វប្បធម៌-សិល្បៈ វប្បធម៌

11/11/2023 - 19:19

បុណ្យកឋិនទានរបស់ជនរួមជាតិខ្មែរនៅសុកត្រាំង

បុណ្យកឋិនទាន ជាពិធីបុណ្យមួយក្នុងពុទ្ធសាសនា ដែលមកមានតាំងពីព្រះពុទ្ធទ្រង់គង់ធរមាននៅម្ល៉េះ ហើយត្រូវបានប្រារព្ធឡើងបន្ទាប់ពីព្រះសង្ឃគង់ចាំវស្សាអស់រយៈកាល៣ខែ កឋិនទានមានកំណត់រយៈពេលធ្វើត្រឹម២៩ថ្ងៃប៉ុណ្ណោះ ចាប់ពីថ្ងៃ១រោច ខែអស្សុជដល់ថ្ងៃ១៥កើត ខែកត្តិក ហើយវត្តនីមួយៗអាចទទួលកឋិនទានបានតែម្ដងប៉ុណ្ណោះ។ កឋិនទានគឺជាទានដ៏ពិសេសមួយ ដោយអ្នកធ្វើបានគោរពតាមព្រះពុទ្ធដិកាដែលទ្រង់អនុញ្ញត្តិឱ្យភិក្ខុសង្ឃទទួលនូវកឋិនចីវផង និងញ៉ាំងឱ្យព្រះសង្ឃបានទទួលនូវសង្ឃលាភផង។ ចំពោះវត្ថុកឋិនវិញ គឺត្រៃចីវរ មានស្បង់ ចីពរ និងសង្ឃាដី។ បច្ចុប្បន្ន ដោយសារជនរួមជាតិខ្មែរមានជីវភាពធូរធារគ្រាន់បើ ដូច្នេះហើយ ម្ចាស់ដើមទាននៅទាំងមានគ្រឿងបរិក្ខារនិងទេយ្យវត្ថុផ្សេងៗអមជាមួយផង មានដូចជា ឆ្នាំងចាន កន្ទេល ខ្នើយ គ្រែ តុ ទូ កៅអី ។ល។ ដើម្បីបានផលានិសង្សកាន់តែលើសលុបជាងទៀត។ ទន្ទឹមនឹងនោះ ម្ចាស់ដើមទាននៅទាំងមានថវិកាប្រគេនសម្រាប់កសាងនិងជួសជុលសំណង់ផ្សេងៗក្នុងអារាមវត្តទៀតផង។ ពុទ្ធបរិស័ទដង្ហែអង្គកឋិនទានទៅវេនប្រគេនចំពោះជំនុំព្រះសង្ឃក្នុងវត្ត គឺជាការសន្សំនូវបុណ្យកុសលដ៏ធំមួយសម្រាប់ជាតិនេះនិងជាតិខាងមុខ ជួបតែសេចក្តីសុខ សេចក្តីចម្រើន ដូច្នេះហើយ ទើបមាមីងពុទ្ធបរិស័ទខ្មែរតែងតែប្រាថ្នាចង់ធ្វើនូវបុណ្យនេះគ្រប់ៗគ្នា។

ខាងក្រោមនេះ គឺជារូបភាពនៃពិធីបុណ្យកឋិនទានរបស់ជនរួមជាតិខ្មែរនៅខេត្តសុកត្រាំង។

លីធាន-ត្រឺងរ៉ូន