សុខភាព - អប់រំ អប់រំ

05/06/2023 - 11:02

ភាពអ៊ូអរនៃថ្ងៃបើកបវេសនកាលឆ្នាំសិក្សាថ្មីថ្នាក់ពុទ្ធិកសិក្សា

ជារៀងរាល់ឆ្នាំ នៅថ្ងៃ ១ រោច ខែពិសាខ នៅតាមវត្តពុទ្ធសាសនាទក្ខិណនិកាយខ្មែរលើភូមិសាស្រ្តខេត្តត្រាវិញ តែងរៀបចំបើកបវេសនកាលថ្នាក់ពុទ្ធិកសិក្សា។ល។

ម៉ោងរៀនថ្នាក់ពុទ្ធិកមធ្យមសិក្សាទុតិយភូមិឆ្នាំទី ២ របស់សមណសិស្សនិងសិស្សវត្តផ្នោរកំបុត។

វត្តផ្នោរកំបុត ឃុំហ្វាឡើយ ស្រុកចូវថាញ់ ខេត្តត្រាវិញ មានកិត្តិយសត្រូវបានសមាគមព្រះសង្ឃសាមគ្គីស្នេហាជាតិខេត្ត ស្រុក អនុញ្ញាតឱ្យបើក ៣ ថ្នាក់ ក្នុងនោះ ថ្នាក់ពុទ្ធិកបឋមសិក្សា ២ ថ្នាក់និងថ្នាក់ពុទ្ធិកមធ្យមសិក្សាទុតិយភូមិ ១ ថ្នាក់។ ជាទូទៅសមណសិស្សថ្នាក់ ពុទ្ធិកមធ្យមសិក្សាទុតិយភូមិ តែងបានសមាគមព្រះសង្ឃសាមគ្គីស្នេហាជាតិខេត្តបញ្ជូនពីវត្តនានានិមន្តមកសិក្សា និងមានសមណសិស្សមួយចំនួនអង្គនិមន្តមកពីខេត្តក្រៅ ដូចជា អាងយ៉ាង វិញឡុងជាដើម។ សមណសិស្សយ័ញវ៉ូវបាវ នៅស្រុកថ្វយសើុង ខេត្តអាងយ៉ាង ពិតឱ្យដឹង៖ “អាត្មាភាពបានសមាគមព្រះសង្ឃសាមគ្គីស្នេហាជាតិស្រុកបញ្ជូនមកសិក្សានៅវត្តផ្នោរកំបុត។ និមន្តមកសិក្សាទីនេះ បានព្រះចៅអធិការវត្តគិតគូរកន្លែងស្នាក់នៅឆាន់ចុកព្រមទាំងសិក្ខូបករណ៍ទៀតផង។ អាត្មាភាពនឹងប្តេជ្ញាចិត្តរៀនសូត្រឱ្យបានល្អ ដើម្បីមិនឱ្យខកបំណងរបស់ព្រះអធិការ គណៈកម្មការនិងពុទ្ធបរិស័ទចំណុះជើងវត្តផ្នោរកំបុតដែលបានបង្កលក្ខណសម្បត្តិឱ្យអាត្មាភាពរៀនសូត្រ”។

លោកគឹមត្រឿង ប្រធានគណៈកម្មការវត្តផ្នោរកំបុត ឱ្យដឹង៖ “រៀងរាល់ឆ្នាំ វត្តតែងបើកថ្នាក់បង្រៀនភាសាបាលីនិងអក្សរខ្មែរសម្រាប់ប្អូនៗរដូវវិស្សមកាលនិងសមណសិស្សដែលនិមន្តមកពីខេត្តនានា។ ក្នុងនាមជាប្រធានគណៈកម្មការវត្ត ខ្ញុំមានសោមនស្សរីករាយនិងប្តេជ្ញាចិត្តឧបត្ថម្ភដើម្បីសមណសិស្ស បេក្ខសិស្សមានសម្ភារៈប្រើប្រាស់គ្រប់គ្រាន់ក្នុងដំណាក់កាលរៀនសូត្រ”។

ព្រះតេជព្រះគុណគឹមឆាយវ៉ារីយ៍ ព្រះចៅអធិការវត្តផ្នោរកំបុត មានថេរដីកា៖ “វត្តបានចាត់ទុកការរៀបចំបើកថ្នាក់រៀនគឺជាកិច្ចការមួយក្នុងចំណោមកិច្ចការដ៏សំខាន់ ញុាំងឱ្យវត្តក្លាយជាមជ្ឈមណ្ឌល ទាក់ទាញសមណសិស្ស និងសិស្សមកពីតំបន់ផ្សេងៗ។ ផ្តើមពីនោះ រៀងរាល់ឆ្នាំវត្តតែងទទួលសមណសិស្សនិងសិស្សរាប់សិបអង្គនាក់មកសិក្សា។ ឆ្នាំនេះ វត្តបើករៀន ៣ ថ្នាក់ មានសមណសិស្សនិងសិស្ស ៩១ អង្គនាក់។ អាស្រ័យការត្រៀមបម្រុងបានល្អអំពីធនធានមនុស្សសម្រាប់បម្រើការបង្ហាត់បង្រៀន ក៏ដូចជាមូលដ្ឋានសម្ភារៈ កន្លែងស្នាក់នៅ ចង្ហាន់បិណ្ឌបាត្របានគ្រប់គ្រាន់ ម្ល៉ោះ ហើយ ការរៀបចំបើកថ្នាក់រៀនក្នុងឆ្នាំសិក្សាថ្មីមានភាពងាយស្រួលជាង”។

សមាគមព្រះសង្ឃសាមគ្គីស្នេហាជាតិស្រុកចូវថាញ់ បច្ចុប្បន្នមាន ១៧ វត្តគ្រប់លក្ខណៈសម្បត្តិរៀបចំបើកថ្នាក់ពុទ្ធិកបឋមសិក្សានិងមធ្យមសិក្សាទុតិយភូមិ។ អាស្រ័យហេតុនោះ អនុវត្តកិច្ចចង្អុលការរបស់សមាគមព្រះសង្ឃសាមគ្គីស្នេហាជាតិថ្នាក់ខេត្ត មកទល់ពេលនេះ វត្តនានាតែងចូលរៀនត្រូវតាមការកំណត់។ ក្នុងប៉ុន្មានថ្ងៃដើមឆ្នាំសិក្សាថ្មី បរិយាកាសនៃការបើកបវេសនកាលសិក្សាតាមវត្តនានាមានភាពអ៊ូអរណាស់៕

សើុងម៉ាល័យ-លីសៀ

ចែករំលែកអត្ថបទ

ពាក្យគន្លឹះ