កីឡា - ទេសចរណ៍ ទេសចរណ៍

13/01/2025 - 16:02

ដំណើរគយគន់ផ្កានិទាឃរដូវ

ក្នុងអំឡុងខែ១២ នៅតាមដងផ្លូវចូលទៅភូមិផ្កាដុងថាប់ តែងមានមនុស្សម្នាច្រើនកុះករ។ ភ្ញៀវទេសចរដើរគយគន់សម្រស់ផ្កានិទាឃរដូវ និងថតរូបកម្សាន្តយ៉ាងសប្បាយរីករាយ ញុាំងឱ្យបរិយាកាសភូមិរបរប្រពៃណីរយឆ្នាំនៃតំបន់ទឹកដីឈូកក្រហម រឹតតែបង្កើនសោភណភាព ។

ភ្ញៀវទេសចរគយគន់ភូមិផ្កាសាឌាក។

“ចូលឆ្នាំសកល” បានឈប់សម្រាកការងារមួយថ្ងៃ ម្ល៉ោះហើយក្រុមបងស្រីលីធ្វីហឿង នៅសង្កាត់ធើយប៊ិញ ខណ្ឌនិញកេវ ជ្រើសធ្វើដំណើរទៅកម្សាន្តនៅភូមិផ្កាសាឌាក ស្ថិតនៅសង្កាត់ តឹងគ្វីដុង ក្រុងសាឌាក ខេត្តដុងថាប។ មុនពេលធ្វើដំណើរទៅក្រុមបានឯកភាពគ្នាជ្រើសរើសសម្លៀកបំពាក់ឯកសណ្ឋានសម្រាប់ថតរូបជាមួយផ្កាទុកជាអនុស្សាវរីយ៍។ ផ្លូវពីកឹងធើទៅក្រុងសាឌាកមានភាពងាយស្រួល ម្ល៉ោះហើយ ក្រុមធ្វើដំណើរយ៉ាងរលូន។ ក្រុមបងស្រីហឿង បានជ្រើសយកហាងដើមឆ័ត្រស្ថិតនៅឃុំតឹងហ្វា ស្រុកឡុងហោ ខេត្តវិញឡុង ដើម្បីស្រស់ស្រូបអាហារពេលព្រឹក។ រាល់មុខម្ហូបសាច់របស់ហាង ត្រូវបានដាក់អាំងក្នុងពាង ម្ល៉ោះហើយមានរសជាតិឈ្ងុយឆ្ងាញ់។ ទឹកគ្រឿងជ្រក់របស់ហាងក៏ឆ្ងាញ់អត់ទាស់ផងដែរ។ ក្រុមរបស់បងស្រីហឿង បានទៅដល់ភូមិផ្កាសាឌាក ប្រហែលជាងម៉ោង ១០។ ព្រះអាទិត្យក៏រះឡើងខ្ពស់ ហេតុនោះក្នុងក្រុមគយគន់ផ្កាយ៉ាងសប្បាយនិងថតរូបផង។

យោងតាមប្រវត្តិភូមិស្រុក ចាប់ពីសតវត្សទី ១៩ នៅឃុំតឹងគ្វីដុង គឺមានគ្រួសារដាំផ្កាសម្រាប់លក់។ ផ្ទះនេះឃើញផ្ទះឯទៀតដាំបាន លក់ចំណេញក៏រៀនតាមកែប្រែចម្ការឈើដើម្បីដាំផ្កា។ ដំបូងផ្តើមចេញពីផ្កាពីរបីប្រភេទ មកដល់ពេលនេះ ភូមិផ្កាសាឌាកអាចនឹងដាំបានប្រភេទផ្កាស្ទើរតែទាំងអស់ពីគ្រប់តំបន់ ក្នុងនោះ មានប្រភេទផ្កាដ៏ពិសេសរបស់ដាឡាត ដូច៖ ផ្កាលីលី ផ្កាអូតង់ស្យា៘ ខណៈឃើញមាមីងនៅតឹងគ្វីដុង បានធូរធារពីរបរដាំផ្កា ប្រជាជនតាមឃុំ សង្កាត់ជិតខាងដូច៖ សង្កាត់ទី ៣ សង្កាត់ទី ២ ឃុំតឹងខាញ់ដុង តឹងគ្វីតី ក៏ងាកមកដាំផ្កាដែរ។ ផ្តើមពីទីចាប់កំណើតតឹងគ្វីដុង ដាំប្រមាណ ៣០០ ហិកតា មកទល់ពេលនេះ ភូមិផ្កាសាឌាក ដាំជិត ៩០០ ហិកតា ដោយមានជាង ២.០០០ ពូជ ផ្កាគ្រប់ប្រភេទ។

ជាក់ស្តែង ភ្ញៀវទេសចរមកកាន់ភូមិផ្កាសាឌាក មិនថារដូវណាក្នុងឆ្នាំក៏មានផ្កាដើម្បីគយគន់ដែរ។ ប៉ុន្តែក្នុងឱកាសមុនពេលបុណ្យចូលឆ្នាំថ្មីវៀតណាម គឺមានផ្កាច្រើនជាង ហើយបានលក់ដុំដល់គ្រប់ខេត្តក្រុងក្នុងទូទាំងប្រទេសនិងនាំចេញក្រៅប្រទេសផង។ ចាប់តាំងពីភូមិផ្កាសាឌាក ក្លាយជាកន្លែងទេសចរណ៍ ផ្កាកាន់តែបង្អួតសម្រស់។ អ្នកចម្ការខ្លះជំនាញខាងដាំលក់ ម្ល៉ោះហើយ អនុញ្ញាតឱ្យភ្ញៀវចូលទស្សនាកម្សាន្តថតរូបដោយឥតគិតថ្លៃ។ អ្នកចម្ការខ្លះទៀតជំនាញខាងធ្វើទេសចរណ៍បានវិនិយោគសាងសង់ខ្ទមចាំ ដើម្បីភ្ញៀវទេសចរចូលមកទិញសំបុត្រ រួចឡើងទៅលើខ្ទមគយគន់ផ្កាភូមិរបរទាំងមូល។ ក្រៅពីនេះ សេវាកម្មហូបចុក ផ្ញើយានយន្តនិងមានរថយាន្ត អគ្គិសនីដឹកភ្ញៀវជុំវិញភូមិរបរក្នុងតម្លៃគួរសម។

ប៉ុន្មានឆ្នាំជិតមកនេះ ដុងថាបមានតំបន់ទេសចរណ៍ល្អៗជាច្រើន ម្ល៉ោះហើយ ក្រោយពីចូលភូមិផ្កា ទីតាំងដែលត្រូវទៅបន្តរបស់ភ្ញៀវទេសចរក្នុងដំណើរកម្សាន្តនិទាឃរដូវដុងថាប អាចជាចម្ការក្រូចឃ្វិចឡាយវុង ឬក៏ឧទ្យានជាតិត្រាំជីម មណ្ឌលមូលដ្ឋានស៊ាវឃ្វិច៘ ប៉ុន្តែមុនពេលឃ្លាតពីសាឌាក ភ្ញៀវទេសចរកុំភ្លេចទទួលទានគុយទាវសាឌាក ទោះបីជាទទួលទានគុយទាវសាបឬប្រៃ គឺអាហារនេះនឹងដក់ជាប់ក្នុងចិត្ត ភ្ញៀវទេសចរដោយរសជាតិឆ្ងាញ់ពិសា៕

ហាថាញ- លីសៀ

ចែករំលែកអត្ថបទ

ពាក្យគន្លឹះ