ព្រឹត្តិការណ៍ - នយោបាយ ព្រឹត្តិការណ៍

30/06/2025 - 14:14

ក្រុងកឹងធើ៖

ប្រកាសអង្គការចាត់តាំងថ្នាក់ដឹកនាំថ្មី ដំណើរការជាផ្លូវការ ១០៣ ឃុំ សង្កាត់ ចាប់ពីថ្ងៃទី ១ ខែកក្កដា

ព្រឹកថ្ងៃទី ៣០ ខែមិថុនា ឆ្នាំ២០២៥ គណៈកម្មាធិការបក្សក្រុងកឹងធើ នឹងប្រារព្ធយ៉ាងឱឡារិកនូវ “ពិធីប្រកាសសេចក្ដីសម្រេចចិត្តរបស់រដ្ឋសភា ស្ដីពីការរៀបចំអង្គភាពរដ្ឋបាលថ្នាក់ខេត្ត ថ្នាក់ឃុំ; សេចក្ដីសម្រេចរបស់មជ្ឈិម ស្ដីពីបង្កើតបក្ខភាគក្រុងកឹងធើនិងបុគ្គលិកដឹកនាំក្រុងកឹងធើ; សេចក្ដីសម្រេចរបស់គណៈកម្មាធិការបក្សក្រុងកឹងធើ ស្ដីពីការរៀបចំ អង្គការចាត់តាំងនិងការងារកម្មាភិបាល” (ហៅកាត់ថា ពិធីប្រកាស)។

ផែនទីអង្គភាពថ្នាក់ឃុំចំនួន ១០៣ នៅក្រុងកឹងធើ។ រូប៖ TTXVN

ពិធីប្រកាស ដោយមានការអញ្ជើញចូលរួមរបស់គណៈប្រតិភូជាង ១.១០០ នាក់ ដែលជាថ្នាក់ដឹកនាំមជ្ឈិម ខេត្ត ក្រុងនិងប្រព័ន្ធនយោបាយភូមិភាគទាំងមូល។ ពិធីប្រកាស បានរៀបចំដោយបន្តផ្ទាល់ និងតាមប្រព័ន្ធអនឡាញទៅកាន់ទីតាំងតភ្ជាប់បណ្ដាញនៃឃុំ សង្កាត់ថ្មីចំនួន១០៣; ទន្ទឹមនឹងនោះ នឹងបានផ្សាយផ្ទាល់តាមស្ថានីយវិទ្យុ - ទូរទស្សន៍កឹងធើ សុកត្រាំង និងហូវយ៉ាង។

ក្នុងព្រឹត្តិការណ៍ ឯកសារសំខាន់ៗនឹងត្រូវបានប្រកាសចំពោះមុខគណៈប្រតិភូគ្រប់ៗគ្នា រួមមាន៖ សេចក្ដីសម្រេចចិត្តរបស់រដ្ឋសភា ស្ដីពីការរៀបចំអង្គភាពរដ្ឋបាលថ្នាក់ខេត្ត ថ្នាក់ឃុំ; សេចក្ដីសម្រេចរបស់មជ្ឈិម ស្ដីពី បង្កើតបក្ខភាគក្រុងកឹងធើ; សេចក្ដីសម្រេច ស្ដីពីការរៀបចំអង្គការចាត់តាំងនិងបុគ្គលិក ថ្នាក់ដឹកនាំ ចាប់ពីថ្នាក់ក្រុងដល់ថ្នាក់ឃុំ រួម មាន៖ លេខាបក្ស អនុលេខាបក្ស ប្រធាន ក្រុមប្រឹក្សាប្រជាជន គណៈកម្មាធិការប្រជាជន រណសិរ្សមាតុភូមិនិងស្ថាប័នជំនាញ។

ចាប់ពីថ្ងៃទី ១ ខែកក្កដា ឆ្នាំ២០២៥ ទម្រង់រដ្ឋអំណាចភូមិភាគពីរថ្នាក់ នឹងដំណើរការជាផ្លូវការទូទាំងក្រុងកឹងធើ។ ក្រោយពីបានរៀបចំ ក្រុងកឹងធើថ្មី នឹងមានផ្ទៃដី ៦.៣០៦,៨៣ គីឡូម៉ែត្រការ៉េ ចំនួនប្រជាជនជិត ៤,២ លាននាក់; មានអង្គភាពរដ្ឋបាលថ្នាក់ឃុំចំនួន ១០៣ ក្នុងនោះ សង្កាត់ចំនួន ៣១ និងឃុំចំនួន ៧២ (សូមអញ្ជើញមិត្តអ្នកអានតាមដានបញ្ជីឈ្មោះ អង្គភាពរដ្ឋបាលថ្នាក់ឃុំ អាសយដ្ឋាននិងលេខទូរស័ព្ទលើទំព័រព័ត៌មានអេឡិចត្រូនិក កាសែតកឹងធើភាសាខ្មែរ តាមរយៈគេហទំព័រ baocantho.com.vn/khmer/)។ ការធ្វើឱ្យសុក្រឹតអង្គការចាត់តាំងនិងបុគ្គលិកថ្នាក់ដឹកនាំចាប់ពីថ្នាក់ក្រុងរហូតដល់ថ្នាក់ឃុំ មិនត្រឹមតែធានាការតភ្ជាប់ ស្ថិរភាពប៉ុណ្ណោះទេ នៅទាំងកត់សម្គាល់ “ទំព័រប្រវត្តិសាស្រ្តថ្មី” បង្កជាបុព្វបទសម្រាប់ដំណាក់កាលអភិវឌ្ឍន៍ថ្មីឱ្យក្រុងកឹងធើទៀតផង៕

កាសែតកឹងធើភាសាខ្មែរថាញឡុង - ថាច់ធី