កីឡា - ទេសចរណ៍ ទេសចរណ៍

18/07/2023 - 08:54

ស្វែងយល់ពីកាហ្វេនៅសារមន្ទីរកាហ្វេ

អ្នកទស្សនាភាគច្រើនមកសារមន្ទីរកាហ្វេនៅក្រុងបួងម៉ាថួក ខេត្តដាក់ឡាក់ មិនត្រឹមតែដើម្បីស្វែងយល់ពីដើមកាហ្វេប៉ុណ្ណោះទេ នៅទាំងដោយសារ “ញៀន” ទឹកភេសជ្ជៈប្រភេទនេះផង។

សារមន្ទីរកាហ្វេបួងម៉ាថួក មានបន្ទប់អានសៀវភៅ ដោយមានសៀវភៅជាច្រើនក្បាល លោកអ្នកអាចជ្រើសរើសអានតាមចិត្ត។

ជំនួសឱ្យការដាំដើមឈើលម្អនៅខាងមុខសារមន្ទីរ គេបានដាំដើមកាហ្វេធំៗជាច្រើនដើមទៅវិញ។ នេះជាគំនិតដ៏ល្អមួយ ព្រោះដើមកាហ្វេត្រូវបានកាត់តម្រឹមយ៉ាងហ្មត់ចត់ ដូច្នេះវាមិនប៉ះពាល់ដល់បរិស្ថាននោះទេ។ ស្លឹកកាហ្វេពណ៌បៃតង មានសរសៃច្រើន ឃើញស្អាតណាស់ មើលយូរទៅហាក់ដូចជាស្លឹកឈើលម្អដែរ។ ពិសេស គឺផ្កាកាហ្វេពណ៌ស ក្រអូបសាយ។ នៅពេលផ្ការីក អ្នកទស្សនាហាក់ដូចជាលង់ក្នុងសុបិន ដោយក្លិនក្រអូបដ៏ទាក់ទាញ និងផ្កាពណ៌សដ៏ស្រស់ស្អាត។

សកម្មភាពនានានិងវត្ថុតាំងនៅក្នុងសារមន្ទីរកាហ្វេបួងម៉ាថួក។

ចូលទៅខាងក្នុងសារមន្ទីរកាហ្វេ អ្នកទស្សនាហាក់ដូចជាវង្វេងនៅក្នុងរូងភ្នំពាន់ ដែលមានស្ថាបត្យកម្មល្អាងថ្មគួរឱ្យចាប់អារម្មណ៍។ នៅក្នុងបរិវេណសារមន្ទីរ គេតាំងពិព័រណ៍វត្ថុផ្សេងៗ ដែលបង្ហាញពីការកកើតនិងអភិវឌ្ឍនៃដើមកាហ្វេនៅតំបន់ខ្ពង់រាប។ សារមន្ទីរនេះ មានវត្ថុបុរាណជាង១០.០០០មុខដែលទាក់ទងនឹងកាហ្វេ បានដាក់តាំងក្នុងផ្ទះ៥ខ្នង ដែលបានសាងសង់ឡើងតាមស្ថាបត្យកម្មផ្ទះល្វែងប្រពៃណីរបស់ប្រជាជនអេដេ។ ការស្វែងយល់ពីសារមន្ទីរ ញុាំងឱ្យអ្នកទស្សនាមានចំណេះដឹងដ៏មានប្រយោជន៍ជាច្រើនអំពីភេសជ្ជៈដែលពេញនិយមនេះ។

ភ្ញៀវឆ្លងកាត់បន្ទប់នីមួយៗតាមជួរផ្ទះល្វែង មានអារម្មណ៍ដូចជាកំពុងតែឆ្លងកាត់ដំណាក់កាលនីមួយៗ តាំងពីដើមកាហ្វេបានដាំលូតលាស់មានពណ៌បៃតងនៅលើដីក្រហមនៃតំបន់ខ្ពង់រាប ពេលចេញផ្កាពណ៌សសំពោងតាមចង្កេះភ្នំ រហូតដល់ការឈ្លីសំបកផ្លែកាហ្វេតាមរបៀបសាមញ្ញដល់របៀបទំនើប។ ដើម្បីទទួលបានកាហ្វេដ៏ឈ្ងុយឆ្ងាញ់មួយពែង អ្នកច្នៃត្រូវចម្ងាយកម្លាំងទៅលើការលីង កិន រហូតដល់របៀបឆុង... ប្រការដែលអ្នកចូលចិត្តពិសារកាហ្វេភាគច្រើនតិចចាប់អារម្មណ៍ នោះគឺកាហ្វេត្រូវបានលីងនៅកម្រិតភ្លើងធំតូចខុសៗគ្នា គ្រាប់កាហ្វេលីងឆ្អិនក្រហមខុសគ្នា នឹងមានក្លិនក្រអូប រសជាតិខុសៗគ្នាដែរ។

ដោយមានផ្ទៃប្រហែល៤៥ហិកតា ព្រមទាំងប្រកបដោយគំនិតរចនាថ្មី អ្នកទស្សនាអាចថតរូបតាមចំណូលចិត្តនៅក្នុងបរិវេណសារមន្ទីរ។ ទោះជាយ៉ាងណាក៏ដោយ សូមកុំភ្លេចពិសាកាហ្វេនៅហាងដ៏ទំនើបរបស់សម្ព័ន្ធក្រុមហ៊ុនទ្រុងង្វៀង។ ដោយឡែកកាហ្វេច្នៃប្រតិដ្ឋ សម្ព័ន្ធក្រុមហ៊ុនទ្រុងង្វៀងក៏មានកាហ្វេជាច្រើនកម្រិតសម្រាប់មហាជនគ្រប់គ្នាផងដែរ។ ប្រសិនបើអ្នកមិននិយមពិសាកាហ្វេច្រើនឆ្នាំមកទេ អ្នកគួរតែជ្រើសទិញពីកម្រិត៣ចុះមកប៉ុណ្ណោះ ព្រោះកម្រិតខ្ពស់ជាងអាចធ្វើឱ្យអ្នកស្រវឹង។

រីករាយពិសាកាហ្វេដ៏ឈ្ងុយឆ្ងាញ់ មើលសិល្បករជនជាតិភាគតិចអេដេ សម្តែងរបាំប្រពៃណីក្នុងបរិយាកាសត្រជាក់ៗនៃតំបន់ដីខ្ពង់រាប គឺជាជម្រើសដ៏ល្អនារដូវវិស្សមកាលនេះ៕

ហាថាញ - បកប្រែ៖ សុផន

ចែករំលែកអត្ថបទ

ពាក្យគន្លឹះ