កីឡា - ទេសចរណ៍ ទេសចរណ៍

24/02/2025 - 14:28

សម្រាកលម្ហែកាយនៅហាតៀង

ប្រសិនបើមិត្តត្រូវការស្វែងរកទីតាំងទេសចរណ៍មានទាំងព្រៃភ្នំ កោះសមុទ្រ ដើម្បីសម្រាកលម្ហែកាយនោះ ហាតៀងគឺជាជម្រើសមួយដ៏អស្ចារ្យសម្រាប់ភ្ញៀវទេសចរ។

ចំពោះភ្ញៀវទេសចរដែលមិនទាន់ពេញចិត្តហាតៀង ព្រោះនេះជាទីក្រុងតូច ដើរទស្សនាកម្សាន្តបានត្រឹមតែពីរបីផ្លូវគឺចប់។ មកកាន់ហាតៀង រដូវប្រាំងខ្យល់សមុទ្របក់ត្រសៀកៗនាំចំហាយទឹកសមុទ្រផ្សើមខ្លួនប្រាណជាប់ប្រៃៗ។ល។ ការបើកម៉ូតូដើរកម្សាន្តតាមឆ្នេរសមុទ្រនិងជុំវិញផ្លូវ ក្រុងមួយជុំអស់ត្រឹមតែកន្លះធុងសាំងប៉ុណ្ណោះ...។

ប៉ុន្តែនោះគ្រាន់តែជា “ផ្នែកមួយតូច” សម្រាប់ភ្ញៀវទេសចរមិនទាន់ពេញចិត្តហាតៀងពិតប្រាកដ។ បើភ្ញៀវទេសចរជ្រើសយកផ្លូវទ្រឿងសា ជាចំណុចចាប់ផ្តើមសម្រាប់ដំណើរកម្សាន្តពេញមួយថ្ងៃ គឺនឹងធ្វើឱ្យភ្ញៀវមានអារម្មណ៍ស្រស់ស្រាយគាប់ចិត្តនឹងហាតៀងជាពុំខាន។ ពេលព្រលឹមភ្ញៀវទេសចរចូលហាងកាហ្វេក្បែរឆ្នេរសមុទ្រ គយគន់សម្រស់អរុណោទ័យលើផ្ទៃសមុទ្រ។ មៀង មើលខាងឆ្វេង គឺវត្តភូយ៉ុងដ៏ស្រស់ស្អាតឋិតក្រោមម្លប់ដើមឈើធំៗដ៏ត្រជាក់។ មើលទៅប្រៀបដូចផ្ទាំងទស្សនីយភាពដ៏រស់រវើកសម្រាប់ថ្ងៃថ្មី ជាមួយនឹងទិដ្ឋភាពទឹកសមុទ្រពណ៌ខៀវនិងសម្រស់ធម្មជាតិ ព្រៃភ្នំដ៏ស្រស់ត្រកាល។ល។ ពិសាកាហ្វេមួយកែវឈ្ងុយឆ្ងាញ់គឺពិតជាអស្ចារ្យ។ ពេលរសៀល ដើរកម្សាន្តតាមបណ្តោយឆ្នេរសមុទ្រផ្លូវទ្រឿងសា ខ្យល់បក់ត្រសៀកៗត្រជាក់ស្រិប អ្នកខ្លះកំពុងដើរហាត់ប្រាណ អ្នកខ្លះទៀតអង្គុយស្ទួចត្រី។ល។ អង្គុយលើកៅអីថ្មតាមបណ្តោយផ្លូវសមុទ្រ ភ្ញៀវទេសចរអាចមើលឃើញព្រះអាទិត្យដូចភ្លើងមួយដុំក្រហមឆ្អៅអស្ដង្គតជាសន្សឹមៗក្នុងផ្ទៃសមុទ្រ។

សម្រស់ធម្មជាតិនៅហាតៀងស្រស់ស្អាតជាទីមនោរម្យ។

បើចង់ជ្រកកម្តៅថ្ងៃ ភ្ញៀវទេសចរគួរតែឆ្លៀតពេលអង្គុយក្រោមម្លប់ដើមឈើធំៗដ៏ត្រជាក់នៅភ្នំប៊ិញសាងនិងភ្នំភូយ៉ុង។ មានមនុស្សជាច្រើនមកសម្រាកនៅទីនេះនាពេលថ្ងៃត្រង់ ហាក់ដូចជា ទម្លាប់អ៊ីចឹង។ ចួនកាលឃើញហ្វូងសត្វស្លាបហើរមកទំលើចុងឈើព្រោងព្រាតនិងហើរទៅវិញទាំងហ្វូងៗ។ នៅពេលរសៀល ភ្ញៀវទេសចរទៅហែលទឹកឆ្នេរសមុទ្រមូយណាយតាមចំណង់។ល។

ថ្ងៃណាឧស្សាហ៍ ភ្ញៀវទេសចរគប្បីមកស្វែងយល់ពីភ្នំថ្មបញ្ឈរឬចូលទស្សនារូងថាច់ដុង ដើម្បីស្វែងយល់ពីរឿងថាច់សាញ សង្គ្រោះព្រះរាជបុត្រី។ ផ្លូវទៅកាន់រូងថាច់ដុង នៅពេលរសៀល គឺត្រជាក់ខ្លាំងណាស់ ក្នុងការធ្វើដំណើរតាមផ្លូវ ភ្ញៀវទេសចរនឹងបានប្រទះឃើញទិដ្ឋភាពប្រចាំថ្ងៃដ៏ស្រស់ស្អាតលើវាលស្រែធំល្វឹងល្វើយដែលទើបប្រមូលផលរួចរាល់។ល។

ពេលល្ងាចត្រឡប់មកកាន់មជ្ឈមណ្ឌលក្រុង ភ្ញៀវទេសចរឆៀងចូលទទួលទានគុយទាវណាំយ៉ាងមួយគោមនៅហាងណាមួយតាមដងផ្លូវ។ ពីព្រោះហាងនៅទីនេះលក់តម្លៃគួរសម ឆ្ងាញ់ណាស់។ ពេលយប់ទៅកាន់ហាងកាហ្វេផៅដាយ ពិសាភេសជ្ជៈត្រជាក់មួយកែវ អង្គុយទស្សនាទេសភាពសមុទ្រ គយគន់ពន្លឺភ្លើងពណ៌ភ្លឺចិញ្ចាចលើស្ពានតូចូវ មៀងមើលផ្សាររាត្រីហាតៀងមានភាពអ៊ូអរទាំងអ្នកលក់និងអ្នកទិញពពាក់ពពូន ។ល។ គ្រាន់តែប៉ុណ្ណឹង មិត្តនឹងឃើញហាតៀងគឺជាកន្លែងដ៏ទាក់ទាញទៅហើយ៕

ហាថាញ-មុនី

ចែករំលែកអត្ថបទ

ពាក្យគន្លឹះ