សុខភាព - អប់រំ សុខភាព

22/04/2025 - 08:29

ឧបត្ថម្ភធានារ៉ាប់រងសុខាភិបាលសម្រាប់ជនជាតិភាគតិចរស់នៅតំបន់ព្រំដែន

តាមប្រសាសន៍លោកយ័ញភុក នាយកមន្ទីរជនជាតិនិងសាសនាខេត្តគៀងយ៉ាង ជនជាតិភាគតិចកំពុងរស់នៅតាមតំបន់ព្រំដែននៅសង្កាត់មីឌឹក សង្កាត់ដុងហោ ក្រុងហាតៀង និងឃុំភូមី ស្រុកយ៉ាងថាញ់ ត្រូវបានឧបត្ថម្ភបង់ថ្លៃធានារ៉ាប់រងសុខាភិបាល១០០%។ រយៈពេលឧបត្ថម្ភ ២៤ ខែ ចាប់ពីថ្ងៃ ១ ខែមករា ឆ្នាំ២០២៥ រហូតដល់ថ្ងៃ៣១ ខែធ្នូ ឆ្នាំ២០២៦។

ប្រជាជននៅឃុំភូមី មកពិនិត្យជំងឺដោយឥតគិតថ្លៃ។ រូបថត៖ សហការី

តាមរបាយការណ៍របស់គណៈកម្មាធិការប្រជាជនខេត្តគៀងយ៉ាង បច្ចុប្បន្ន សង្កាត់មីឌឹក សង្កាត់ដុងហោ ក្រុងហាតៀង និងឃុំភូមី ស្រុកយ៉ាងថាញ់ គឺជាសង្កាត់ ឃុំដែលមានជនរួមជាតិភាគតិចរស់នៅតាមតំបន់ព្រំដែន ប៉ុន្តែ មិនចំណុះតំបន់តាមសេចក្ដីកំណត់ក្នុងអនុក្រឹត្យលេខ ៧៥/២០២៣/NĐ-CP ចុះថ្ងៃទី១៩ ខែតុលា ឆ្នាំ ២០២៣ របស់រដ្ឋាភិបាលធ្វើវិសោធនកម្មនូវមាត្រាមួយចំនួននៃអនុក្រឹត្យលេខ ១៤៦/២០១៨/NĐ-CP របស់រដ្ឋាភិបាលដែលចែងលម្អិត និងណែនាំការអនុវត្តមាត្រាមួយចំនួននៃច្បាប់ធានារ៉ាប់រងសុខាភិបាល ម្ល៉ោះហើយប្រជាជននៅទីនេះមិនបានទទួលរបបគោលនយោបាយធានារ៉ាប់រងសុខាភិបាល។ អាស្រ័យហេតុនោះ គណៈកម្មាធិការប្រជាជនខេត្តបានលើកជូនក្រុមប្រឹក្សាប្រជាជនខេត្តគៀងយ៉ាង ចេញសេចក្ដីសម្រេចចិត្តកំណត់កម្រិតឧបត្ថម្ភធានារ៉ាប់រងសុខាភិបាលសម្រាប់ជនជាតិភាគតិចកំពុងរស់នៅតំបន់ព្រំដែនលើភូមិសាស្រ្តខេត្តគៀងយ៉ាង។

បន្ទាប់ពីពិនិត្យរបាយការណ៍របស់គណៈកម្មាធិការប្រជាជនខេត្ត ក្នុងសម័យប្រជុំលើកទី ៣១ សម័យប្រជុំសាមញ្ញចុងឆ្នាំ ២០២៤ នៃក្រុមប្រឹក្សាប្រជាជនខេត្តគៀងយ៉ាង នីតិកាលកាល X ក្រុមប្រឹក្សាប្រជាជនខេត្តគៀងយ៉ាង បានឯកភាព អនុម័តិសេចក្ដីសម្រេចចិត្តកំណត់កម្រិតឧបត្ថម្ភធានារ៉ាប់រងសុខាភិបាលសម្រាប់ជនជាតិភាគតិចកំពុងរស់នៅតំបន់ព្រំដែនលើភូមិសាស្រ្តខេត្តគៀងយ៉ាង។

តាមសេចក្ដីសម្រេចចិត្ត មុខសញ្ញាអនុវត្តគឺជនជាតិភាគតិចកំពុងរស់នៅតំបន់ព្រំដែន៖ សង្កាត់មីឌឹក សង្កាត់ដុងហោ ក្រុងហាតៀង និងឃុំភូមី ស្រុកយ៉ាងថាញ់ ជាមួយនឹងកម្រិតឧបត្ថម្ភ ១០០% ថ្លៃធានារ៉ាប់រងសុខាភិបាល។ រយៈពេលឧបត្ថម្ភ ២៤ ខែ ចាប់ពីថ្ងៃ១ ខែមករា ឆ្នាំ ២០២៥ រហូតដល់ថ្ងៃ ៣១ ខែធ្នូ ឆ្នាំ ២០២៦។ ប្រភពថវិកាអនុវត្ត អាស្រ័យថវិកាភូមិភាគធានាតាមសេចក្ដីកំណត់នៃច្បាប់ថវិការដ្ឋនិងឯកសារពាក់ព័ន្ធនានា។

តាមប្រសាសន៍លោកយ័ញភុក ជនរួមជាតិភាគតិចនៅ២សង្កាត់ព្រំដែន គឺសង្កាត់ដុងហោ និងមីឌឹក (ក្រុងហាតៀង) និងឃុំភូមី (ស្រុកយ៉ាងថាញ់) មានសេចក្ដីត្រេកអរក្រៃលែង ខណៈពេលរដ្ឋបានយកចិត្តទុកដាក់ឧបត្ថម្ភ ១០០% ធានារ៉ាប់រងសុខាភិបាល។ ការយកចិត្តទុកដាក់នេះ គឺជាកម្លាំងចលករសម្រាប់ពួកគាត់ឈានឡើងក្នុងជីវភាព។ បងស្រីលីធីវ៉ែន នៅសង្កាត់មីឌឹក ឱ្យដឹង៖ “នាងខ្ញុំបម្រើការងារក្នុងហាងលក់ជលផលនៅមណ្ឌលទេសចរណ៍ម៉ូយណាយ ម្ល៉ោះហើយ លក្ខណសម្បត្តិសេដ្ឋកិច្ចនៅលំបាក។ ឥឡូវបានរដ្ឋផ្ដល់ជូនប័ណ្ណធានារ៉ាប់រងសុខាភិបាលខ្ញុំត្រេកអរខ្លាំងណាស់ ដ្បិតអី ពេលមានជំងឺខ្ញុំអាចទៅដំណាក់សុខាភិបាលពិនិត្យជំងឺនិងយកថ្នាំផឹកដោយឥតបង់ថ្លៃ”៕

ហាថាញ -ប្រែសម្រួល៖ ថាច់ធី

ចែករំលែកអត្ថបទ

ពាក្យគន្លឹះ