សុខភាព - អប់រំ អប់រំ

09/01/2023 - 14:35

ត្រាវិញ សម័យប្រឡងបញ្ចប់ថ្នាក់ពុទ្ធិកមធ្យមសិក្សាបឋមភូមិ

សមាគមព្រះសង្ឃសាមគ្គីស្នេហាជាតិខេត្តត្រាវិញ ទើបរៀបចំពិធីប្រឡងបញ្ចប់ថ្នាក់ពុទ្ធិកមធ្យមសិក្សាបឋមភូមិ (ថ្នាក់់ទី ១ ដល់ថ្នាក់ទី ៣) ឆ្នាំសិក្សា ២០២២-២០២៣ នៅមណ្ឌលប្រឡងវត្តកោះកែវសិរី ក្រុងត្រាវិញ និងវត្តចម្បាបូរី (ត្រោកលិច) ទីប្រជុំជនចូវថាញ់ ស្រុកចូវថាញ់។ សម័យប្រឡងមានបេក្ខសមណសិស្សនិងសិស្ស ចូលរួម ៣៤៩ អង្គ/នាក់ ក្នុងនោះ វត្តកោះកែវសិរី មានបេក្ខសមណសិស្សនិងសិស្ស ១២០ អង្គ/នាក់ និងវត្តចម្បាបូរី មានបេក្ខសមណសិស្សនិងសិស្ស ២២៩ អង្គ/នាក់។ លទ្ធផល វត្តកោះកែវសិរី ប្រឡងជាប់ ១០០% វត្តចម្បាបូរី ប្រឡងជាប់ ៨០% ។

ទិដ្ឋភាពមណ្ឌលប្រឡងវត្តកោះកែវសិរី (កោះ)។

បេក្ខសមណសិស្សនិងសិស្សមណ្ឌលប្រឡងវត្តព្រះបាទកងចក្រកំពង់មាស ឃុំហីវទ្រុង ស្រុកទីវកឹង ស្ដាប់លក្ខន្តិកៈមុនពេលចូលកាន់បន្ទប់ប្រឡង។

ទិដ្ឋភាពមណ្ឌលប្រឡងវត្តចម្បាបូរី (ត្រោកលិច)។

នៅវត្តព្រះបាទកងចក្រកំពង់មាស ឃុំហីវទ្រុង ស្រុកទីវកឹង សមាគមព្រះសង្ឃសាមគ្គីស្នេហាជាតិស្រុក ក៏ទើបនឹងរៀបចំពិធីប្រឡងបញ្ចប់ថ្នាក់ពុទ្ធិកមធ្យមសិក្សាបឋមភូមិ (ថ្នាក់់ទី ១ ដល់ថ្នាក់ទី ៣) ឆ្នាំសិក្សា ២០២២-២០២៣។ មានបេក្ខសមណសិស្សនិងសិស្សចូលរួមប្រឡង ២៦២ អង្គ/នាក់ មកពីបណ្ដាវត្តនានាក្នុងស្រុកចំនួន ១១/១៥ វត្ត ចំពោះវិញ្ញាសាដែលត្រូវយកមកប្រឡងចំនួន ១០ វិញ្ញាសា។ លទ្ធផលថ្នាក់បាលីទី ១ ជាប់ ៨៤,៦% ថ្នាក់ទី ២ និងទី ៣ ជាប់ ១០០% ។ ព្រះតេជព្រះគុណ ជយសេនោ គឹមម័ន (ជុំ) ប្រធានពុទ្ធិកសិក្សាសមាគមស្រុក មានថេរដីកា៖ ឆ្នាំនេះចំនួនសិស្ស មានបរិមាណកើនឡើង បើប្រៀបនឹងឆ្នាំមុន រយៈពេលសិក្សា ៩ ខែ លោកគ្រូអាចារ្យបង្រៀនគ្រប់រូបបានយកអស់ពីកម្លាំងកាយចិត្តក្នុងការបង្ហាត់បង្រៀន ម្ល៉ោះហើយទើបគុណភាពបណ្ដុះបណ្ដាលមានការកើនឡើង៕

អត្ថបទ, រូបថតៈ ពេជ្រសឿន-ម៉ាល័យ

ចែករំលែកអត្ថបទ

ពាក្យគន្លឹះ