កីឡា - ទេសចរណ៍ ទេសចរណ៍

09/06/2025 - 15:14

តម្លៃប្រវត្តិសាស្ត្រមិនអាចកាត់ថ្លៃបានរបស់សាលាយុកថាញ

សាលាយុកថាញ នៅក្រុងផាងថៀក ខេត្តប៊ិញធ្វឹង ជាគោលដៅទេសចរណ៍ដែលអ្នកទេសចរមិនគួររំលងពេលមកកម្សាន្តនៅក្រុងសមុទ្រ។

រូបភាពមួយចំនួនអំពីកេរដំណែលប្រវត្តិសាស្ត្រវប្បធម៌នៃសាលាយុកថាញនាបច្ចុប្បន្ន។

សាលាយុកថាញ ពីមុនមានឈ្មោះថា យុកថាញហុកហេវ។ ហុកហេវ ត្រូវបានបង្កើតឡើងក្នុងឆ្នាំ ១៩០៧ នៅភូមិថាញ់ឌឹក បច្ចុប្បន្ន មានទីតាំងឋិតនៅលេខ ៣៩ វិថីត្រឺងញី សង្កាត់ឌឹកង៉ៀ ក្រុងផាងថៀក។ ក្រៅពីមានតម្លៃខាងប្រវត្តិសាស្ត្រ ទីតាំងរបស់សាលារៀននេះក៏ជាកក្តាទាក់ទាញភ្ញៀវទេសចរ ពីព្រោះឋិតនៅក្បែរទន្លេកាទីស្រស់ស្អាតជាទីមនោរម្យ។

យោងតាមប្រវត្តិសាស្ត្របានកត់ត្រាទុក សាលាយុកថាញហុកហេវ ត្រូវបានបង្កើតឡើងដោយអ្នកប្រាជ្ញ វិទូខុងជីស្នេហាជាតិ ដើម្បីគាំទ្រចលនាយ្វីតឹង ដែលផ្តួចផ្តើមដោយលោកផាងចូវទ្រិញ ត្រឹងក្វីកាប់និងលោកហ្វិញធុកខាង នៅភូមិភាគកណ្តាលសម័យនោះ។ អ្វីដែលសំខាន់នោះគឺ ថវិកាសាងសង់សាលា អាស្រ័យដោយលោកហ្វិញវ៉ាន់ដូវនិងលោកឡៀងថាញ់ថឿងក្វាង ជាអ្នកឧបត្ថម្ភ។ ពិសេស សិស្សានុសិស្សទាំងអស់ដែលសិក្សានៅទីនេះ មិនបាច់បង់ថ្លៃសាលានិងថ្លៃសិក្សា។ កាលនោះ សាលាយុកថាញ ជាសាលាមួយដ៏ល្បីឈ្មោះ មានបញ្ញវន្តស្នេហាជាតិជាច្រើនមកបង្ហាត់បង្រៀននិងផ្ញើកូនចៅមកសិក្សានៅសាលានេះ។ សាលាក៏បង្រៀនសិស្សដែលជាកូនចៅរបស់កម្មករក្រីក្រស្នេហាជាតិផងដែរ។ សាលាមាន ៤ ថ្នាក់ ដោយមានសិស្សប្រមាណ ១០០ នាក់ មកពីសៃហ្គង ហោយអាង ដាណាំង និងភូមិភាគផ្សេងៗទៀត។ គួរឱ្យចាប់អារម្មណ៍ បំផុតសាលានេះលោកគ្រូង្វៀងតឹកថាញ់ ធ្លាប់បានជួយបង្រៀនអស់មួយរយៈ មុននឹងធ្វើដំណើរទៅសៃហ្គង ស្វែងរកផ្លូវសង្គ្រោះប្រទេសជាតិ។

សាលាយុកថាញ ជាថ្នាលចិញ្ចឹមស្មារតីសង្វាតរៀនសូត្រនិងប្រវេណីស្នេហាជាតិរបស់ប្រជាជន ប៊ិញធ្វឹងនិយាយដោយឡែក និងទូទាំងប្រទេសនិយាយរួម។ ក្នុងឱកាសបុណ្យចូលឆ្នាំវៀតណាម ឬថ្ងៃបុណ្យទានផ្សេងៗ សាលាយុកថាញទាក់ទាញភ្ញៀវទេសចររាប់រយលើកនាក់ សំខាន់គឺសិស្សានុសិស្សមកទស្សនាសិក្សាស្វែងយល់ពីតម្លៃប្រវត្តិសាស្ត្រ ប្រវេណីស្នេហាជាតិ ប្រវេណីសង្វាតរៀនសូត្រ។ ប្អូនលីហ្វាងឡឹម សិស្សវិទ្យាល័យង៉ោយ៉ាតឺ ខេត្តខាញ់ហ្វា ឱ្យដឹង៖ “ពេលសាលារៀបចំទៅទស្សនានៅក្រុងផាងថៀក ម្តាយមិនចង់ឱ្យទៅ ពីព្រោះកន្លែងខ្ញុំក៏មានសមុទ្រដែរ។ ប៉ុន្តែនៅពេលខ្ញុំនិយាយប្រាប់គាត់ថា កូនចង់ទៅសាលាយុកថាញ ដើម្បីស្វែងយល់ពីកន្លែងដែលអ៊ំហូធ្លាប់បង្រៀន ហើយជាសាលាត្រូវបានបង្កើតឡើងផ្តើមពីទឹកចិត្តស្នេហាជាតិយ៉ាងដូចម្តេច ទើបម្តាយខ្ញុំអនុញ្ញាតឱ្យទៅ”។

អាចនិយាយថា សាលានេះមិនត្រឹមតែជាមោទនភាពសម្រាប់ប្រជាជននៅភូមិភាគប៉ុណ្ណោះទេ នៅទាំងជាគោលដៅទេសចរណ៍មានតម្លៃប្រវត្តិសាស្ត្រមិនអាចកាត់ថ្លៃបានសម្រាប់ភ្ញៀវទេសចរក្នុងនិងក្រៅប្រទេស៕

ហាថាញ-មុនី

ចែករំលែកអត្ថបទ

ពាក្យគន្លឹះ