ព្រឹត្តិការណ៍ - នយោបាយ ព្រឹត្តិការណ៍

24/04/2026 - 22:00

ភូមិ៥ អភិវឌ្ឍន៍លើគ្រប់ជ្រុងជ្រោយ

សាខាបក្សភូមិ៥ ឃុំផុងហីប មានបក្ខជនចំនួន ១៦រូប។ ដោយការខិតខំប្រឹងប្រែងរបស់សាខាបក្សក្នុងការដឹកនាំ និងចង្អុលការអនុវត្តការងារលើគ្រប់វិស័យ បានធ្វើឱ្យទិដ្ឋភាពភូមិ៥ កាន់តែមានភាពរីកចម្រើន ជីវភាពផ្នែកសម្ភារនិងស្មារតីរបស់ប្រជាជនបានលើកកម្ពស់ជាលំដាប់។ ក្នុងឆ្នាំ២០២៥ សាខាបក្សភូមិ៥ បានគណៈកម្មាធិការបក្សថ្នាក់លើវាយតម្លៃជាអង្គភាពសម្រេចភារកិច្ចឆ្នើម។

សាខាបក្សភូមិ៥ ចាត់តាំងបញ្ចូលបក្ខជនថ្មី។

តាមប្រសាសន៍លោក ង្វៀងវ៉ាំងថាញ លេខាសាខាបក្ស និងជាប្រធានភូមិ៥ បានឱ្យដឹងថា ភូមិមានប្រជាជនរស់នៅជិត ៦០០គ្រួសារ ដែលមានប្រជាជនសរុប ៣.៨១២នាក់។ ដើម្បីជួយប្រជាជនអភិវឌ្ឍសេដ្ឋកិច្ច និងលើកកម្ពស់ជីវភាព សាខាបក្សភូមិបានដឹកនាំគណៈប្រជាជនភូមិ គណៈការងាររណសិរ្ស និងបណ្តាសាខាក្រុមសមាគម ជំរុញការឃោសនាឱ្យប្រជាជនផ្លាស់ប្តូររចនាសម្ព័ន្ធដំណាំ និងសត្វចិញ្ចឹម ដោយនាំយកពូជស្រូវដែលមានគុណភាពខ្ពស់ដាក់ទៅក្នុងការផលិត។ ទន្ទឹមនឹងនោះ ក៏មានការឧបត្ថម្ភហ្វឹកហ្វឺនបច្ចេកទេស និងបង្កលក្ខណៈងាយស្រួលឱ្យសមាជិកសមាគម ក៏ដូចជាប្រជាជនបានបុលទុនជាង ២០ពាន់លានដុង ពីធនាគារគោលនយោបាយសង្គម ដើម្បីពង្រីកការផលិតនិងធ្វើអាជីវកម្ម។

បច្ចុប្បន្ន ប្រជាជនភូមិ៥ ផលិតពូជស្រូវដែលមានគុណភាពខ្ពស់ដូចជា៖ OM ១៨ ដាយធើម ៨ លើផ្ទៃដីស្រែសរុប ៤៦២ហិកតា និងមានដីចម្ការចំនួន ៦៥ហិកតា ដែលដាំដុះរុក្ខជាតិហូបផ្លែជាច្រើនប្រភេទដូចជា៖ ស្វាយ ទៀបបន្លា... គ្រួសារជាច្រើនមានចំណូលបន្ថែមតាមរយៈការប្រើប្រាស់ប្រភពទុនបុលដែលមានអត្រាការប្រាក់ទាប ដើម្បីបើកហាងលក់សារពើភណ្ឌ។ លោកហ្វិញវ៉ាំងបា ប្រជាជននៅក្នុងភូមិបានចែករំលែក៖ "ដោយបានភូមិភាគជំនួយឱ្យបុលទុន ៣០លានដុង ពីធនាគារគោលនយោបាយសង្គម និងបានហ្វឹកហ្វឺនបច្ចេកទេសដាំដុះ ខ្ញុំបានកែប្រែដីចម្ការចាស់ចំនួន ២កុង ដើម្បីផ្លាស់មកដាំទៀបបន្លាវិញ។ បច្ចុប្បន្ន ចម្ការកំពុងលូតលាស់ល្អ សង្ឃឹមថានឹងផ្តល់ចំណូលស្ថេរភាព"។

ក្នុងរយៈពេល ៥ឆ្នាំមកនេះ សាខាបក្សបានដឹកនាំ ចលនាប្រភពកម្លាំងនានា ដើម្បីឧបត្ថម្ភសាងសង់ផ្ទះ "មហាសាមគ្គី" ចំនួន ១០ខ្នង ជូនគ្រួសារក្រីក្រ និងគ្រួសារដែលមានការលំបាក។ ក្នុងនោះ ផ្ទះមហាសាមគ្គីដែលផ្តល់ជូនលោកយាយង្វៀងធីសាយ ជាគ្រួសារលំបាកក្នុងភូមិ អាស្រ័យក្រុមហ៊ុនភាគហ៊ុនស្ករកឹងធើឧបត្ថម្ភថវិកា ៦០លានដុង កំពុងពន្លឿនការសាងសង់ ដើម្បីប្រគល់ជូនគ្រួសារនាឱកាសខួបអនុស្សាវរីយ៍ ៥១ឆ្នាំ ទិវារំដោះភាគខាងត្បូង ឯកភាពប្រទេសជាតិ (៣០/៤/១៩៧៥ - ៣០/៤/២០២៦)។ លោកយាយសាយ បានឱ្យដឹង៖ "គ្រួសារខ្ញុំគ្មានដីស្រែចម្ការទេ គឺធ្វើការឈ្នួលដើម្បីចិញ្ចឹមជីវិត។ ដោយការយកចិត្តទុកដាក់និងជំនួយរបស់ភូមិភាគ ទើបគ្រួសារខ្ញុំជិតនឹងមានផ្ទះថ្មីរស់នៅ។ ខ្ញុំជឿជាក់ថា ជីវភាពគ្រួសារនឹងបានស្ថេរភាពជាងមុន"។

នៅភូមិ៥ ស្ពាន និងផ្លូវគមនាគមន៍ភាគច្រើនបានកសាងយ៉ាងរឹងមាំ ស្អាតបាត បង្កលក្ខណៈងាយស្រួលដល់ការធ្វើដំណើរ និងការដោះដូរទំនិញប្រកបដោយសុវត្ថិភាព។ លោកង្វៀងវ៉ាំងហុង ប្រជាជនក្នុងភូមិបានសម្តែងការត្រេកអរ៖ "នៅពេលអនុវត្តគម្រោងកសាងស្ពាន និងផ្លូវថ្នល់ កម្មាភិបាលភូមិភាគបានរៀបចំប្រជុំប្រជាជនដើម្បីពិភាក្សា រាយការណ៍ខ្ទង់ចំណាយនិងចំណូលយ៉ាងច្បាស់លាស់។ ហេតុដូច្នេះ ទើបបងប្អូនគ្រប់គ្នាមានទំនុកចិត្ត និងស្ម័គ្រចិត្តចូលរួមវិភាគទានជាថវិកា ក៏ដូចជាកម្លាំងកាយដើម្បីអនុវត្តសំណង់ទាំងនោះ"។ ក្នុងរយៈពេល ៥ឆ្នាំកន្លង ប្រជាជនភូមិ៥ បានបរិច្ចាគដីរាប់ពាន់ម៉ែត្រការ៉េ និងថវិការាប់រយលានដុង រួមជាមួយរដ្ឋវិនិយោគលើការបង្កើនកម្រិតនិងពង្រីកខ្សែផ្លូវតាមបណ្តោយព្រែកមីធ្វឹង ខ្សែផ្លូវតាមបណ្តោយព្រែកសាលារៀន - ព្រែកហ្វាដូ ដែលមានប្រវែងសរុបជាង ៦.០០០ម៉ែត្រ ព្រមទាំងកសាងស្ពានលុងឌិញ ស្ពានព្រែកមីធ្វឹងជាដើម។

ចំពោះការងារកសាងបក្ស សាខាបក្សបានយកចិត្តទុកដាក់អនុវត្តយ៉ាងល្អនូវការងារអភិវឌ្ឍបក្ខជន ដោយក្នុងមួយឆ្នាំៗបញ្ចូលបក្ខជនថ្មីពី ១ ដល់ ២រូប។ គណៈកម្មាធិការសាខាបក្សបានប្រជុំតាមកាលកំណត់ស្របតាមការណែនាំរបស់ថ្នាក់លើ លើកកម្ពស់ស្មារតីតិះទៀន និងស្វ័យតិះទៀន គ្រប់គ្រងបក្ខជនយ៉ាងម៉ឺងម៉ាត់ ព្រមទាំងយកចិត្តទុកដាក់ពិនិត្យ តាមដានការលត់ដំគុណសម្បត្តិ សីលធម៌ និងផ្នត់រស់នៅរបស់បក្ខជន។ តាំងពីនោះ ក្នុងរយៈពេលច្រើនឆ្នាំកន្លង សាខាបក្សគ្មានបក្ខជនបំពានវិន័យឡើយ ស័ក្តិសមជា "ស្នូល" ក្នុងការដឹកនាំលើគ្រប់វិស័យនៅមណ្ឌលអាស័យជន៕

អញយុង - ចន្ថា

ចែករំលែកអត្ថបទ

ពាក្យគន្លឹះ