ព្រឹត្តិការណ៍ - នយោបាយ ព្រឹត្តិការណ៍

10/04/2023 - 16:36

សមមិត្តថ្នាក់ដឹកនាំ អញ្ជើញទៅសួរសុខទុក្ខ និងប្រសិទ្ធពរដល់ជនរួមជាតិខ្មែរ ក្នុងឱកាសបុណ្យចូលឆ្នាំថ្មី ២០២៣

ស្របក្នុងឱកាសបុណ្យចូលឆ្នាំថ្មីប្រពៃណី ឆ្នាំ ២០២៣ សមមិត្ត ត្រឹងថាញម៉ឹង អនុប្រធានប្រចាំការនៃរដ្ឋសភា បានអញ្ជើញទៅប្រសិទ្ធពរនៅវិទ្យាស្ថានពុទ្ធសាសនាខ្មែរ នៅខណ្ឌអូរម៉ូង ក្រុងកឹងធើ។ ជំនួសមុខថ្នាក់ដឹកនាំបក្ស និងរដ្ឋ សមមិត្តផ្តាំផ្ញើនូវបិយវាចាសួរសុខទុក្ខដល់អ្នកមុខអ្នកការសាសនា សមណសិស្សនៅវិទ្យាស្ថាន ឆ្លងតាមរយៈអ្នកមុខអ្នកការសាសនា សមមិត្តផ្តាំផ្ញើនូវបិយវាចាប្រសិទ្ធពរបវរមហាប្រសើរដល់ជនរួមជាតិខ្មែរក្នុងក្រុង ទទួលបុណ្យចូលឆ្នាំថ្មីប្រកបដោយសុខក្សេមក្សាន្ត និងកក់ក្តៅជាទីបំផុត។ ក្នុងឱកាសនេះ សមមិត្ត ត្រឹងថាញម៉ឹង បានប្រគេននិងជូនទេយ្យវត្ថុដល់មន្ត្រីសង្ឃ និងអ្នកមានប្រជាប្រិយក្នុងជនរួមជាតិខ្មែរចំនួន ៥២ អង្គ/នាក់ អំណោយមួយចំណែកៗមានតម្លៃ ៧០០.០០០ ដុង ព្រមជាមួយនោះ ប្រគេនទេយ្យវត្ថុដល់វិទ្យាស្ថានពុទ្ធសាសនាខ្មែរ និងសមាគមព្រះសង្ឃសាមគ្គីស្នេហាជាតិក្រុង អំណោយមួយចំណែកៗតម្លៃ ១១ លានដុង។

សមមិត្ត ត្រឹងថាញ់ម៉ឹង អនុប្រធានប្រចាំការនៃរដ្ឋសភា ប្រគេនទេយ្យវត្ថុដល់
វិទ្យាស្ថានពុទ្ធសាសនាខ្មែរ។ រូប៖ អាញ់យ៉ុង

សមមិត្ត ផាមវ៉ាន់ហេវ អនុលេខាប្រចាំការនៃគណៈកម្មាធិការបក្សក្រុង ប្រធានក្រុមប្រឹក្សាប្រជាជនក្រុងកឹងធើ ប្រសិទ្ធពរបុណ្យចូលឆ្នាំថ្មីដល់បុគ្គលិកកាសែតកឹងធើ ។

* នៅក្រុងកឹងធើ ថ្នាក់ដឹកនាំក្រុង ក៏បានរៀបចំពិធីជួបជុំ និងចាត់តាំងគណៈប្រតិភូជាច្រើនក្រុម អញ្ជើញទៅសួរសុខទុក្ខ ជូនអំណោយនិងប្រសិទ្ធពរឆ្នាំថ្មីដល់ព្រះឧបជ្ឈាយ៍ ព្រះតេជព្រះគុណ ព្រះថេរានុត្ថេរ អាចារ្យ គណៈកម្មការវត្ត គ្រួសារគោលនយោបាយ អ្នកមានប្រជាប្រិយ។ល។ ពិសេស អញ្ជើញទៅសួរសុខទុក្ខ និងប្រសិទ្ធពរឆ្នាំថ្មីដល់កម្មាភិបាល បុគ្គលិក កាសែតកឹងធើភាសាខ្មែរ សមមិត្តផាមវ៉ាន់ហេវ អនុលេខាប្រចាំការនៃគណៈកម្មាធិការបក្ស ក្រុង ប្រធានក្រុមប្រឹក្សាប្រជាជនក្រុង បានសួរសុខទុក្ខដោយរាក់ទាក់ និងផ្តាំផ្ញើនូវបិយវាចា ប្រសិទ្ធពរដល់គ្រួសារកម្មាភិបាល បុគ្គលិក ទទួលអំណរបុណ្យចូលឆ្នាំថ្មីប្រកបដោយភាពកក់ក្តៅ សុខុដុមរមនា សុភមង្គល និងប្រកបដោយពុទ្ធពរ ៤ ប្រការគឺ “អាយុ វណ្ណៈ សុខៈ ពលៈ”។

*ស្របក្នុងឱកាសបុណ្យចូលឆ្នាំថ្មីនេះដែរ ខេត្តសុកត្រាំង បានរៀបចំពិធីជួបជុំ ប្រសិទ្ធពរបុណ្យចូលឆ្នាំថ្មី និងជូនអំណោយ ៤០០ ចំណែកដល់វីរមាតាវៀតណាម វីរៈកងកម្លាំងប្រដាប់អាវុធប្រជាជន កម្មាភិបាលចូលនិវត្តន៍ កម្មាភិបាល អ្នករដ្ឋការ បុគ្គលិក មន្ត្រីសង្ឃ ព្រះសង្ឃ និងគ្រួសារគោលនយោបាយរបស់ខេត្ត។ ទន្ទឹមនឹងនោះ ខេត្តសុកត្រាំងនៅទាំងចាត់តាំង គណៈប្រតិភូ ១៦ ក្រុម អញ្ជើញទៅសួរសុខទុក្ខ និងប្រសិទ្ធពរឆ្នាំថ្មីដល់សមូហភាពនិងបុគ្គលគំរូទៀតផង។

* នៅខេត្តបាកលីវ ប្រធានគណៈកម្មាធិការប្រជាជនខេត្ត ទើបមានលិខិតចង្អុលការអនុញ្ញាត ឱ្យកម្មាភិបាល អ្នករដ្ឋការ បុគ្គលិក កងកម្លាំងប្រដាប់អាវុធ និងកម្មករនិយោជិតដែលជាជនជាតិខ្មែររស់នៅលើភូមិសាស្រ្តខេត្ត បានឈប់សម្រាកបុណ្យចូលឆ្នាំថ្មី ៣ ថ្ងៃ ចាប់ពីថ្ងៃទី ១៤ ដល់ថ្ងៃទី ១៦ ខែមេសា ឆ្នាំ ២០២៣។ ទន្ទឹមនឹងនោះ ចាត់តាំងគណៈប្រតិភូ ៦ ក្រុម អញ្ជើញទៅសួរសុខទុក្ខ ប្រសិទ្ធពរឆ្នាំថ្មីនិងប្រគេនទេយ្យវត្ថុដល់សមាគមព្រះសង្ឃសាមគ្គីស្នេហាជាតិខេត្ត ព្រះឧបជ្ឈាយ៍ ព្រះសង្ឃ អាចារ្យ គណៈកម្មការវត្ត គ្រួសារគោលនយោបាយ អ្នកមានប្រជាប្រិយក្នុងជនរួមជាតិខ្មែរ។ ទេយ្យវត្ថុក្នុងមួយចំណែកៗមានតម្លៃពី ៤ ដល់ ១១ លានដុង។

* គណៈកម្មាធិការប្រជាជនស្រុកត្រាអូង ខេត្តវិញឡុង ទើបរៀបចំជូនអំណោយ ១០០ ចំណែកដល់មាមីងជនរួមជាតិខ្មែរនៅឃុំតឹងមី។ អំណោយក្នុងមួយចំណែកៗមានតម្លៃ ៤០០.០០០ ដុង រួមមាន អង្ករ មី ប្រេងឆា។ល។ អាស្រ័យគណៈកម្មាធិការប្រជាជនស្រុក ចលនាសប្បុរសជនរួមវិភាគទាន។ ទោះបីអំណោយមិនច្រើនក៏ពិតមែន ប៉ុន្តែមានអត្ថន័យជាក់ស្តែងក្នុងឱកាសបុណ្យចូលឆ្នាំថ្មី ឆ្នាំ ២០២៣ រួមចំណែកញុាំងឱ្យបរិយាកាសអំណរបុណ្យចូលឆ្នាំថ្មីរបស់មាមីងឱ្យមានភាពកក់ក្តៅថែមទៀត៕

PV-CTV- វិមាន 

ចែករំលែកអត្ថបទ

ពាក្យគន្លឹះ