ព្រឹត្តិការណ៍ - នយោបាយ ព្រឹត្តិការណ៍

05/12/2023 - 11:03

ពិធីបុណ្យអកអំបុក-ប្រណាំងទូក-ង

លើកកម្ពស់លក្ខណៈប្រពៃនៃវប្បធម៌ប្រពៃណីរបស់ជនរួមជាតិខ្មែរ

* ពិធីបុណ្យអកអំបុក-ប្រណាំងទូក-ង ខេត្តសុកត្រាំងឆ្នាំ២០២៣បានបញ្ចប់ បន្សល់ទុកនូវចំណាប់អារម្មណ៍យ៉ាងល្អប្រសើរក្នុងទឹកចិត្តប្រជាជននិងភ្ញៀវទេសចរ។ នេះគឺជាព្រឹត្តិការណ៍វប្បធម៌ដ៏ធំបំផុតក្នុងឆ្នាំ ហើយក៏ជាសកម្មភាពប្រចាំឆ្នាំ ដិតដាមដោយលក្ខណៈវប្បធម៌ប្រវេណីរបស់ជនរួមជាតិខ្មែរណាមបូនិយាយរួម និងខេត្តសុកត្រាំងនិយាយដោយឡែក។ ពិធីប្រណាំងទូក-ងខេត្តសុកត្រាំង មានទូក-ងក្នុងនិងក្រៅខេត្ត៤៦ក្រុមចូលរួមអុំប្រណាំង។ បញ្ចប់ការអុំប្រណាំង គណៈកម្មការរៀបចំបានជូនជ័យលាភីលេខ១ដល់ទូក-ងវត្តទំនប់២ ស្រុកចូវថាញ់ ជ័យលាភីលេខ២បានទៅលើទូក-ងវត្ដអុងខ ស្រុកថាញទ្រី ជ័យលាភីលេខ៣ បានទៅលើទូក-ងវត្តស្រឡូង១ ស្រុកមីស្វៀង និងជ័យលាភីលេខ៤ បានទៅលើទូក-ងវត្តពងទឹកចាស់ ស្រុកថាញ់ទ្រី។ ចំពោះខ្លឹមសារទូក-ងនារី ភាពចៃដន្យ បានកើតឡើងលើខ្សែទឹកប្រណាំង ខណៈពេលដែលទូក-ងនារីវត្តទំនប់ បញ្ចេញសមត្ថភាពអុំផ្លោះលឿនលយទៅមុខមានប្រៀបលើដៃគូ ក្លាយជាម្ចាស់ពានរង្វាន់ជើងឯកឆ្នាំ ២០២៣។ ក្រុមទូក-ងនារីវត្តព្រែកចេក ទទួលបានជ័យលាភីលេខ២ បន្ទាប់ពីអុំចាញ់ទូក-ង នារីវត្តទំនប់។ ចំណែកជ័យលាភីលេខ៣ និងលេខ៤ បានមកលើក្រុមទូក-ងនារីមកពីខេត្តបាកលីវ គឺវត្តកោះធំនិងវត្តអណ្ដូងចេក។

គណៈកម្មការរៀបចំជូនរង្វាន់ដល់ក្រុមទូក-ងក្នុងពិធីប្រណាំងទូក-ងនៅខេត្តសុកត្រាំង។

វគ្គប្រណាំងផ្ដាច់ព្រ័ត្ររវាងក្រុមទូក-ងវត្តទំនប់២ (ពាក់អាវពណ៌ខៀវ) និងក្រុមទូក-ងវត្តអុងខ។

ក្រុមកីឡាករទូក-ងវត្តទំនប់២ សប្បាយរីករាយ ខណៈពេលបានក្លាយជាម្ចាស់
ពានរង្វាន់ជើងឯកឆ្នាំ២០២៣។

* ពិធីប្រណាំងទូក-ង អំណរបុណ្យអកអំបុកខេត្តត្រាវិញ បើកទូលាយឆ្នាំ២០២៣ នៅព្រែកឡុងប៊ិញ សង្កាត់៤ ក្រុងត្រាវិញ បានទាក់ទាញមនុស្សរាប់ពាន់នាក់មកទស្សនា។ ការចូលរួមប្រណាំងលើកនេះ មានទូក-ងបុរស៩ក្រុម និងទូក-ងបុរសនារីចម្រុះគ្នាមាន ៧ ក្រុម មកពីបណ្ដាស្រុក ក្រុង ក្នុងខេត្តនិងទូក-ងមកពីទីរួមខេត្តប៊ិញមិញ ខេត្តវិញឡុង។ លទ្ធផលទូក-ងស្រុកកាងឡុង ជាម្ចាស់ជើងឯកទាំង៣ខ្លឹមសារ ជាមួយនឹងខ្លឹមសារចម្ងាយខ្សែទឹក ១.០០០ ម៉ែត្រផ្នែកបុរសចម្ងាយខ្សែទឹក ៨០០ ម៉ែត្រផ្នែកបុរស និងចម្ងាយខ្សែទឹក ៨០០ម៉ែត្រផ្នែកបុរសនារីចម្រុះគ្នា។

គណៈកម្មការរៀបចំជូនរង្វាន់ដល់ក្រុមទូក-ងនៅខេត្តត្រាវិញ។

ប្រជាជនផ្ដុំគ្នាធ្វើដំណើរមកកាន់មាត់ទន្លេកាយលើងស្រុកហ្គក្វាវ ខេត្តគៀងយ៉ាង
ដើម្បីទស្សនាការប្រណាំងទូក-ង។

* ប្រណាំងទូក-ង គឺជាសកម្មភាពដ៏ពុះពោរបំផុត ទទួលបានការគាំទ្រយ៉ាងខ្លាំងពីសំណាក់ភ្ញៀវដែលទៅចូលរួមក្នុងទិវាបុណ្យវប្បធម៌-កីឡានិងទេសចរណ៍ជនរួមជាតិខ្មែរខេត្តគៀងយ៉ាង លើកទី១៥ ឆ្នាំ២០២៣។ ក្រុមទូក-ងវត្តជ្រុងយោង ក្រុងរ៉ាច់យ៉ា បានបញ្ចេញថ្វីដៃនៃការអុំប្រណាំងយ៉ាងឆ្នើម ខណៈដែលក្រុមទូក-ងវត្តជ្រុងយោង១ និងក្រុមទូក-ងវត្តជ្រុងយោង២ ឈ្នះបានរង្វាន់លេខ១ និងលេខ ៣ នៅខ្លឹមសារចម្ងាយខ្សែទឹក ៨០០ ម៉ែត្រផ្នែកបុរស។ ចំណែកក្រុមទូក-ងវត្តបឹងមូល១ របស់អង្គភាពម្ចាស់ផ្ទះស្រុកហ្គក្វាវ ម្ចាស់ជើងឯក រដូវកាលឆ្នាំ២០២២ ធ្លាក់ទៅលេខ២វិញ៕

ក្រុមអ្នកយកព័ត៌មាន- ថាច់ធី

ចែករំលែកអត្ថបទ

ពាក្យគន្លឹះ