណាក់កាល ២០២៦-២០៣០។

ថ្លែងការណ៍ក្នុងពិធីបើកសន្និសីទ លោកសាស្ត្រាចារ្យរង បណ្ឌិត វេជ្ជបណ្ឌិត ហ្វាងក្វឹកកឿង នាយកមន្ទីរសុខាភិបាលទីក្រុងកឹងធើ មានប្រសាសន៍ បន្ទាប់ពីការរៀបចំនិងបញ្ចូលអង្គភាពរដ្ឋបាលឡើងវិញ ផ្នែកសុខាភិបាលទីក្រុងប្រឈមនឹងការលំបាកមិនតិចនោះទេ ពិសេសប្រព័ន្ធសុខាភិបាលមូលដ្ឋាននៅខ្វះខាតមូលដ្ឋានសម្ភារៈបរិក្ខារវេជ្ជសាស្ត្រនិងធនធានមនុស្ស។ អាស្រ័យហេតុនេះ មន្ទីរសុខាភិបាលបានដាក់ចេញគោលការណ៍ឱ្យអង្គភាពក្នុងប្រព័ន្ធគាំទ្រគ្នាទៅវិញទៅមកគ្រប់ជ្រុងជ្រោយ ពង្រីកសក្តានុភាពរបស់មន្ទីរពេទ្យថ្នាក់លើ មិនឈប់ត្រឹមការផ្ទេរបច្ចេកទេសប៉ុណ្ណោះទេ។ កម្មវិធីគាំទ្រ រួមមាន៖ ចែករំលែកបទពិសោធន៍ក្នុងការគ្រប់គ្រងមន្ទីរពេទ្យ; លើកកម្ពស់ឥរិយាបថ និងរបៀបបម្រើសេវាថែទាំអ្នកជំងឺ; តម្រង់ទិសអភិវឌ្ឍន៍សេវាសុខាភិបាលថ្មីៗ; ជួយគាំទ្រតាមរយៈវិធីសាស្ត្រ "ចាប់ដៃបង្ហាត់ដោយផ្ទាល់" ដល់មជ្ឈមណ្ឌលសុខាភិបាលនិងមន្ទីរពេទ្យថ្នាក់ក្រោម។

អង្គភាពទាំងឡាយបានចុះហត្ថលេខាលើអនុស្សរណៈនៃកិច្ចសហប្រតិបត្តិការផ្នែកវិជ្ជាជីវៈ និងការផ្ទេរបច្ចេកទេសគ្រប់ជ្រុងជ្រោយ ដំណាក់កាល ២០២៦ -២០៣០។

នាយកមន្ទីរសុខាភិបាលទីក្រុងកឹងធើ បានឱ្យដឹង នៅពេលខាងមុខ បណ្តាមជ្ឈមណ្ឌលសុខាភិបាលតំបន់ គ្រោងនឹងប្ដូរឈ្មោះទៅជាមន្ទីរពេទ្យតំបន់ ដូច្នេះតម្រូវឱ្យមានការពង្រឹងសមត្ថភាពព្យាបាលយ៉ាងខ្លាំង បន្តរក្សាទិសដៅកសាងប្រព័ន្ធសុខាភិបាលទីក្រុងកឹងធើ ឱ្យក្លាយជាមជ្ឈមណ្ឌលសុខាភិបាលឯកទេសកម្រិតខ្ពស់របស់តំបន់វាលរាបទន្លេគឺវឡុង។

នៅពេលខាងមុខ មន្ទីរសុខាភិបាលទីក្រុងកឹងធើ នឹងបន្តអនុវត្តផែនការចុះហត្ថលេខាលើកិច្ចសហប្រតិបត្តិការ ពីអង្គភាពនានាថ្នាក់ទីក្រុង ទៅកាន់បណ្ដាញដំណាក់សុខាភិបាល ព្រមទាំងបន្តពង្រឹងកិច្ចសហប្រតិបត្តិការជាមួយមន្ទីរពេទ្យផ្សេងៗនៅទីក្រុងហូជីមិញ។ ថ្នាក់ដឹកនាំមន្ទីរសុខាភិបាល ក៏បានស្នើឱ្យមន្ទីរពេទ្យនិងមជ្ឈមណ្ឌលសុខាភិបាលតំបន់ ប្រញាប់បូកសរុបនិងរៀបចំបញ្ជីសម្ភារៈបរិក្ខារវេជ្ជសាស្ត្រដែលចាំបាច់ផ្ញើមកមន្ទីរសុខាភិបាល ដើម្បីបញ្ចូលក្នុងផែនការទិញសម្ភារៈបរិក្ខារភ្លាមៗក្នុងឆ្នាំ២០២៦។

អ្នកតំណាងចូលរួមសន្និសីទចុះហត្ថលេខាលើកិច្ចសហប្រតិបត្តិការផ្នែកវិជ្ជាជីវៈនិងការផ្ទេរបច្ចេកទេស រវាងមូលដ្ឋានពិនិត្យនិងព្យាបាលជំងឺនៅលើភូមិឋានទីក្រុង ដំណាក់កាល ២០២៦-២០៣០។ រូបថត៖ ធូសឿង

ក្នុងក្របខ័ណ្ឌនៃកម្មវិធី គណៈចាត់តាំងពិធីចុះហត្ថលេខាលើអនុស្សរណៈនៃកិច្ចសហប្រតិបត្តិការផ្នែកវិជ្ជាជីវៈគ្រប់ជ្រុងជ្រោយ រវាងអង្គភាពផ្ទេរបច្ចេកទេសនិងអង្គភាពទទួលបច្ចេកទេស។

ស្របក្នុងឱកាសនេះ អង្គភាពឧបត្ថម្ភបានប្រគល់ម៉ាស៊ីនវាស់មុខងារសួត ចំនួន ៦ គ្រឿងដែលបំពាក់បច្ចេកវិទ្យាបញ្ញាសិប្បនិម្មិត រួមចំណែកលើកកម្ពស់ប្រសិទ្ធភាពនៃការធ្វើរោគវិនិច្ឆ័យ និងការព្យាបាលជំងឺផ្លូវដង្ហើមនៅតាមមូលដ្ឋានសុខាភិបាល៕

ធូសឿង - ពេជ្រសឿន

ចែករំលែកអត្ថបទ

ពាក្យគន្លឹះ