សុខភាព - អប់រំ សុខភាព

03/06/2024 - 15:58

វិធានការការពារភ្នែកក្នុងរដូវក្តៅ

នៅពេលដែលសីតុណ្ហភាពកើនឡើង និងកម្ដៅកាន់តែខ្លាំងក្នុងខែរដូវក្តៅ អ្នកជំនាញផ្នែកសុខភាព បានផ្តល់អនុសាសន៍យ៉ាងមុតមាំថា មនុស្សគ្រប់រូបត្រូវយកចិត្តទុកដាក់ការពារភ្នែករបស់ខ្លួនពីពន្លឺព្រះអាទិត្យ អាកាសធាតុស្ងួតនិងធូលី។ ខាងក្រោមនេះ គឺជាវិធានការមួយចំនួនដើម្បីជួយថែរក្សា “បង្អួចនៃដួងព្រលឹង”។

ការពិនិត្យភ្នែកជាប្រចាំ គឺជាកត្តាដ៏សំខាន់ជួយការពារភ្នែកដ៏ល្អប្រសើរបំផុត។

+ ពាក់វ៉ែនតាការពារភ្នែកពេលហែលទឹក៖ ការប៉ះនឹងកាំរស្មីអ៊ុលត្រាវីយូឡេ អាចនាំអោយ មានបញ្ហាភ្នែក រួមទាំងជំងឺភ្នែកឡើងបាយ និងជំងឺភ្នែកចុះខ្សោយ ជាជំងឺដែលបណ្ដាលឱ្យចុះខ្សោយសមត្ថភាពមើលនិងគុណភាពនៃជីវិត។ ហេតុដូច្នេះត្រូវទិញវ៉ែនតាពណ៌ងងឹត ដែលមានលទ្ធភាពការពារកាំរស្មីអ៊ុលត្រាវីយូឡេ- ល្អ បំផុតគឺប្រភេទដែលអាចទប់ស្កាត់កាំរស្មីអ៊ុលត្រាវីយូឡេ A និងអ៊ុលត្រាវីយូឡេ B បាន ១០០% - ដើម្បីការពារភ្នែករបស់អ្នកពីហានិភ័យនៃការប៉ះពាល់។

ដូចគ្នានេះដែរ ពេលទៅអាងហែលទឹក ត្រូវពាក់វ៉ែនតាហែលទឹក ដើម្បីការពារភ្នែករបស់អ្នកពីបាក់តេរីដែលបង្កគ្រោះថ្នាក់ និងសារធាតុគីមីសម្លាប់មេរោគនៅក្នុងទឹក។ សមាសភាព ក្លរីនក្នុងទឹកនៃអាងហែលទឹកអាចធ្វើឱ្យភ្នែករបស់អ្នករមាស់និងស្ងួត។

+ ផឹកទឹកឱ្យបានគ្រប់គ្រាន់៖ យោងតាម បណ្ឌិត Rishi Raj Borah នៃអង្គការការពារពិការភ្នែកអន្តរជាតិ ORBIS ការខ្វះជាតិទឹកអាច បណ្តាលឱ្យស្ងួតនិងរមាស់ភ្នែក។ ដូច្នេះ ចូរផឹកទឹកឱ្យបានច្រើនរៀងរាល់ថ្ងៃ ដើម្បីរក្សាភ្នែកនិងរាងកាយរបស់អ្នកឱ្យមានគ្រប់ជាតិទឹក ជាពិសេសនៅពេលចូលរួមសកម្មភាពក្រៅផ្ទះ។

+ ប្រើថ្នាំបន្តក់ភ្នែកមានសមាសភាពបំប៉នសំណើម ឬប្រេងរំអិល៖ ប្រសិនបើអ្នកមានអារម្មណ៍ស្ងួតភ្នែកជារឿយៗនោះ ចូរអាទិភាពប្រើប្រាស់ថ្នាំបន្តក់ភ្នែកដែលមានប្រសិទ្ធភាពបំប៉នសំណើម ឬប្រេងរំអិល ដើម្បីបំបាត់ភាពពិបាកទ្រាំ។ អ្នកគួរតែទៅពិគ្រោះជាមួយគ្រូពេទ្យភ្នែក ដើម្បីជ្រើសរើសថ្នាំបន្តក់ភ្នែកដែលសមស្រប។

+ ទទួលទានអាហារដែលមានគ្រប់ជាតិបំប៉ន៖ រក្សារបបទទួលទានអាហារដែលល្អសម្រាប់កែលម្អសុខភាពទូទៅផង ជួយការពារភ្នែកពីការប៉ះនឹងពន្លឺថ្ងៃផង។ ត្រូវប្រាកដថា អាហារប្រចាំថ្ងៃរបស់អ្នកជាអាហារសម្បូរវីតាមីន និងសារធាតុចិញ្ចឹមដែលល្អសម្រាប់ភ្នែករបស់អ្នក។ បន្លែបៃតង ត្រីគ្រាប់ប្រភេទ ផ្លែឈើ និងបន្លែចម្រុះពណ៌គឺជាជម្រើសដ៏ល្អព្រោះវាសម្បូរទៅដោយសារធាតុប្រឆាំងអុកស៊ីតកម្ម និងមានសារធាតុចិញ្ចឹមសំខាន់ៗដូចជាវីតាមីន C វីតាមីន E ស័ង្កសី និងអាស៊ីតខ្លាញ់អូមេហ្គា ៣ ដែលជួយពង្រឹងប្រព័ន្ធការពារភ្នែកតាមបែបធម្មជាតិនឹងកាំរស្មីអ៊ុលត្រាវីយូឡេ ដែលបង្កគ្រោះថ្នាក់។

+ ពិនិត្យភ្នែកជាប្រចាំ៖ ការពិនិត្យភ្នែកជាទៀងទាត់អាចរកឃើញបញ្ហាដែលបង្កប់ធានា នូវការអន្តរាគមន៍និងព្យាបាលបានទាន់ពេលវេលាសម្រាប់ភ្នែក។ សូមចងចាំថា បង្ការគឺជាគន្លឹះការពារភ្នែកដ៏ល្អប្រសើរបំផុត៕

កាសែតកឹងធើ - បកប្រែ៖ សុផន

ចែករំលែកអត្ថបទ

ពាក្យគន្លឹះ