សុខភាព - អប់រំ សុខភាព

08/05/2023 - 14:34

រួមកម្លាំងថែទាំសុខភាពជូនមាមីងជនជាតិភាគតិច

តាមតំណាងមន្ទីរពេទ្យពហុព្យាបាលហ្វាហាវ – Medic កឹងធើ បានឱ្យដឹង៖ សកម្មភាពពិនិត្យ ព្យាបាលជំងឺ និងជូនអំណោយដល់មាមីងជនរួមជាតិខ្មែរក្នុងឱកាសបុណ្យចូលឆ្នាំថ្មីរៀងរាល់ឆ្នាំ តែងទទួលបានការគាំទ្រយ៉ាងទំហឹងពីសំណាក់ក្រុមគ្រូពេទ្យ វេជ្ជបណ្ឌិតរបស់មន្ទីរពេទ្យ។

ក្រោយពីបានពិនិត្យជំងឺ ជូនថ្នាំពេទ្យដោយឥតគិតថ្លៃ មាមីងជនរួមជាតិខ្មែរនៅទាំងបានក្រុមគ្រូពេទ្យ វេជ្ជបណ្ឌិតជូនអំណោយទៀតផង។

ទោះបីនៅឆ្ងាយពីមជ្ឈមណ្ឌលក្រុងក៏ដោយ ប៉ុន្តែរថយន្តក្រុមគ្រូពេទ្យ វេជ្ជបណ្ឌិត ពិនិត្យ ព្យាបាលជំងឺដោយឥតគិតថ្លៃនៃមន្ទីរពេទ្យពហុព្យាបាលហ្វាហាវ – Medic កឹងធើ បានមកដល់ទីតាំងពិនិត្យជំងឺនៅមជ្ឈមណ្ឌលវប្បធម៌នៃឃុំឌិញម៉ូង ស្រុកថើយឡាយ ក្រុងកឹងធើ នៅវេលាម៉ោង ៧ ព្រឹក។ វេជ្ជបណ្ឌិត ង្វៀងទ្រុងហឺវ បំពេញការងារនៅមន្ទីរពេទ្យពហុព្យាបាលហ្វាហាវ – Medic កឹងធើ បានឱ្យដឹង៖ “តាមរយៈការទៅពិនិត្យ ព្យាបាលជំងឺលើកមុនៗ យើងខ្ញុំឃើញមាមីងមករង់ចាំតាំងពីព្រលឹម ដូច្នេះក្រុមយើងខ្ញុំក៏មានស្មារតីភ្ញាក់រលឹកត្រូវទៅដល់ទីតាំងឱ្យចំម៉ោង មិនឱ្យមាមីងរង់ចាំទេ”។

ជាមួយនឹងកងជួរវេជ្ជបណ្ឌិតឯកទេស មានមុខជំនាញខ្ពស់ រួមនឹងការនាំយកមកនូវម៉ាស៊ីនទំនើបៗ បានជួយឱ្យការងារពិនិត្យ និងធ្វើរោគវិនិច្ឆ័យមានប្រសិទ្ធភាព។ នៅទីនេះ វេជ្ជបណ្ឌិតបានធ្វើរោគវិនិច្ឆ័យ និងណែនាំអ្នកជំងឺស្ទង់បេះដូង ថតកាំរស្មីអ៊ិច ឆ្លុះអេកូ។ល។ លើរថយន្តជំនាញរបស់មន្ទីរពេទ្យ។ ពេលរកឃើញជំងឺភ្លាម វេជ្ជបណ្ឌិតក៏ពិគ្រោះ ណែនាំពីការព្យាបាល ផ្តល់វេជ្ជបញ្ជានិងជូនថ្នាំពេទ្យដោយឥតគិតថ្លៃ។ល។

អ្នកមីងដាវធីម៉ុយ នៅភូមិឌិញហ្វា B បានឱ្យដឹង៖ “ខ្ញុំមានបងសាច់ញាតិនៅស្រុកកើ-ដ បានវេជ្ជបណ្ឌិតនៃមន្ទីរពេទ្យពហុព្យាបាលហ្វាហាវ – Medic កឹងធើ ពិនិត្យជំងឺជូនកាលពី បុណ្យចូលឆ្នាំថ្មី ២០២២ រកឃើញគាត់កើតជំងឺទឹកនោមផ្អែម ក្រោយមក គាត់បានវេជ្ជបណ្ឌិតណែនាំពីរបៀបហូបចុក ឥឡូវជាតិស្ករក្នុងឈាមបានលំនឹង ចំណែកខ្ញុំឈឺពោះ សង្ស័យឈឺក្រពះ ដូច្នេះខ្ញុំទន្ទឹងរង់ចាំក្រុមវេជ្ជបណ្ឌិតមកដើម្បីទៅពិនិត្យជំងឺ”។ល។

ក្រៅពីការពិនិត្យជំងឺជូនប្រជាជនក្រីក្រចំនួន ៥០០ គ្រួសារ និងមាមីងជនជាតិខ្មែរ ក្រុមពិនិត្យ ព្យាបាលជំងឺដោយឥតគិតថ្លៃនៃមន្ទីរពេទ្យពហុព្យាបាលហ្វាហាវ – Medic កឹងធើ ក៏បានជូនអំណោយចំនួន ១០០ ចំណែកដល់មាមីងជនជាតិខ្មែរផងដែរ។ លោកដាវសុខ នៅភូមិឌិញភឿក បានឱ្យដឹង៖ “គ្រូពេទ្យចុះមកដល់ឃុំពិនិត្យជំងឺ ផ្តល់ថ្នាំពេទ្យ ព្រមទាំងជូនអំណោយទៀត ដូច្នេះនរណាក៏រីករាយនិងដឹងគុណខ្លាំងណាស់”។

លោកង្វៀងវ៉ាន់ថឿ លេខាគណៈកម្មាធិការបក្សឃុំឌិញម៉ូង បានឱ្យដឹង៖ “ការពិនិត្យ ព្យាបាលជំងឺដោយឥតគិតថ្លៃរបស់មន្ទីរពេទ្យមានអត្ថន័យដ៏ជ្រាលជ្រៅ ពីព្រោះមន្ទីរពេទ្យបានរួមជាមួយភូមិភាគថែទាំសុខភាពជូនមាមីងដែលជួបការលំបាកនិយាយរួម និងមាមីងជនរួមជាតិខ្មែរនិយាយដោយឡែក”៕

ហាថាញ-សុផន

ចែករំលែកអត្ថបទ

ពាក្យគន្លឹះ