កីឡា - ទេសចរណ៍ កីឡា

19/09/2025 - 07:43

ខិតខំដណ្តើមចំណាត់ថ្នាក់ខ្ពស់ក្នុងពិធីប្រណាំងទូក-ង ឆ្នាំ២០២៥

ក្នុងបរិយាកាសនៃការហ្វឹកហាត់រួមរបស់ក្រុមទូក-ងលើភូមិឋានទីក្រុងកឹងធើ ដើម្បីត្រៀមចូលរួមអុំប្រណាំងក្នុងពិធីបុណ្យអកអំបុក - ប្រណាំងទូក-ងប្រពៃណីរបស់ជនរួមជាតិខ្មែរឆ្នាំ ២០២៥ ទូក-ងវត្តស្រឡូង សង្កាត់មីស្វៀង និងទូក-ងវត្តព្រែកអណ្តើក ឃុំញូយ៉ា ទីក្រុងកឹងធើ កំពុងប្រញឹកធ្វើការហាត់ដោយរំពឹងថា នឹងទទួលបានចំណាត់ថ្នាក់ខ្ពស់និងនាំមកជ័យជម្នះជូនវត្ត។

រូបភាពនៃការហាត់លើគោកដើម្បីហាត់កម្លាំងរបស់កីឡាករទូក-ងនៅវត្តស្រឡូង
សង្កាត់មីស្វៀង ទីក្រុងកឹងធើ។

ទូក-ងវត្តស្រឡូង ជាទូកដែលមានឈ្មោះបោះសម្លេងនៅសុកត្រាំង (ចាស់) ព្រោះទូក-ងនៅសង្កាត់មីស្វៀង ធ្លាប់ទទួលចំណាត់ថ្នាក់ខ្ពស់ក្នុងពិធីប្រណាំងថ្នាក់ស្រុក។ ពិសេស ទូកស្រឡូងទទួលបានជ័យលាភីលេខ៣ ពីរឆ្នាំបន្តបន្ទាប់ក្នុងពិធីបុណ្យអកអំបុក-ប្រណាំងទូក-ងឆ្នាំ២០២៣-២០២៤។ ទោះបីលទ្ធផលមិនទាន់លេចធ្លោដូចទូកខ្លាំងៗមួយចំនួនលើភូមិសាស្រ្តទីក្រុងក៏ដោយ ប៉ុន្តែទូក-ងវត្តស្រឡូងតែងចូលរួមជាប្រចាំនៅលើដងព្រែក Maspero ក្នុងពិធីបុណ្យអកអំបុកជារៀងរាល់ឆ្នាំ។ ដើម្បីត្រៀមឱ្យបានល្អសម្រាប់ការប្រណាំងឆ្នាំនេះ វត្តនិងគណៈគ្រូបង្វឹកបានរួមកម្លាំងជួយឧបត្ថម្ភក្រុមកីឡាករហ្វឹកហាត់។ រយៈពេលជាង១០ថ្ងៃកន្លង នៅវេលាម៉ោង៥រសៀល នៅក្នុងវត្តស្រឡូង សូរកញ្ចែនិងសំឡេងហ៊ោកញ្ជ្រៀវរបស់កីឡាករចំនួន ១៧០ នាក់បានបន្លឺឡើង បង្កបរិយាកាសអ៊ូអរនៅជនបទក្នុងពេលឈានចូលជិតដល់ថ្ងៃបុណ្យអុំទូក។

តាមថេរដីកាព្រះតេជគុណ គឹមហ្វាងហឹង ព្រះចៅអធិការវត្តស្រឡូង ឆ្នាំនេះ មានដៃច្រវាថ្មីៗជាច្រើននាក់មិនទាន់មានបទពិសោធន៍ ទើបផ្លាស់ប្ដូរវិធីសាស្ត្រហាត់ ដោយហាត់អុំលើគោក ដើម្បីហាត់ពត់ឱ្យកម្លាំងមាំមួន បន្ទាប់មកចុះហាត់លើរន្ទានិងចុះទូកអុំផ្ទាល់។ បងលីថាញ់ហ្វៀង គណៈគ្រូបង្វឹកទូក-ងវត្តស្រឡូង ឱ្យដឹង៖ "ថ្វីដ្បិតតែយើងមមាញឹកនឹងការងារស្រែចម្ការ ប៉ុន្តែដោយការស្រឡាញ់ចូលចិត្តវិញ្ញាសាកីឡាជនជាតិ បានជាដល់ម៉ោងហាត់ គឺបងប្អូនតែងមានវត្តមានទាន់ពេលនិងធ្វើការហាត់យ៉ាងស្វាហាប់"។

ទន្ទឹមនឹងនោះ នៅវត្តព្រែកអណ្តើកវិញ ក្រោយពីអវត្តមានជិតមួយសតវត្សរ៍ ក្រុមទូកក៏ចាប់ផ្ដើមលេចរូបរាងឡើងវិញ។ ដោយបំណងចូលរួមថែរក្សាវប្បធម៌ប្រពៃណី វត្តបានប្រមូលផ្តុំកីឡាករបានចំនួន ៧៥ នាក់ និងហាត់បានជិត២០ថ្ងៃមកហើយ។

បរិយាកាសហាត់លើរន្ទារបស់កីឡាករវត្តព្រែកអណ្តើក ឃុំញូយ៉ា ទីក្រុងកឹងធើ។

ចែករំលែកអំពីការហាត់ បងស៊ើងញុឹង កីឡាករទូក-ងវត្តព្រែកអណ្តើក ឱ្យដឹង៖ "ការហាត់ថ្ងៃដំបូងៗ នឿយហត់ណាស់ ប៉ុន្តែគ្រូបង្វឹកបានណែនាំរបៀបចលនានិងវិធីសាស្រ្តអុំ ទើបខ្ញុំស៊ាំនឹងការចលនារាងកាយបន្តិចម្តងៗ។ ទោះបីហត់ក៏ពិតមែន ប៉ុន្តែខ្ញុំសប្បាយចិត្តណាស់ ព្រោះបានចូលរួមកម្លាំងជួយដល់ទូក-ងរបស់វត្ត ខ្ញុំខំព្យាយាមហ្វឹកហាត់និងប្តេជ្ញាចិត្តដណ្ដើមបានចំណាត់ថ្នាក់ជូនវត្ត"។

បងយ័ញថាញ់ដាក គ្រូបង្វឹកទូក-ងវត្តព្រែកអណ្តើក រ៉ាយរាប់៖ "ដោយសារឆ្នាំនេះជាឆ្នាំដំបូងដែលចូលរួមការប្រណាំង បន្ទាប់ពីអវត្តមានអស់រយៈពេលជាយូរ កីឡាករភាគច្រើនជាដៃច្រវាថ្មីមិនទាន់មានបទពិសោធន៍ ដូច្នេះក្នុងថ្ងៃហាត់ដំបូង គ្រូបង្វឹកបានចំណាយពេលជាច្រើនក្នុងការណែនាំចលនារាងកាយ និងវិធីសាស្រ្តអុំលើគោក។ បន្ទាប់ពីការហ្វឹកហាត់ចលនានៅលើទីធ្លាវត្ត កីឡាករបានចុះហាត់លើបន្ទា"។

ជាមួយនឹងការត្រៀមយ៉ាងហ្មតចត់ និងស្មារតីប្តេជ្ញាខ្ពស់ ទូក-ងទាំងពីរវត្តគឺស្រឡូងនិងព្រែកអណ្តើក សន្យានឹងនាំមកនូវការអុំប្រណាំងដ៏រំភើបនៅលើដងព្រែកសម្រាប់ពិធីបុណ្យអកអំបុកនាពេលខាងមុខ៕

ថាញ់វ៉ាង-ត្រឹងរ៉ូន

ចែករំលែកអត្ថបទ

ពាក្យគន្លឹះ